Matayo 14 - Kivunjo New Testament 1999

Upfu lo Yohane Mpatisi

¹ Kyiyeri kyilya mangyi Herode naleicho mbonyi tsa Yesu.

² Kawia waṟundi wakye, “Ichu nyi oe Yohane Mpatisi. Naṟuka ko wapfu. Nyikyo kyitewe awoṙe pfinya tseṟunda ishi shoose.”

³ Kyipfa Herode nalekoawaṙa Yohane, kampfunga, kammbika kyipfungonyi, kyipfa kya Herodia, mka o Filyipo mono-wamae.

⁴ Kyipfa Yohane nalemmbia, “Chi sungusinyi ikaa na oe-pfo.”

⁵ Na oe kyiyeri awekundi immbaaga, naleowuo wandu, kyipfa walewona Yohane cha moonguo shisuku.

⁶ Na kyiyeri mfiri ung'anyi o ifeo lya Herode uleshika mana o Herodia o waka naletema mbele ya wandu, kachihiṟa Herode,

⁷ mṟasa Herode kawika kyaasa kui ilya nyamu kye nechimwenenga kyindo kyoose echikyiterewa.

⁸ Na oe, kunu echilosho nyi wamae, kagamba, “Ngyienenga wulalu kuṙi iha ipongonyi mṙoe o Yohane Mpatisi.”

⁹ Na mangyi kawona fowa mrimenyi. Kyaindi kyipfa kya nyamu tsakye, na kyipfa kya walya waweilya handu hamwi na oe, kagamba naenengo.

¹⁰ Kaṙuma mndu, kaṙumbuo Yohane mṙoe kulya kyipfungonyi.

¹¹ Mṙoe okye ukoendo ukyeri ipongonyi, mana ulya o waka kauenengo; kauṙuo ko wamae.

¹² Wanalosho wakye wakayenda, wakaṙuo mnying'a ulya, wakamṟika; numa wakayenda wakaongoya Yesu mbonyi.

Iigutsa wandu shiku shitaanu

¹³ Na Yesu kyiyeri aleicho isho, nalewuka ipfo ngalawenyi, kayenda handu halawoṙe wandu, hatsie sau. Na wuingyi wo wandu kyiyeri waleicho, walemwosha wechumia na maṙende wawuka mṟinyi kowo.

¹⁴ Yesu kafuma, kawona wuingyi wo wandu wung'anyi, kawona wukyiwa mrimenyi kyipfa kyawo, kawakyiṟa ndoṟe tsawo.

¹⁵ Na kyiyeri kuleila, wanalosho wakye waleyenda kokye, wakagamba, “Handu ha nyi nuka mreesi, na kyiyeri kyamwiṙa. Samana na wuingyi wo wandu, wayende shikaṟonyi, wandeguṟa shelya.”

¹⁶ Yesu kawawia, “Wawoṙe kyitewe kyeyenda-pfo. Waenengyenyi kyelya.”

¹⁷ Wakammbia, “Luwoṙe kyindo iha sile mkate itanu na makunga gawi-pfo.”

¹⁸ Kagamba, “Ngyiendienyi.”

¹⁹ Kagamba wuingyi wo wandu waṙamie maṟenyi. Kaira mkate iya itanu na makunga galya gawi, kaambuya wuye ruwewu, kawikyia mboṟa, kafunja mkate iya, kaenengyia wanalosho, wanalosho wakaenengyia wuingyi wulya wo wandu.

²⁰ Wakalya woose wakaiguṙa. Wakasania matsugaṟo ga shipeṟengu sha mkate iya, mkunja ikumi na iwi, iichuo.

²¹ Nawo walelya wawekyeri wasoṟo washikyie shiku shitaanu, kulawoṙe waka na wana watutu.

Ichumia Wuye ya Mṟinga

²² Cha ilyi kaitika wanalosho wakye waṙooye ngalawenyi wasonguo mbele yakye iyenda molyolya, kyiyeri oe aweisamana na wuingyi wo wandu.

²³ Na oe amsamane na wuingyi wo wandu, naleṙooya fumvunyi handu halawoṙe wandu, indeterewa. Na kyiyeri kuleila, nawekyeri pfo amonyi.

²⁴ Na ngalawa iya ilekoyamshika makyiṙi-gawi ga ipalyipalyi, yechilya wukyiwa mnu kyipfa shiwiṟi shiweikapa.

²⁵ Na kyiyeri kya iringa lya kaana lya kyio Yesu naleyenda ko wanalosho walya, echichumia wuye ya ipalyipalyi.

²⁶ Kyiyeri wanalosho walemmbona echichumia wuye ya ipalyipalyi, walewoṙo nyi wuowu, wechigamba, “Nyi kyirinje”; wakafiiṟa kui wuowu.

²⁷ Cha ilyi Yesu kaṙeṙa, kawawia, “Kuwanzenyi mrimenyi; nyi inyi, mulaowuoe.”

²⁸ Petiro kamgaluo, kagamba, “Kokooya nyi iyoe, ngyiwia ngyiche na kopfo wuye ya mṟinga.”

²⁹ Kagamba, “Nnjo.” Petiro kasoka kulya ngalawenyi, kachumia na maṙende wuye ya mṟinga, kundu nayende ko Yesu.

³⁰ Kyaindi kyiyeri alewona kyiwiṟi, kaowuo; kawooka isoṟowia; kafiiṟa, echigamba, “Mndumii, ngyiletsa.”

³¹ Cha ilyi Yesu kagoṟuo kuwoko kokye, kammbia, “Iyoe uwoṙe iiṙikyia lyaangu, ny'kyilyi ulaleiṙikyia kye ngyeiṙima ikuenenga wuiṙimi wo chumia wuye ya mṟinga?”

³² Nawo wakaṙooya ngalawenyi, kyiwiṟi kyikatsia.

³³ Na walya wawekyeri kulya ngalawenyi wakamwindia, wechigamba, “Ny'kyaloi iyoe nui Mono-Ruwa.”

Ikyiṟa Wandu Waluoe wa Kyenesareti

³⁴ Na wamuambaṙe, waleshika uruka lo Kyenesareti.

³⁵ Na wandu wa handu halya kyiyeri walemmanya, waleṙuma wandu iyenda ngyuuruka tsikyeri mṟasenyi, wakamwendie woose walawekuiṙima.

³⁶ Nawo wakamterewa wapaaye maa ikyechu lya ikunya lyakye tupu; na woose walepaaya wakakyiṟo piu.