Matayo 13 - Kivunjo New Testament 1999

Mfano o Moolyia Mbeu

¹ Mfiri ulya Yesu kawuka kanyi kaṙamia mbai ya ipalyipalyi.

² Wuingyi wung'anyi wo wandu wukokuumbia kufui na oe, mṟasa kaṙooya ngalawenyi, kaṙamia, na wuingyi wulya woose wukogoṟoka mbai ya ipalyipalyi.

³ Kawawia shindo shifoi kui mfano, echigamba, “Moolyia mbeu nalefuma indewaaya.

⁴ Na kyiyeri aweiwaaya, mbeu tsingyi tsileoloka kufui na njia, shileye shikacha shikatsilya.

⁵ Tsingyi tsikaoloka handu hawoṙe iṟaṟa, halawoṙe teri ishikyie. Cha ilyi tsikaṙo, na kyipfa halawewoṙe teri ishikyie;

⁶ mui ukowaa ukotsikoṟa; na kyipfa tsilawewoṙe mri tsikauma.

⁷ Tsingyi tsikaoloka handu hawoṙe msha. Msha iya ikaṙo ikatsiilama.

⁸ Tsingyi tsikaoloka handu hawoṙe teri ngyicha, tsikakumbia, imwi igana, imwi makumi gaṟandaaṟu, imwi makumi gaṟaaṟu.

⁹ Awoṙe maṙwi naaṙanyie.”

Kyimaṙuma kya Mfano

¹⁰ Wanalosho wakacha, wakammbia, “Kyitewe uiṙeṙa nawo kui mfano ny'kyi?”

¹¹ Kagaluo kawawia, “Nyoe muwaenengye imanya shiṟika sha Wumangyi wo ruwewu, kyaindi wo wawaenengye-pfo.

¹² Cha kyipfa orio oose awoṙe kyindo nechienengo, na oe nechipfumbutsio pacha; kyaindi orio oose alawoṙe kyindo, maa kyilya awoṙe nechisoko.

¹³ Kyipfa kya ikyi ngyiṙeṙa nawo kui mfano; cha kyipfa wakaambuo wawonyi-pfo, na wakaaṙanyia waiicho maa imanya-pfo.

¹⁴ Na ṙeṙo lya moonguo shisuku Yesaya lyaafukyia kowo, lyechigamba, ‘Iicho mochiicho, maa mochimanya-pfo, iambuo mochiambuo, maa mochiwona-pfo.

¹⁵ Kyipfa mrima ya wandu-wa yawa ngyiumu, na kui maṙwi gawo wekyeicho necha-pfo, na washingyie meso gawo; walachewona kui meso gawo, walaicho kui maṙwi gawo, wakamanya kui mrima yawo, wakangyigalukyia, ngawakyiṟa.’ ”

¹⁶ “Kyaindi, agusu meso ganyu, cha kyipfa gawonyi; na maṙwi ganyu, cha kyipfa gaiicho.

¹⁷ Cha kyipfa, ny'kyaloi, ngammbia, weonguo shisuku wafoi na wasumganyi walelanga iwona ishi mushiwonyi nyoe, walashiwone; na iicho ishi muicho nyoe walashiicho.”

Kyitambuluo kya Mfano o Moolyia Mbeu

¹⁸ “Kyasia nyoe aṙanyienyi mfano o moolyia mbeu.

¹⁹ Orio mndu kaicho ṙeṙo lya Wumangyi wo ruwewu alalyimanye, mmbicho ulya nekyecha, karakuo kyilya kyikyiṙongye mrimenyi kokye. Iyi nyiyo mbeu iya ingyiṙongye mbai ya njia.

²⁰ Na mbeu iya ingyiṙongye iṟaṟenyi, nyi mndu ulya ekyeicho ṙeṙo lyilya, kalyiambilyia cha ilyi na sia.

²¹ Kyaindi lyekyewaṙa mri mrimenyi kokye-pfo, na lyekyekaa kyiyeri kyifuhi. Kukocha wukyiwa ang'u matuuro kyipfa kya ṙeṙo-lyo, cha ilyi, lyekyekaa kokye-pfo.

²² Na iya ingyiṙongye mshenyi, icho nyi mndu ekyeicho ṙeṙo lyilya; na mawino ga wuyana, na wulembi wo masaa wokyeilama ṙeṙo lyilya; lyilawaṙe ndunda.

²³ Na iya ingyiṙongye terinyi ngyicha, icho nyi oe ekyeicho ṙeṙo lyilya, na ilyimanya. Icho nyi oe ekyekumbia ndunda, ichu igana, na ichu makumi gaṟandaaṟu, na ichu makumi gaṟaaṟu.”

Mfano o Makacha

²⁴ Kawaenenga mfano ungyi, echigamba, “Wumangyi wo ruwewu wufananyi na mndu alewaaya mbeu ngyicha ṙemenyi lyakye.

²⁵ Kyaindi wandu wamlae, mokyituwa okye kacha kawaaya makacha nganunyi, kaṙicha.

²⁶ Numa kyiyeri nganu ileṙo na ikumbia, kukowoneka makacha.

²⁷ Shisinga sha monyi kanyi shikayenda shikammbia, ‘Mndumii, ulewaaya mbeu ngyicha ṙemenyi lyapfo-pfoe? Nyi kwi lyileende makacha?’

²⁸ Kashiwia, ‘Mokyituwa nyi oe aleṟunda kuṙi.’ Shisinga shikammbia, ‘Kyasia nukundi luyende lundegasania?’

²⁹ Kagamba, ‘Ote, mulachesania makacha, na ikuluo nganu hamwi nago.

³⁰ Ṙenyi shoose shing'ane mṟasa kyiyeri kyesambuo. Na kyiyeri kyesambuo ngyechiwia iwo waisambuo, sanienyi makacha kuwooka, mugapfungye shikonde shikonde mugakoṟe; kyaindi nganu isanienyi kyikumbinyi kyako.’ ”

Mfano o Mbeu ya Haradalyi

³¹ Kawaenenga mfano ungyi, echigamba, “Wumangyi wo ruwewu wufananyi na mbeu ya haradalyi, mndu aleiwuta na iiwaaya ṙemenyi lyakye.

³² Nayo nyi ingyitutu kuta mbeu tsoose. Kyaindi ikamṙo, yekyeng'ana kuta mashiṙi goose, ikawa ikyiṙi, maa shileye sha ngyinenyi shekyecha na iṙamia mbagenyi tsayo.”

Mfano o Chachu

³³ Kawawia mfano ungyi. “Wumangyi wo ruwewu wufananyi na chachu ilewuto nyi mndu mka, kaikooma shitelenyi shiṟaaṟu sha mso, mṟasa mso-cho ukoshimba oose taa.”

Kyimaṙuma Kyeṙeṙa kui Mfano

³⁴ Isho shoose Yesu nalewia wuingyi wo wandu kui mfano, maa kulawoṙe mfano alewawia kyindo-pfo.

³⁵ Kundu kyiafukyie kyindo kyikyiṙeṙe nyi moonguo shisuku echigamba, “Ngyechiṙeṙa nawo kui mfano, ngyechigamba shikuṟiikyie wookyia mawookyionyi.”

Kyitambuluo kya Mfano o Makacha

³⁶ Numa ya iho Yesu kasamana na wuingyi wo wandu. Kaiṙa na kanyi, wanalosho wakye wakayenda kokye, wakagamba, “Lutambuluye mfano o makacha ga ṙemenyi.”

³⁷ Kagaluo, kagamba, “Ekyewaaya mbeu tsilya ngyicha nyi Mono-Adamu.

³⁸ Ṙema-lyo nyi wuyana. Mbeu tsilya ngyicha nyi wana wa Wumangyi wo ruwewu, na makacha-go nyi wana wa mmbicho ulya.

³⁹ Mokyituwa ulya alewaaya nyi Mokyiriinzi. Kyilyimu nyi mafurumionyi ga wuyana; na wesambuo nyi malaika.

⁴⁰ Kyasia, chandu makacha gekyesanio na ikoṟo moṙonyi; nyi wuṙo kyechiwa mafurumionyi ga wuyana.

⁴¹ Mono-Adamu nechiṙuma malaika wakye, nawo wechisania iwuka ipfo Wumangyinyi wokye, woose wekyeende wunyamaṟi, na iwo wekyefunja mawawaso,

⁴² na iwawiyitsa moṙonyi ung'anyi. Nyi pfo-ndu kochiwaṙa wukyiwa na ilya ngakuru.

⁴³ Nyilyo wasumganyi wechiaka-aka cha mnengyeṟi Wumangyinyi wo Awu-yawo. Awoṙe maṙwi, naaṙanyie.”

Mfano o Kyindo kya Woguru Wung'anyi

⁴⁴ “Lyingyi-se Wumangyi wo ruwewu wufananyi na kyindo kya woguru wung'anyi kyikyiṟikye ṙemenyi. Kyiyeri mndu alewona kyindo-kyo, nalekyiṟika; na kyipfa alechihiyo mnu naleyenda kakumba shoose awewoṙe, kaguṟa ṙema lyilya.”

Mfano o Lulu

⁴⁵ “Lyingyi-se Wumangyi wo ruwewu wufananyi na mndu o mbucha, awekyepfula lulu ngyicha.

⁴⁶ Na oe kyiyeri alewona lulu imwi ngyicha ya woguru wung'anyi, naleyenda kakumba shoose awewoṙe kaiguṟa.”

Mfano o Iṟambika

⁴⁷ “Lyingyi-se Wumangyi wo ruwewu wufananyi na iṟambika, lyilewiyitso ipalyipalyinyi, lyikasania wa orio mbaṟe.

⁴⁸ Na lyilya lyileichuo, walelyikuruo na mbai ya ipalyipalyi; wakaṙamia, wakasania wai wecha ngalawenyi, kyaindi wai wawicho wakawawiyitsa.

⁴⁹ Nyi wuṙo kyechiwa mafurumionyi ga wuyana. Malaika wechiwoneka, wewikyia wawicho kuleshi na wasumganyi,

⁵⁰ na iwawiyitsa moṙonyi ung'anyi. Nyi pfo-ndu kochiwaṙa wukyiwa na ilya ngakuru.”

Malosho ga Wulalu na ga Kacha

⁵¹ Yesu nalewawesa, “Momanya isho shoose?” Wakammbia, “Yee.”

⁵² Kawawia, “Kyipfa kya ikyo, orio mlosha o mawawaso awoṙe wuṟango wo malosho ga Wumangyi wo ruwewu nafananyi na monyi kanyi ekyewuta kyindonyi kyakye kya woguru wung'anyi shindo shihya na sha kacha.”

Ilego lya Yesu Nasareti

⁵³ Na kyiyeri Yesu alemarisa ilosha kui mfano-yo, nalefuma kayenda.

⁵⁴ Na lyilya aleshika urukyenyi lokye, nalewalosha sinagoginyi lyawo, mṟasa wakaṟiyio, wakagamba, “Ichu nyi kwi aleende wuṟango-wu na maṟiyisho-ga?

⁵⁵ Ichu chi mana o ulya ekyepacha mbau? Wamae chi ulya ekyelago Maria? Na wana wa wamae chi Yakobo, na Yosefu, na Simion, na Yuda?

⁵⁶ Na washikyi wakye woose wakyeri iha koṙu-pfoe? Kyasia ichu nyi kwi alewona ishi shoose?”

⁵⁷ Wakawihiyo kyipfa kyakye. Yesu kawawia, “Moonguo shisuku nekyeindio kundu koose sile urukyenyi lokye, na kanyi kokye amonyi.”

⁵⁸ Maa aleṟunda shindo shifoi sha maṟiyisho ipfo-pfo, kyipfa walemwiṙikyia-pfo.