Matayo 12 - Kivunjo New Testament 1999

Mbonyi tsa Mfiri o Onyonya

¹ Kyiyeri kyilya Yesu naleiṙa maṙemenyi mfiri o onyonya. Wanalosho wakye wakawoṙo nyi njaa, wakawooka itumuo magaa ga nganu wakalya.

² Na lyilya Mafarisayo walewona walemmbia, “Wanalosho wapfo waiṟunda kyindo kyilakyeri sungusinyi ikyiṟunda mfiri o onyonya.”

³ Kawawia, “Muichi kyindo Dawidi alewuta, lyilya alewoṙo nyi njaa, oe na woṙoe?

⁴ Chandu aleiṙa na numbenyi ya Ruwa, kalya mkate iya ngyeele, mkate kyilakyeri sungusinyi kokye maa ko woṙoe iilya, sile ko makohanyi wawenyi?

⁵ Maa muichi chandu kyikyiṟeie ipfo mawawasonyi, kye mfiri o onyonya makohanyi numbenyi ya Ruwa wekyefanyiṟa mfiri o onyonya walatalyio wunyamaṟi?

⁶ Kyaindi ngammbia, kye iha nakyeri ho ai ang'anyi kuta numba ya Ruwa.

⁷ Kyaindi kokooya muweichi kyitambuluo kya maṙeṙo-ga, ‘Ngyikundi isaṟia, maa chi shienengo-pfo,’ muwechigamba wawoṙe ṙeko iwo walawatalyie wunyamaṟi-pfo!

⁸ Cha kyipfa Mono-Adamu nyi oe Mndumii o mfiri o onyonya.”

Mndu Awoṙe Kuwoko Kupfiie Ngapfu

⁹ Kawuka pfo, kaiṙa na sinagoginyi lyawo.

¹⁰ Na kuwewoṙe mndu awoṙe kuwoko kupfiie ngapfu. Kyasia kundu waiṙime iwona kyindo kyemmbusia wuwingo wakammbesa, “Nyi sungusinyi ikyiṟa wandu mfiri o onyonya?”

¹¹ Kawawia, “Nyi mndu uha kyiiṙi kyanyu awoṙe ondo lyimwi, na ondo-lyo lyikaoloka mkuwenyi mfiri o onyonya, alechilyiwaṙa nalyikyiṟe?

¹² Ngyesa mndu awoṙe kyiira kying'anyi kuta ondo kafong'ui-pfoe? Kyasia nyi sungusinyi iṟunda mecha mfiri o onyonya.”

¹³ Naaho-ng'u kawia mndu ulya, “Goṟuo kuwoko kopfo.” Kagoṟuo kuwoko, kukochia, kukowaṙa pfinya cha kulya ko kawi.

¹⁴ Kyaindi Mafarisayo walya wakalya wuṟiingyi chandu wechimrumatsa.

Msambuṟe o Ruwa

¹⁵ Na Yesu aicho isho shoose nalewuka pfo; na wandu wafoi wakamwosha; kawakyiṟa woose.

¹⁶ Kawaima walamṟingyishie;

¹⁷ kundu kyiafukyie kyindo kyikyigambe nyi moonguo shisuku Yesaya, echigamba,

¹⁸ “Ambuya, mṟundi oko ngyilemsambuṟa; mkunde oko, mrima oko umchihiye kyipfa kyakye; ngyechimwenenga pfinya ya Mumuyo oko, na oe nechianduya wandu walaiṙikyie Ruwa.

¹⁹ Echiṙeṙa maa ikuilenga na ṟui lyakye-pfo; maa mndu echiicho ṟui lyakye njienyi-pfo.

²⁰ Echituura mndu mfafa-pfo, maa echiinyala ulya alawoṙe kyitarama-pfo, mṟasa naenengye ianduyo wuwinzi.

²¹ Na rina lyakye wandu walaiṙikyie Ruwa wechilyikusuria.”

Yesu na Beelyisebulyi

²² Kyiyeri kyilya kaendio mndu awoṙo nyi mṟufui mmbicho, kyipfupfuṟe kyiwekyeiṙima iṙeṙa; kamkyiṟa, na ulya alaweiṙima iṙeṙa kaṙeṙa na iambuo.

²³ Wuingyi wo wandu wukoṟiyio, wakagamba, “Ichu chi mono-Dawidi-pfoe?”

²⁴ Kyaindi lyilya Mafarisayo waleicho, walegamba, “Ichu naifuna waṟufui wawicho kui pfinya tsa ang'anyi o waṟufui wawicho.”

²⁵ Kyasia Yesu aichi makusaṟo gawo, kawawia, “Wumangyi wukowaṙa wuṟiingyi, kokyewaṙa wukyiwa; ngoseṟa mṟi ang'u kanyi kukowaṙa wuṟiingyi kuwoṙe kyindo kyechiiṙima igoṟoka-pfo.

²⁶ Na Satana kafuna Satana, nakuṟiinga oe amonyi, kyasia wumangyi wokye wochigoṟoka wuṙa?

²⁷ Na inyi ngafuna waṟufui wawicho kui pfinya tsa ang'anyi o waṟufui wawicho, ngyesa wana wanyu wekyefuna waṟufui wawicho kui pfinya tsa wui? Kyipfa kya ikyo iwo nyiwo wechimuanduya.

²⁸ Kyaindi inyi ngafuna waṟufui wawicho kui Mumuyo o Ruwa, kyasia Wumangyi wo Ruwa wommaa icha na konyu.

²⁹ Ang'u mndu neiṙima kuṙa iiṙa na numbenyi ya mndu awoṙe pfinya na imsoka shindo shakye, alapfunga kuwooka icho awoṙe pfinya? Nyi lyo-ng'u echiiṙima iwaṙa numba-yo ko pfinya.

³⁰ Mndu alakyeri hamwi na inyi ekyeoshana na inyi-pfo; na mndu alekyesania hamwi na inyi nekyeola-ola.

³¹ Kyipfa kya ikyo ngammbia, ‘Orio wunyamaṟi na orio ṙeṙo lyelahia Ruwa wandu wechihooṟio, kyaindi ko ilahia Mumuyo wechihooṟio-pfo.

³² Na mndu oose echiṙeṙa Mono-Adamu uwicho nechihooṟio, kyaindi ulya echiṙeṙa Mumuyo Mweele uwicho echihooṟio-pfo.’ ”

Ikyiṙi na Ndunda Tsalyo

³³ “Kundu ikyiṙi lyiwe lyicha kyiwaṟi iwaṙa ndunda ngyicha; kyaindi kokooya nuwoṙe ikyiṙi lyiwicho na ndunda tsechiwiha, cha kyipfa ikyiṙi lyekyemanyika kui ndunda tsalyo.

³⁴ Nyoe maalea ga njoka, moiṙima kuṙa iṙeṙa shindo shicha, mui wawicho? Kyipfa, ṙumbu lya mndu lyekyeṙeṙa shilya shiichuṟie mrima-cho okye.

³⁵ Mndu mcha kyiseyesoenyi kyicha nekyewuta shicha; na mndu mmbicho kyiseyesoenyi kyiwicho nekyewuta shiwicho.

³⁶ Kyasia ngammbia, ‘Orio ṙeṙo lyilawoṙe kyiira, wandu wechilyiṙeṙa, kyiwawaṟi iwia Ruwa kyimaṙuma kyelyiṙeṙa mfiri ulya o furumia.’

³⁷ Kyipfa kui maṙeṙo gapfo nochitalyio wusumganyi, na kui maṙeṙo gapfo nochianduyo.”

Iwesa Kyiṟingyishio

³⁸ Iho walosha wa mawawaso na Mafarisayo waata wakamgaluo, wakagamba, “Mlosha, lukundi iwona kyiṟingyishio kopfo.”

³⁹ Kagaluo kawawia, “Rika lyiwicho lya wuṟui lyipfula kyiṟingyishio, maa lyechienengo kyiṟingyishio-pfo, sile kyiṟingyishio kya moonguo shisuku Yona.

⁴⁰ Kyipfa chandu Yona awekyeri mfiri iṟaṟu kyingoto na kyio ndewunyi ya nyangumi, na wuṙo Mono-Adamu echikaa mfiri iṟaṟu kyingoto na kyio amṟikye terinyi.

⁴¹ Wandu wa Ninawi wechigoṟoka mfiri o ianduyo hamwi na wandu wa rika-lyi. Nawo wechianduya rika-lyi kye lyileṙeko. Kyipfa wo waleṙumbuya wunyamaṟi kui malosho ga Yona; na iha hakyeri ai ang'anyi kuta Yona.

⁴² Mangyi o kyika o ura lo kyaseri nechigoṟoka mfiri o ianduyo hamwi na wandu wa rika-lyi, na oe nechiwaanduya kye waleṙeko. Kyipfa oe nalecha iwuka ngyuura tsa kyishingonyi tsa wuyana kundu naicho wuṟango wo Solomon, na iha hakyeri ai ang'anyi kuta Solomon.”

Mbonyi tsa Mṟufui Mmbicho

⁴³ “Mṟufui mmbicho, ilyi awuka ko mndu, nekyeiṙia handu halawoṙe mṟinga, echipfula handu heonyonya, alawone.

⁴⁴ Na numa nekyegamba, ‘Ngyechiwuya na kanyi koko ngyilewuka.’ Na kacha, kawona numba iya ilawoṙe kyindo, ingyiaie, na ichopo,

⁴⁵ cha ilyi nekyeyenda, kaṙuo handu hamwi na oe waṟufui wengyi wawicho mfungaaṙe wakyeri wawicho kuta oe amonyi, nawo wekyeiṙa na numba na ikaa pfo; na mndu ulya mafurumionyi gakye gekyewiha kuta kulya mawookyionyi. Nyi wuṙo kyechiwa, ko rika-lyi lyii lyiwicho.”

Wana wa Wama wa Yesu na Wamae

⁴⁶ Kyiyeri aweiṙeṙa na wuingyi wo wandu, wamae na wana wa wamae wawegoṟokyi iho nja wakundi iṙeṙa na oe.

⁴⁷ Mndu umwi kammbia, “Womoo na wana wa wama wapfo wagoṟokyi iho nja, wakundi iṙeṙa na iyoe.”

⁴⁸ Kagaluo, kawia mndu ulya alemwendie mbonyi, “Wama oko nyi wui? Na wana wa wama wako nyi wakyi?”

⁴⁹ Kagoṟuya wanalosho wakye kuwoko, kagamba, “Wonenyi wama oko na wana wa wama wako!

⁵⁰ Cha kyipfa orio oose echiṟunda shilya Awu-yoko akyeri ruwewu akundi, ichu nyi oe mono-wama oko, na mshikyi oko, na wama oko.”