Matayo 11 - Kivunjo New Testament 1999

Ndumo ya Yohane Mpatisi

¹ Na Yesu kyiyeri alemarisa iṙeṙa na wanalosho wakye ikumi na wawi, nalendelosha na ionguo mbonyi ngyicha mṟinyi yawo.

² Na Yohane kyiyeri aleicho ipfo kyipfungonyi mawuto ga Kristo, naleṙuma wanalosho wakye, immbesa,

³ “Iyoe nyi ulya aicha, ang'u luweṙelyie ungyi?”

⁴ Yesu kagaluo kawawia, “Yendenyi mundeongoya Yohane shilya mushiicho na ishiwona;

⁵ shipfupfuṟe shienengo iwona, shiwete shichumia, wawoṙo nyi taambo waiyeṟemtso, wapfu maṙwi waiicho, wapfu waiṟutso, na wakyiwa waiongoyo Mbonyi Ngyicha.

⁶ Agusu orio mndu alammbihie kyipfa kyako.”

⁷ Na wanalosho wa Yohane wamuyende, Yesu nalewooka iongoya wuingyi wo wandu mbonyi tsa Yohane. “Mulefuma iyenda nuka iambuya kyikyi? Unyatsi lochiṙeṙemsho nyi mkuma?

⁸ Kyaindi mulefuma indewona kyi? Mndu amṟikye nguwo tsa wusuṟi? Wandu waṟee nguwo tsa wusuṟi wakyeri numbenyi tsa kyimangyi.

⁹ Kyaindi kyitewe mukofuma nyi kyikyi? Nyi iwona moonguo shisuku? Yee loi, ngammbia, na akyeri ang'anyi kuta moonguo shisuku.

¹⁰ Ichu nyi oe shiṟeio shilegamba, ‘Inyi, ngyiṙuma mndu oko mbele ya ushangu lopfo, echisungusia njia yapfo.’ ”

¹¹ Ny'kyaloi, ngammbia kulandewaṙe mndu kyiiṙi kya walya wawafee nyi waka akyeri ang'anyi kuta Yohane Mpatisi-pfo. Kyaindi akyeri mtutu Wumangyinyi wo ruwewu nyi nang'anyi kuta oe.

¹² Wookyia kyiyeri kya Yohane Mpatisi mṟasa wulalu Wumangyi wo ruwewu wokyecha ko pfinya, na iwo wawoṙe pfinya waiwurakuo.

¹³ Cha kyipfa weonguo shisuku na uwawaso waleonguo mṟasa Yohane.

¹⁴ Na kokooya mukundi iiṙikyia, oe nyi oe Elyiya ulya echicha.

¹⁵ Awoṙe maṙwi, naaṙanyie.

¹⁶ “Kyaindi ngyechilyingatsana na kyi rika-lyi? Lyikyeri cha wana wekyeṙamia sangaṙa, wekyelaga oṙiawo, wechigamba,

¹⁷ ‘Lulekapa mtoṟiṟo kyipfa kyanyu, maa muletema-pfo; lulekapa ṟanyi maa mulawoṙo nyi wukyiwa.’

¹⁸ Kyipfa Yohane nalecha, alailya maa alainyo, wakagamba, ‘Nawoṙo nyi mṟufui mmbicho.’

¹⁹ Mono-Adamu nalecha, echilya na inyo, wakagamba, ‘Ichu nawoṙe ndewu, nyi mnanzi, mbuya ya wesania ukamba na wanyamaṟi!’ Na wuṟango wo Ruwa wochimanyika kui shindo wuṟango-wo wuiṟunda.”

Mṟi Ilawoṙe Iiṙikyia

²⁰ Naaho-ng'u kawooka iṙeṙia mṟi iya kyiiṙi kyayo kuleṟundika shiṟiyisho shakye shifoi, kyipfa ileṙumbuya wunyamaṟi-pfo.

²¹ “Ochia lopfo, Korasini! Ochia lopfo Betisaida! Kyipfa cha kokooya shiṟiyisho shilewutika konyu shilewutika kulya Tiro na Sidon wawechiṙumbuya wunyamaṟi kyiyeri kyileshi kyileiṙa kui iṟaa masaṟa na ikushia ifui.

²² Kyaindi ngammbia, kyechiwa kyaangu Tiro na Sidon ikarishia ngapo tsawo mfiri o ianduyo kuta nyoe.

²³ Na iyoe Kaperinaumu, ngyesa noching'anyiso mṟasa ruwewu? Nochisotso mṟasa ko waṟumu cha kyipfa shiṟiyisho shilewutika kopfo shiwechiwutika kulya Sodoma, mṟi-cho uwechiṙio ho mṟasa inu.

²⁴ Kyaindi ngammbia, kyechiwa kyaangu ko uruka lo Sodoma ikarishia ngapo yalo mfiri o ianduyo kuta iyoe.”

Ionyonya ko Yesu

²⁵ Kyiyeri kyilya Yesu kagaluo, kagamba, “Ngakuana, Awu, Mndumii o ruwewu na uruka, kyipfa shindo-shi ulekunda ishitambuluya wawoṙe wuṟango-pfo, kyaindi kotambuluya wana watutu.

²⁶ Yee, loi, Awu, kyipfa nyi wuṙo kyilechihiṟa mbele yapfo.”

²⁷ Kagamba, “Ngyimṙambikye shoose na Awu-yoko, maa kuwoṙe aichi Mana, sile Awu-pfo; maa kuwoṙe aichi Awu, sile Mana-pfo, na orio oose ulya Mana akunda imtambuluya.

²⁸ Nnjonyi na koko, nyoe moose muiwina na muwalemie nyi maṟio, na inyi ngyechimuonyonyisha.

²⁹ Waṙilyienyi iṟunda-lyi ngyimṙambika, mukuloshe koko; kyipfa inyi ngyimhoo na muindi mrimenyi; na nyoe mochiwaṙa ufoṟo mrimenyi konyu.

³⁰ Cha kyipfa kyilya ngyimmbia kyikyicha konyu, na ṟio ngyimṙika lyilyiangu.”