Mariko 8 - Kivunjo New Testament 1999

Iigutsa Wandu Shiku Shiina

¹ Mfiri iya, chandu wuingyi wulya wo wandu wuweng'anyi-se nawo wauṟa kyindo kyelya, kalaga wanalosho wakye, kawawia,

² “Ngawonia wuingyi-wu wo wandu wukyiwa cha kyipfa nyi mfiri iṟaṟu wakyeri na inyi, maa wawoṙe kyindo kyelya-pfo;

³ na inyi ngawasama wayende kanyi kowo na kunu wakuretekyie, wechioloka njienyi; na waata wawukyie kuleshi.”

⁴ Wanalosho wakye wakamgaluo, “Ngyesa mndu neiṙima kuṙa iigutsa iwa kui mkate iha nuka?”

⁵ Kawawesa, “Muwoṙe mkate inga?” Wakagamba, “Mfungaaṙe.”

⁶ Kagamba wuingyi wo wandu waṙamie wanda. Kaira mkate iya mfungaaṙe, kaana, kaipeṟenguo, kaenengyia wanalosho wakye wawagawie; wakagawia wuingyi wulya wo wandu.

⁷ Wawewoṙe shipere shaangu; kashiwikyia mboṟa, kagamba wagawio na isho taa.

⁸ Wakalya, wakaiguṙa, wakasania matsugaṟo ga shipeṟengu sha mkate, mkunja mfungaaṙe ikaichuo.

⁹ Na wandu walelya waweshikyie shiku shiina. Kawasama.

¹⁰ Cha ilyi kaṙooya ngalawenyi hamwi na wanalosho wakye, kayenda mṟasa ura lo Dalyimanuta.

Mafarisayo Wakawesa Kyiṟingyishio

¹¹ Mafarisayo wakacha, wakawooka igaluana na oe; wechipfula kokye kyiṟingyishio kyiwukyie ruwewu; wechimyesha.

¹² Kawona fowa mrimenyi kokye, kagamba, “Ny'kyilyi rika-lyi lyipfula kyiṟingyishio? Ny'kyaloi, ngammbienyi, rika-lyi lyechienengo kyiṟingyishio kyiwukyie ruwewu-pfo.”

¹³ Kalekana nawo, kaṙooya-se ngalawenyi, kayenda mṟasa molyolya.

Chachu ya Mafarisayo na ya Herode

¹⁴ Wakawaṙima iṙuo mkate, maa ngalawenyi wawewoṙe kyindo sile mkate umwi tupu-pfo.

¹⁵ Kawaikyimbia, kagamba, “Kushowenyi na chachu ya Mafarisayo na chachu ya Herode.”

¹⁶ Wakagaluana wo wenyi ko wenyi, cha kyipfa walawewoṙe mkate.

¹⁷ Na Yesu kamanya, kawawia, “Ny'kyilyi muigaluana kyipfa mulawoṙe mkate? Maa mulandemanye-pfoe? Ngyesa mrima yanyu nyi ingyiumu?

¹⁸ Muwoṙe meso, muwonyi-pfo. Muwoṙe maṙwi, muichuoe-pfoe? Maa mukumburie-pfoe?

¹⁹ Kyiyeri ngyilepeṟenguo mkate iya itanu na ienengyia walya shiku shitaanu, muleira mkunja inga iichuo shipeṟengu?” Wakammbia, “Ikumi na iwi.”

²⁰ “Na iya mfungaaṙe ienengyia walya shiku shiina, muleira mkunja inga iichuo shipeṟengu?” Wakammbia, “Mfungaaṙe.”

²¹ Kawawia, “Mulandemanye-pfoe?”

Ikyiṟo lya Kyipfupfuṟe kya Betisaida

²² Wakashika Betisaida, wakamwendie kyipfupfuṟe wakamterewa nakyipaaye.

²³ Kawaṙa kyipfupfuṟe kyilya kuwoko, kakyiṙuo nja ya kyikaṟo, kakyipuchia maṙa mesonyi, kakyiyekyia mawoko, kakyiwesa, “Nuwonyi kyindo?”

²⁴ Kyikaambuya wuye, kyikagamba, “Ngyiwonyi wandu cha mashiṙi, gaiyenda.”

²⁵ Naaho-ng'u kawika-se mawoko gakye wuye ya meso gakyo, nakyo kyikaambuya mnu; kyikachia, kyikawona shoose na pata.

²⁶ Kakyiwia kyiyende kanyi, echigamba, “Maa kyikaṟonyi ulaiṙe napfo.”

Iṟingyishia lya Petiro

²⁷ Yesu kafuma na wanalosho wakye, wakayenda shikaṟonyi sha Kaisaria-Filyipi na njienyi kawesa wanalosho wakye, kagamba, “Wandu wekyegamba kye inyi nyi wui?”

²⁸ Wakamgaluo, “Yohane Mpatisi; wengyi Elyia; wengyi, umwi o waikyimbi.”

²⁹ Na oe kawawesa, “Na nyoe muigamba kye inyi nyi wui?” Petiro kamgaluo, kammbia, “Iyoe nyi oe Kristo.”

³⁰ Kawatutuma walawie mndu mbonyi tsakye.

Mbonyi tsa Matuuro na Upfu lo Yesu

³¹ Kawooka iwalosha kye Mono-Mndu nawaṟi iwona matuuro gafoi, na ilego nyi wasongoru, na wang'anyi wa makohanyi, na walosha wa mawawaso, na iwoogo, na numa ya mfiri iṟaṟu iṟuka.

³² Na oe naweionguo mbonyi-tso na pata. Petiro kamṙuo, kawooka imṙeria.

³³ Kagaluka, kaambuya wanalosho wakye, kaṙeṙia Petiro, kagamba, “Wuka koko, Satana; kyipfa uikusaṟa shii sha Ruwa-pfo, indi sha wandu.”

³⁴ Kalaga wuingyi wo wandu hamwi na wanalosho wakye, kawawia, “Mndu oose akundi ingyiosha nakulege amonyi, nakuṙikye msalaba okye, nangyioshe.

³⁵ Cha kyipfa mndu akundi ikyiṟa moo okye, nechiuṙetsa, na mndu echiṙetsa moo okye kyipfa kyako na kyipfa kya Ndumi Ngyicha, ichu nechiukyiṟa.

³⁶ Cha kyipfa mndu nechiiria ho kyi iwona wuyana woose, echiṙetsa mrima okye?

³⁷ Ang'u mndu naenengyie kyi handu ha moo okye?

³⁸ Kyipfa orio mndu echirigo nyi sonu kyipfa kyako, na malosho gako, kyiiṙi kya rika-lyi lya wuṟui na wunyamaṟi, Mono-Adamu nechirigo nyi sonu kyipfa kya mndu-cho, kyiyeri echicha mng'anonyi o Awu okye hamwi na malaika waele.”