Mariko 3 - Kivunjo New Testament 1999

Mndu Awoṙe Kuwoko Kupfiie Ngapfu

¹ Kaiṙa-se na sinagoginyi; napfo kuwewoṙe mndu awoṙe kuwoko kupfiie ngapfu.

² Wakamwowelyia kundu wawone kokooya nemkyiṟa mfiri o onyonya; waiṙime imṙuo mengyenyi.

³ Kawia ulya awoṙe kuwoko kupfiie ngapfu “Goṟoka makyiṙi-gawi.”

⁴ Kawawesa, “Nyi sungusinyi mfiri o onyonya iwuta shicha ang'u iwuta shiwicho? Ikyiṟa mrima ang'u iuwaaga?” Wakatsia.

⁵ Kawaitukuya ngyuura tsoose ko nyashi, echiwoṙo nyi fowa mrimenyi kyipfa kya wuumu wo mrima yawo. Kawia mndu ulya, “Goṟuo kuwoko kopfo.” Na oe kagoṟuo kuwoko; kuwoko kokye kukowaṙa-se pfinya.

⁶ Cha ilyi Mafarisayo walya wakayenda, wakachila mbonyi tsakye hamwi na Maherodi, chandu wechimrumatsa.

Wuingyi wo Wandu Mbai ya Ipalyipalyi

⁷ Na Yesu kakaa kuleshi, oe na wanalosho wakye, kayenda ipalyipalyinyi. Wuingyi wung'anyi wo wandu wukomwosha, iwuka Galyilaya na Uyuda,

⁸ na Yerusalemu, na Idumaya, na molyolya o Yoridan, na ngyuura tsa Tiro na Sidon. Wuingyi wung'anyi wo wandu kyiyeri waleicho mbonyi tsoose tsa shindo awekyeri iṟunda, wakayenda kokye.

⁹ Kawia wanalosho wakye kye kyingalawa kyitutu kyikae kufuhi na oe, kundu wuingyi wo wandu wulampeṟeetse.

¹⁰ Cha kyipfa nalekyiṟa wafoi, mṟasa woose wawewoṙe ngyuukyiwa wakamraia waiṙime impaaya.

¹¹ Na waṟufui wawicho, orio kyiyeri walemmbona, waleoloka mbele yakye, wakafuga, wechigamba, “Iyoe nyi oe Mono-Ruwa.”

¹² Kawaima mnu walamṟingyishie.

Isambuṟo lya Wanalosho Ikumi na Wawi

¹³ Kaṙooya fumvunyi, kalaga walya alekunda oe amonyi; wakayenda kokye.

¹⁴ Kawika wandu ikumi na wawi, waiṙime iwa hamwi na oe, na nawaṙume ionguo Mbonyi Ngyicha.

¹⁵ Ngoseṟa wawe na wuchilyi wo iwuta waṟufui wawicho.

¹⁶ Kawika walya ikumi na wawi. Simion kamlaga Petiro;

¹⁷ na Yakobo kamlaga mono-Sebedayo, na Yohane, mono-wama o Yakobo, kawalaga Bonerikye, kyimwi na igamba, wana wa ikuṟuṟuma.

¹⁸ Na Anderea, Filyipo, Baritolomayo, Matayo, Tomasi, Yakobo o Alyifayo, Tadayo, na Simion Mkananayo.

¹⁹ Na Yuda Isikariote, nyi oe alemṟiinga.

Yesu na Beelyisebulyi

²⁰ Numa ya iho kayenda kanyi. Wuingyi wung'anyi wo wandu wukosanza-se, mṟasa Yesu na wanalosho wakye walaiṙime maa ilya mkate.

²¹ Wandu wakye kyiyeri waleicho mbonyi wakafuma indemmbaṙa; kyipfa walegamba, “Nasuko.”

²² Na walosha wa mawawaso walesoka iwuka Yerusalemu wakagamba, “Nawoṙe Beelyisebulyi, na kui ang'anyi o waṟufui wawicho naiwuta waṟufui wawicho.”

²³ Kawalaga, kawawia kui mfano, “Satana neiṙima kuṙa ifuna Satana?

²⁴ Na wumangyi wukokuṟiinga wumonyi, wochiiṙima igoṟoka-pfo.

²⁵ Na kanyi kukokuṟiinga kumonyi, kanyi-ko koiṙima igoṟoka-pfo.

²⁶ Na kokooya Satana afuma kakapana na mrima okye amonyi, kakuṟiinga, eiṙima igoṟoka-pfo, indi neshika mafurumionyi.

²⁷ Mndu echiiṙima iiṙa na numbenyi ya mndu awoṙe pfinya, na imsoka shindo shakye, sile apfunga kuwooka ulya awoṙe pfinya, naaho-ng'u echiṙuo ko pfinya numba yakye.

²⁸ Ny'kyaloi ngammbia, wandu wechihooṟio ngyuunyamaṟi tsoose, na ilahia Ruwa lyawo lyoose;

²⁹ indi mndu echilahia Mumuyo Mweele echihooṟio mṟasa mlungana-pfo; kyaindi nechiwaṙa ṙeko lyilechisia”;

³⁰ kyipfa kya ilyi walegamba, “Nawoṙo nyi mṟufui mmbicho.”

Mama o Yesu na Wana wa Wamae

³¹ Wamae na wana wa wamae wakacha; wakagoṟoka nja, wakaṙuma mndu imlaga.

³² Na wuingyi wo wandu waweṙamie, wechimwiṟiwia; wakammbia, “Ambuya, womoo na wana wa wama wapfo wai iho nja, waikupfula.”

³³ Kawagaluo, echigamba, “Wama oko na wana wa wama wako nyi wakyi?”

³⁴ Kaambuya walya waweṙamie wamwiṟiwie ngyuura tsoose, kagamba, “Ambuya wama oko na wana wa wama wako!

³⁵ Cha kyipfa orio mndu echiṟunda shilya Ruwa akundi, icho nyi oe mono-wama oko, na mshikyi oko, na wama oko.”