Mariko 14 - Kivunjo New Testament 1999

Kyama Kyewaaga Yesu

¹ Numa ya mfiri iwi kuwekyeri mfiri ung'anyi o Pasaka na mkate ilawengyitarang'ishe wang'anyi wa makohanyi na walosha wa mawawaso wakapfula njia ya immbaṙa kui ngyeṟo na immbaaga.

² Cha kyipfa walegamba, “Kyilacheewa kyiyeri kya mfiri ung'anyi, kulachewaṙa kyituṟu wandunyi.”

Ishio Mafuṙa Kulya Betania

³ Na oe kyiyeri awekyeri Betania, kanyi ko Simion awewoṙo nyi taambo, echilya kyelya, mndu mka awoṙe kyimkyepe kya mafuṙa mecha ga woguru wung'anyi kacha, kapfunuo kyimkyepe kyilya kagaletsia mṙoenyi kokye.

⁴ Hawewoṙe na wandu walesuo wechigamba, “Kyitewe nyi kyikyi iṙetsa mafuṙa mecha ga woguru wung'anyi mbaṟe-i iyi?

⁵ Cha kyipfa mafuṙa-ga gaweiṙima ikumbo ko dinari magana gaṟaaṟu na ngoseṟa, wakyiwa wakaenengo. Wakanuṟia mnu kyipfa kya mka ulya.”

⁶ Yesu kagamba, “Mlekyenyi. Ny'kyilyi mumlyisa wukyiwa? Nangyiṟundia kyindo kyicha.

⁷ Kyipfa mfiri yoose muwoṙe wakyiwa hamwi na nyoe, na orio kyiyeri mukokunda moiṙima iwaṟundia mecha; kyaindi inyi mungyiwoṙe mfiri yoose-pfo.

⁸ Naṟunda chandu aiṙima. Nasonguo ishia mmbiu oko mafuṙa mecha kyipfa kya iṟiko.

⁹ Ny'kyaloi, ngammbia, orio kyiyeri Ndumi Ngyicha yaongoyo wuyanenyi koose, ikyi ichu aṟunda kyechisendo imkumbuo.”

Iiṙikyia lya Yuda Iṟiinga Yesu

¹⁰ Yuda Isikariote, umwi o walya ikumi na wawi, kayenda mṟasa ko wang'anyi wa makohanyi, naiṙime imṟiinga kowo.

¹¹ Nawo kyiyeri waleicho walechihiyo, wakateṟia imwenenga heleri. Kapfula kyiyeri kyicha kyemṟiinga.

Ilya Pasaka na Wanalosho

¹² Na mfiri o kuwooka o mkate ilangyitarang'ishe kyiyeri waleshinja shimana sha moondo ga Pasaka, wanalosho wakye wakammbia, “Nyi kwi ukundi luyende lukuṟeyeṟie ulye pasaka?”

¹³ Kaṙuma wawi kyiiṙi kya wanalosho wakye, kawawia, “Yendenyi mṟinyi, mndu msoṟo akuṙikyie kyigondi kya mṟinga nechikarisana na nyoe, muoshenyi.

¹⁴ Na handu hoose echiiṙa naho wienyi monyi kanyi, ‘Mlosha nagamba, nyi hanga kyiṟi kyako kya wayenu kyikyeri, ngyilyiie pfo pasaka, hamwi na wanalosho wako?’

¹⁵ Na oe amonyi nechimloṟa, kai ing'anyi, ingyichope, ipfo luṟeyeṟienyi.”

¹⁶ Wanalosho wakafuma, wakayenda mṟinyi, wakawona chandu alewawia, wakaṟeyeṟa pasaka.

¹⁷ Kyasia kyiyeri kuleila Yesu kacha hamwi na walya ikumi na wawi.

¹⁸ Kyiyeri waweilya, Yesu nalegamba, “Ny'kyaloi, ngammbia, umwi onyu, na oe nailya hamwi na inyi nechingyiṟiinga.”

¹⁹ Wakawooka iwona fowa mrimenyi, wakammbia umwi umwi, “Ngyesa, nyi inyi?”

²⁰ Kawawia, “Nyi umwi o iwo ikumi na wawi, aikapa itongye hamwi na inyi kyitelenyi.

²¹ Cha kyipfa Mono-Mndu naindepfa chandu shiṟeio shigambie; kyaindi ochia lokye mndu ulya echiṟiinga Mono-Mndu! Kyiwechiwa nanga kokye mndu-cho alawefeo.”

Kyilaayo kya Mndumii

²² Nawo kyiyeri waweilya, kaira mkate, kawikyia mboṟa, kaupeṟenguo, kawaenenga, kagamba, “Ambilyienyi; ichu nyicho mmbiu oko.”

²³ Kaira kyiṙoo, kaana, kawaenengyia; wakaikanana kyiṙoo kyilya woose.

²⁴ Kawawia, “Iyi nyiyo samu yako ya mma, ipusuka kyipfa kya wafoi.

²⁵ Ny'kyaloi, ngammbia nyoe, ngyechinyo-se mpfinyo-pfo, mṟasa mfiri ulya ngyechiunyo uhya Wumangyinyi wo Ruwa.”

²⁶ Nawo wamuimbe walefuma iyenda fumvunyi lya mashiṙi ga mseituni.

Ikusaṟa lya Yesu kye Yuda Nechimkana

²⁷ Yesu kawawia, “Kyio-kyi nyoe moose mochiṙicha mungyiṙe ngyimonyi, cha kyipfa kyikyiṟeie, ‘Ngyechikapa mlyisi, na moondo gechinyanyaṟika.’

²⁸ Kyaindi numa ya iṟuka lyako, ngyechimusongoya iyenda Galyilaya.”

²⁹ Petiro kammbia, “Wechiṙicha woose, kyaindi chi inyi-pfo.”

³⁰ Yesu kammbia, “Ny'kyaloi, ngakuwia iyoe, inu, kyio-kyi, ilying'onyi lyilafuga kawi, nochingyikana kaṟaaṟu.”

³¹ Na oe kaengyeṟa mnu igamba, “Maa kyikangyikooya ipfa na iyoe, ngyechikukana maa ale-pfo.” Na woose wakawegamba kuṙo.

Iterewa lya Yesu Kulya Getisemane

³² Numa ya iho wakacha mṟasa bustanyi yekyelago Getisemane; kawia wanalosho wakye, “Ṙamienyi iha kyiyeri-kyo ngyiterewa.”

³³ Kaṙuo Petiro na Yakobo na Yohane hamwi na oe, kawooka iiṟewe mnu na ikutuura.

³⁴ Kawawia, “Mrima oko uiṟewe cha mndu aipfa. Kaenyi iha mulae kyiṙombo.”

³⁵ Katikyira mbele kyitutu, kaoloka wanda, echiterewa kye, kyikaiṙimika, saa iya ya matuuro immbukye.

³⁶ Kagamba, “Awu, Awu-yoko, shoose shekyeiṙimika kopfo. Ungyiwute matuuro-ga; kyaindi, chi chandu ngyikundi inyi-pfo, indi chandu ukundi iyoe.”

³⁷ Kacha kawakooya walee maṙoe, kawia Petiro, “Ngyesa, Simion, nulee? Oiṙima ilaa kyiṙombo maa saa imwi-pfoe?

³⁸ Laenyi kyiṙombo muterewe, mulacheyesho. Mrima ukundi indi mmbiu umfafa.”

³⁹ Kayenda-se, katerewa, echigamba kyindo kyilya kyilya.

⁴⁰ Kacha-se kawakooya walee, kyipfa meso gawo gawa malemeri, maa walamanye kyemgaluo.

⁴¹ Kacha lya kaṟaaṟu, kawawia, “Laenyi wulalu, muonyonye. Kyishikyie. Saa yamcha. Ambuya, Mono-Adamu naiwiko mawokonyi ga wandu wawoṙe wunyamaṟi.

⁴² Amkyenyi, sindenyi. Ambuya ulya aingyiṟiinga amshika kufuhi.”

Iwoṙo lya Yesu

⁴³ Kyasia kyiyeri aweiṙeṙa, cha ilyi Yuda nalecha, umwi o walya ikumi na wawi, na hamwi na oe ṟiima lya wandu, wawoṙe ngyuushu na maṟeta, wawukyie ko wang'anyi wa makohanyi, na walosha wa mawawaso, na wasongoru wa wandu.

⁴⁴ Na ulya momṟiinga nalekoawaenenga kyiṟingyishio, echigamba, “Icho ngyechimkomba, icho nyi oe; mmbaṙenyi, mumṙuo mochimringa.”

⁴⁵ Kyasia kyiyeri alecha, cha ilyi kayenda kokye, kagamba, “Rabi,” kamkomba.

⁴⁶ Wakagoṟuo mawoko gawo wakammbaṙa.

⁴⁷ Na umwi o walya wawekyeri ho kaira ushu, kakapa mtumo o Mkohanyi ang'anyi kuta woose, kamṙumbuo kurwi.

⁴⁸ Yesu kagaluo, kawawia, “Ngyesa, nyi cha msokyi mofuma muwoṙe ngyuushu na maṟeta, ingyiwaṙa inyi?

⁴⁹ Orio mfiri ngyiwekyeri mbele yanyu hekalunyi ngyechilosha, mulangyiwaṙe; kyaindi ishi shawa kundu shiṟeio shiiṙime iafukyia.”

⁵⁰ Naaho-ng'u wakamṙa, wakaṙicha woose.

⁵¹ Na manakye umwi kamwosha, alaṟee kyindo sile iwale lya uwiṟo, wakammbaṙa.

⁵² Na oe kaṙa iwale lyilya, kaṙicha ai kyiṟanguoe.

Yesu Mengyenyi

⁵³ Nawo wakaṙuo Yesu ko Mkohanyi ang'anyi kuta woose wakakuumbia kufuhi na oe, wang'anyi wa makohanyi na wasongoru wa wandu na walosha wa mawawaso.

⁵⁴ Na Petiro kamwosha akyeri kuleshi, mṟasa numbenyi ya Mkohanyi ang'anyi kuta woose; kaṙamia hamwi na waṟundi, echioṙa moṙo.

⁵⁵ Kyasia wang'anyi wa makohanyi na woose halya mengyenyi wakapfula wuṟingyishi waiṙime iwaaga Yesu; walawone.

⁵⁶ Cha kyipfa wafoi walemṟingyishia wongo, kyaindi wuṟingyishi wowo wulaṙuane.

⁵⁷ Mṟasa wengyi wakagoṟoka, wakamṟingyishia wongo, wechigamba,

⁵⁸ “Soe lulemwicho echigamba, ‘Inyi ngyechiunduo hekalu-lyi lyilyiachikyie kui mawoko, na kyiiṙi kya mfiri iṟaṟu ngyechiwika lyingyi lyilalyiachikyie kui mawoko.’ ”

⁵⁹ Maa kuṙo wuṟingyishi wowo wuleṙuana-pfo.

⁶⁰ Naaho-ng'u Mkohanyi ang'anyi kuta woose kagoṟoka makyiṙi-gawi, kawesa Yesu, echigamba, “Ugaluo kyindo? Iwa waikuṟingyishia kyi?”

⁶¹ Kyaindi katsia tsi, maa alegaluo kyindo-pfo. Mkohanyi ulya ang'anyi kuta woose kammbesa-se kammbia, “Iyoe nyi oe Kristo, Mana o ulya awoṙe mng'ano?”

⁶² Yesu kagamba, “Inyi nyi oe, na nyoe mochiwona Mono-Adamu aṙamie kuwoko ko kulyoe ko Ruwa monyi pfinya, echicha na mapuchi ga ruwewu.”

⁶³ Mkohanyi ulya ang'anyi kuta woose karanduo mawale gakye, echigamba, “Kuwoṙe-se kyimaṙuma kya kyikyi ipfula waṟingyishi?

⁶⁴ Momuicho chandu alahia Ruwa. Muwonyi kuṙa nyoe?” Woose wakamwanduya kye kyimmbaṟi iwoogo.

⁶⁵ Wengyi wakawooka impuchia maṙa, wakamshikyia kyaam, na imkapa nzina, na immbia, “Lasha. Maa waṟundi nawo wakamkapa ngofi.”

Petiro Kakana Yesu

⁶⁶ Na Petiro nawekyeri halya-ndu aweioṙia moṙo. Umwi o shisinga sha Mkohanyi ang'anyi kuta woose kacha,

⁶⁷ kawona Petiro eoṙa moṙo kamwitukuya, kagamba, “Maa iyoe nuwekyeri hamwi na Yesu, Mnasareti ulya.”

⁶⁸ Kakana kagamba, “Ngyiichi maa ngyimanya isho ugamba iyoe-pfo.” Kafuma na nja, ilying'onyi lyikafuga.

⁶⁹ Na kyisinga kyilya kyikammbona-se, kyikawooka-se iwia walya wawegoṟokyi halya, “Ichu nyi umwi owo.”

⁷⁰ Kakana-se. Numa ya kyiyeri kyifuhi-se walya wawegoṟokyi halya wakawia Petiro, “Loi nui umwi owo, cha kyipfa iyoe nui Mgalyilaya.”

⁷¹ Kawooka ilya nyamu, “Ngyiichi mndu-chu mumsenda-pfo.”

⁷² Na cha ilyi ilying'onyi lyikafuga lya kawi. Petiro kakumbuo kyindo kyilya alewio nyi Yesu, “Ilying'onyi lyilafuga kawi, nochingyikana kaṟaaṟu.” Na kyiyeri alekusaṟa kyipfa kya ṙeṙo-lyo, kalyia.