Mariko 13 - Kivunjo New Testament 1999

Mbonyi tsa Irumatso lya Hekalu

¹ Na kyiyeri aweiwuka hekalunyi, umwi o wanalosho wakye nalemmbia, “Mlosha, ambuya, chandu magoe-ga na numba-tsi shikyeri!”

² Yesu kagaluo, kammbia, “Uwonyi manumba-ga gang'anyi? Hechitsugaa igoe wuye ya igoe lyilechiolotso-pfo.”

Ilyiso Ngyuukyiwa

³ Na kyiyeri aweṙamie fumvunyi lya mashiṙi ga mseituni; iambuyana na hekalu, Petiro, na Yakobo, na Yohane, na Anderea walemmbesa handu halawoṙe wandu,

⁴ “Luwie, mbonyi-tsi tsechiwa indi? Na nyi kyikyi kyiṟingyishio kya kyiyeri, isho shoose shechiwa kufuhi iafukyia?”

⁵ Yesu kawooka iwawia, “Kuṟiisenyi, mndu alamlembe.

⁶ Wandu wafoi wechicha kui rina lyako, wechigamba, ‘Inyi nyi oe Kristo’, nawo wechilemba wafoi.

⁷ Na nyoe kyiyeri mochiicho mbonyi tsa shiṙa, na iweweṙo lya shiṙa mulakangaṟikye. Isho shiwaṟi iwoneka, kyaindi mafurumionyi galya galandeche-pfo.

⁸ Cha kyipfa isanga lyechiamka ikapana na isanga, na wumangyi ikapana na wumangyi. Kochiwaṙa shiṙiinza handu kui handu na kochiwaṙa njaa. Igo nyigo mawookyionyi ga iwawio lying'anyi.

⁹ “Na nyoe kuṟiisenyi mrima yanyu. Kyipfa wechimṙuo nyoe mengyenyi; na masinagoginyi wechimkapa; na nyoe mochiṙoo mbele ya wachilyi na wamangyi kyipfa kyako, iwa wuṟingyishi kowo.

¹⁰ Na kyiwaṟi Ndumi Ngyicha iongoyo kuwooka masangyenyi koose.

¹¹ Na kyiyeri wechimsuo nyoe, na imṟiinga, mulakusaṟe kuwooka shilya mochigamba, kyaindi orio kyindo mochienengo saa iya, kyigambenyi cha kyipfa chi nyoe muiṙeṙa-pfo, indi nyi Mumuyo Mweele.

¹² Na mndu nechiṟiinga mono-wamae kundu nawoogo, na awu nechiṟiinga mana, na wana wechigalukyia wafee wawo, na iwawaaga.

¹³ Na nyoe mochiwa muwasuoe nyi wandu woose kyipfa kya rina lyako; kyaindi mokarishia mṟasa mafurumionyi, nyi oe echikyia.”

Irumatso Lyioweshie

¹⁴ “Kyaindi mukowona ulya aoweshie, na ekyenyamaṟa shindo shiele agoṟokyi handu halawaṟi, (aisoma namanye), nyi lyo-ng'u wakyeri urukyenyi lo Uyuda waṙichilyie mafumvunyi.

¹⁵ Na mndu akyeri kai alasokye pfo, maa alaiṙe na kanyi kokye iṙuo kyindo.

¹⁶ Na akyeri mṙemenyi alawuye na numa iṙuo ikunya lyakye.

¹⁷ Kyaindi ochia lowo iwo wai wanene, nawo waionza mfiri-yo!

¹⁸ Indi terewenyi isho shilawutikye kyiyeri kya mbeho.

¹⁹ Cha kyipfa mfiri-yo yechiwaṙa wukyiwa, chandu kyilandewe wookyia mawookyionyi ga Ruwa igumba mṟasa wulalu, maa kyechiwa maa ale-pfo.

²⁰ Na kokooya Mndumii alalefuiṟa mfiri-yo mndu oose awechikyia-pfo; kyaindi kyipfa kya wasambuṟe alewasambuṟa nalefuhiṟa mfiri-yo.

²¹ Na kyiyeri-kyo mndu kammbia, ‘Kristo nakyeri iha’, ang'u ‘nakyeri kulya’, maa mulaiṙikyie.

²² Cha kyipfa kochiwoneka Makristo ga wongo, na weonguo shisuku wa wongo, wechiloṟa shiṟingyishio na maṟiyisho, waiṙime imlemba, kokooya kyaiṙimika, maa iwo wasambuṟe.

²³ Indi nyoe kuṟiisenyi; ngamumuikyimbia shoose.”

Icha lya Mono-Adamu

²⁴ “Kyaindi mfiri iya, numa ya wukyiwa-wo, mnengyeṟi oshikyio nyi meema, na mori ochiwuta ngyeela yacho-pfo,

²⁵ na nyenyeri tsa ruwewu tsechioloka, shindo shingyi shikyeri ruwewu shechikupaaya-paya.

²⁶ Iho nyilyo wechiwona Mono-Adamu echicha mapuchinyi kui pfinya tsifoi na mng'ano.

²⁷ Nyilyo echiṙuma malaika na isania wasambuṟe wakye iwuka ngyuura tsoose tsiina tsa wuyana, iwuka ura lo kyishingonyi kya uruka mṟasa matsitsionyi ga ruwewu.”

Malosho ga Mfumu

²⁸ “Ko mfumu kuloshenyi mfano. Kyiyeri mbaga yacho yawiṟa-wiṟa, na ioṟia maṟa, mokyemanya kye kyiyeri kya kyilyimu kyikyeri kufuhi.

²⁹ Na nyoe taa, mukowona mbonyi-tso tsewooka, manyenyi kye nai kufuhi moongonyi.

³⁰ Ny'kyaloi, ngammbia, rika-lyi lyechiiṙa-pfo, mṟasa isho shoose shiafukyie.

³¹ Ruwewu na uruka shechiiṙa; kyaindi maṙeṙo gako gechiiṙa maa ale-pfo.”

Kuwoṙe Aichi Mfiri maa Saa-pfo

³² “Kyaindi mbonyi tsa mfiri ulya na saa iya kuwoṙe aichi-pfo, maa malaika wakyeri ruwewu, maa Mana, sile Awu.

³³ Ambuyenyi necha, laenyi kyiṙombo, terewenyi, cha kyipfa muichi kyiyeri kyechiwa indi-pfo.

³⁴ Mfano okye nyi cha mndu aiyenda kyaro, kawia watumo wakye waambuye numba yakye, na ienenga orio mndu iṟunda lyakye, na oe kawia mringyi o moongonyi nalae kyiṙombo.

³⁵ Kyasia, laenyi-ng'u kyiṙombo, cha kyipfa muichi kyiyeri monyi kanyi aicha-pfo, kye nyi kyukonyi, ang'u kye nyi kyio kya mayeleyele, ang'u kyiyeri ilying'onyi lyifuga, ang'u ngamenyi;

³⁶ alache kyituukyia namukooye mulee.

³⁷ Na ikyo ngyimmbia nyoe, ngammbia moose, laenyi kyiṙombo.”