Mariko 12 - Kivunjo New Testament 1999

Mfano o Waṙemi

¹ Kawooka iṙeṙa nawo kui mfano. “Mndu umwi naleṙonga ṙema lya msabibu, karingyichia uṟigo, kasuma rina lyekamia mafuṙa, kawika kyitaanga, kagawia waṙemi, kayenda kyaro.

² Na kui kyiyeri kyakye kaṙuma mtumo ko waṙemi walya, kundu naambilyie ko waṙemi ndunda tsa msabibu.

³ Wakammbaṙa, wakamkapa, wakammbiyitsa nja, alawoṙe kyindo.

⁴ Kawaṙumia-se mtumo ungyi, na oe wakamfaṟa mṙoenyi, wakammbutia shindo shiwicho.

⁵ Kaṙuma ungyi, icho wakammbaaga; na wengyi wafoi, iwa wechiwakapa na iwa wechiwawaaga.

⁶ Kyasia nawewoṙe umwi-se, mana mkunde okye. Ichu na oe kamṙuma kowo mafurumionyi, echigamba, ‘Wechiindia mono-ko.’

⁷ Kyaindi waṙemi walya wakawiana, ‘Ichu nyi mokyioṟa, lummbaage, na kyioṟa kyechiwa kyaṙu.’

⁸ Wakammbaṙa, wakammbaaga, wakammbiyitsa nja ya ṙema lya msabibu.

⁹ Kyasia monyi ṙema lya msabibu newuta kyi? Neecha na irumatsa waṙemi walya, na ṙema lyilya lya msabibu neenengyia wengyi.

¹⁰ Maa mulandesome shiṟeionyi shiele, ‘Igoe wewika numba walelyilega lyo lyawa igoe lying'anyi lya ndumbenyi.

¹¹ Ṙeṙo-lyi lyiwukyie ko Mndumii, nalyo nyi kyiṟiyisho mbele yaṙu?’ ”

¹² Nawo wakapfula immbaṙa, wakaowuo wandu wa kyisanzionyi; kyipfa walemanya kye kui mfano ulya naleṙeṙa mbonyi tsawo. Wakamṙa wakayenda.

Mbonyi tsa Itaa Kodi

¹³ Wakaṙuma kokye Mafarisayo waata na Maherodi, kundu wamṙege kui maṙeṙo.

¹⁴ Na kyiyeri waleafukyia walemmbia, “Mlosha, luichi kye iyoe nyi mndu o loi, maa okyesaṟa kyiṟumi kya mndu-pfo; cha kyipfa okyeambuya fana tsa wandu-pfo kyaindi kyiiṙi kya wuloi nokyelosha njia ya Ruwa. Ngyesa nyi sungusinyi ienenga Kaisari kodi ang'u ote?

¹⁵ Lumwenengye, ang'u lulamwenengye?” Na oe, aichi wukulembecheṟi wowo, kawawia, “Ny'kyilyi mongyiyesha? Ngyiendienyi dinari ngyiiwone.”

¹⁶ Wakaiende. Kawawia, “Nyi ya wui sanamu-i na kyiṟeio-kyi?” Wakammbia, “Nyi ya Kaisari.”

¹⁷ Yesu kagaluo, kawawia, “Enengyenyi Kaisari shikyeri sha Kaisari, na shikyeri sha Ruwa enengyienyi Ruwa.” Wakaṟiyio mnu kyipfa kyakye.

Mbonyi tsa Iṟuka ko Wapfu

¹⁸ Naaho-ng'u Masadukayo, wandu wekyegamba kye kuwoṙe iṟuka lya wapfu-pfo, wakayenda kokye, wakammbesa, wachigamba,

¹⁹ “Mlosha, Mose naleluṟeia kye mono-wama o mndu kapfa, kaṙa mka okye alawoṙe mana, mono-wamae naṙuo mka ulya okye nawonie mono-wamae mana.

²⁰ Kyasia kuwewoṙe wana wa mka mfungaaṙe. O kuwooka kaalyika mka, kapfa, alaṙe mana.

²¹ O kawi na oe kamwalyika kapfa, maa oe aleṙa mana-pfo. Na o kaṟaaṟu na wuṙo taa;

²² mṟasa woose mfungaaṙe, walaṙe mana. Mafurumionyi ga woose mndu mka ulya na oe kapfa.

²³ Kyasia, kyiiṙi kya iṟuka lya wapfu nechiwa mka o uha kyiiṙi kya iwo? Kyipfa woose mfungaaṙe walekaa na oe.”

²⁴ Yesu kagaluo, kawawia, “Ngyesa muiṙeka kyipfa kya ikyi, cha kyipfa mulaichi shiṟeio maa wuiṙimi wo Ruwa?

²⁵ Cha kyipfa kyiyeri wechiṟuka ko wapfu, wekyealyika maa ialyiko-pfo, indi wekyewa cha malaika wakyeri ruwewu.

²⁶ Na ko mbonyi tsa wapfu kye wekyeṟutso, mulandesome kyitapunyi kya Mose, halya-ndu haṙeṙie mbonyi tsa kyinguṙu, chandu Ruwa alemmbia echigamba, ‘Inyi nyi Ruwa o Abrahamu, na Ruwa o Isakyi, na Ruwa o Yakobo?’

²⁷ Oe chi Ruwa o wapfu-pfo, indi o wai na moo. Koikyo muiṙeka mnu.”

Iwawaso Lying'anyi kuta Goose

²⁸ Na umwi o walosha wa mawawaso kacha, kaicho weṙeṙa na oe, kamanya kye nawagaluo necha, kammbesa, “Kyiiṙi kya mawawaso goose nyi lyiha lyikyeri lya kuwooka?”

²⁹ Yesu kamgaluo, “Lya kuwooka nyilyo ilyi, ‘Aṙanyia, Isiraelyi, Mndumii Ruwa oṙu nyi Mndumii umwi.

³⁰ Na iyoe kunda Mndumii Ruwa opfo kui ngoo yapfo yoose, na kui mrima opfo oose, na kui wuṟango wopfo woose, na kui pfinya tsapfo tsoose.’

³¹ Na lya kawi nyilyo ilyi. ‘Kunda momṟasa opfo chandu ukukundi iyoe kumonyi.’ Kuwoṙe iwawaso lying'anyi kuta iga-pfo.”

³² Mlosha ulya o mawawaso kammbia, “Ny'kyaloi, Mlosha, nogamba necha kye Ruwa nyi umwi, kuwoṙe ungyi sile oe-pfo.

³³ Na imkunda oe kui ngoo yoose, na kui wuṟango woose, na kui pfinya tsoose, na ikunda momṟasa chandu ukukundi kumonyi kuwoṙe kyiira kuta shiṙaso shoose na shienengo taa.”

³⁴ Na Yesu, kyiyeri alewona kye nagaluo kui wuṟango, nalemmbia, “Iyoe ukyeri kuleshi na Wumangyi wo Ruwa-pfo.” Maa mndu alekaria-se immbesa kyindo wookyia iho-pfo.

Mbonyi tsa Mesia

³⁵ Na kyiyeri Yesu aweiloshia hekalunyi nalegaluo, kagamba, “Walosha wa mawawaso wekyegamba kuṙa kye Kristo nyi Mono-Dawidi?

³⁶ Dawidi amonyi nalegamba, kui wuiṙimi wo Mumuyo Mweele, ‘Mndumii nalewia mndumii oko, uṙamie kuwoko koko ko kulyoe, mṟasa ngyechiwikyia washituwa wapfo ikaa wanda ya wuchilyi wopfo.’ ”

³⁷ “Dawidi amonyi nagamba nyi Mndumii; kyasia nawa kuṙa mono-kye?” Na wuingyi wung'anyi wo wandu waweimwaṙanyia kui sia.

Wuwicho wo Walosha wa Uwawaso

³⁸ Kawawia maloshonyi gakye, “Kushowenyi na walosha wa mawawaso wakundi ichumia waṟee magale maleshi, na iiṟikyiṟo sangaṙa,

³⁹ na iṙamia mbele masinagoginyi, na shiṙi sha mbele shelyenyi.

⁴⁰ Wekyesoka wakusu shindo shawo, na kui wukulembecheṟi iterewa shiterewo shileshi. Iwa wechiwona ianduyo lying'anyi.”

Kyiano kya Mndu mka Mkusu

⁴¹ Na Yesu aṙamie kufuhi na halya-ndu wandu wawekyewika heleri, kaambuya chandu wuingyi wo wandu wawewika heleri handu halya. Wanjama wakawika shifoi.

⁴² Mndu mka umwi mkusu, mkyiwa kacha, kawika helo tsiwi, tsilyingananyi na kyindo kyilashikyie maa dinari.

⁴³ Kalaga wanalosho wakye, kawawia, “Ny'kyaloi ngammbia, mkusu-chu mkyiwa nawika ngoseṟa kuta woose waiwika handu-ha hewika heleri;

⁴⁴ kyipfa iwo woose walewika shindo wawuta ngoseṟenyi ya masaa gawo.”