Mariko 10 - Kivunjo New Testament 1999

Mbonyi tsa Iletsana Wolyi

¹ Kawuka pfo kashika mṟasenyi ya Uyuda, na molyolya o Yoridan. Wuingyi wufoi wukosanza-se wakayenda kokye, kawalosha-se chandu aweichiwie.

² Kyasia Mafarisayo wakayenda kokye, wakammbesa, “Ngyesa nyi sungusinyi mndu iṙa mka okye?” kunu wechimyesha.

³ Na oe kagaluo, kawawia, “Mose nalemmbia kyi?”

⁴ Wakagamba, “Mose naleenenga momu iṟeia kyiṟeio kyelekana na imṙa.”

⁵ Yesu kawawia, “Kyipfa kya wuumu wo mrima yanyu nalemuenenga iwawaso-lyi.

⁶ Kyaindi wookyia mawookyionyi ga igumbo wuyana, nalegumba mii na mka.

⁷ Kyipfa kya ikyo mndu nechilekana na awuye na wamae, naawishane na mka okye;

⁸ na iwo wawi wechiwa mmbiu umwi; kyasia wai-se wawi-pfo, indi mmbiu umwi.

⁹ Kyasia ikyo Ruwa akyilunga, mndu alakyiletsane.”

¹⁰ Na lyilya walewuya na kanyi wanalosho wakammbesa mbonyi tsa ṙeṙo-lyo.

¹¹ Kawawia, “Orio mndu echiṙa mka okye na ialyika ungyi nawa mṟui;

¹² na mka, kaṙa mii okye na ialyiko nyi mndu ungyi, nawa mṟui.”

Yesu Kawikyia Wana Watutu Mboṟa

¹³ Kyasia wakaendie Yesu wana watutu kundu nawapaaye; wanalosho wakye wakawaṙeṙia.

¹⁴ Indi Yesu kyiyeri alewona kasuo mnu, kawawia, “Lekyenyi wana watutu wache na koko, mulawashingyie-pfo; cha kyipfa wana cha iwa Wumangyi wo Ruwa nyi wowo.

¹⁵ Ny'kyaloi ngammbia, orio oose alechiiṙikyia Wumangyi wo Ruwa cha mana mtutu echiiṙa napfo maa ale-pfo.”

¹⁶ Kawachunguṟia, kayekyia mawoko gakye wuye yawo, kawawikyia mboṟa.

Mnjama

¹⁷ Na lyilya awefuma iyenda njienyi, mndu umwi kacha eṙicha, kampfiria ndi, kammbesa, “Mlosha mcha, ngyiwute kyi ngyiiṙime ioṟa moo o mlungana?”

¹⁸ Yesu kammbia, “Ny'kyilyi uigamba ngyimcha? Kuwoṙe ai mcha sile umwi tupu-pfo, nyi oe Ruwa.

¹⁹ Nuichi mawawaso: Ulawaage, Ulaṟuguye maa Ulaṟuguyo, Ulaiwe, Ulaṟingyishie wongo, Ulalembe, India awuyo na womoo.”

²⁰ Kammbia, “Mlosha, iga goose ngyekyegaosha wookyia wututu woko.”

²¹ Yesu kamwitukuya ko pfinya kamkunda, kammbia, “Nuuṟie kyindo kyimwi. Yenda, undekumba shoose uwoṙe, uenengye wakyiwa, na iyoe nochiwaṙa kyiseyesoe ruwewu; numa ya iho nnjo ungyioshe.”

²² Kyaindi oe kalema nzineeri kyipfa kya ṙeṙo-lyo, kawuka halya ammbihie mrimenyi; cha kyipfa nawewoṙe masaa gafoi.

²³ Yesu kaambuya ngyuura tsoose, kawia wanalosho wakye, “Kyechiwa kyuumu ko wawoṙe masaa iiṙa na Wumangyinyi wo Ruwa!”

²⁴ Wanalosho wakaṟiyio kyipfa kya malosho gakye. Yesu kagaluo-se kawawia, “Wana, kyikyilemeri iiṙa na Wumangyinyi wo Ruwa!

²⁵ Kyikyeri kyaangu ngamia iiṙa ṟochonyi lya sindanu kuta mnjama iiṙa na Wumangyinyi wo Ruwa.”

²⁶ Nawo wakaṟiyio mnu, wechimmbia, “Nyi wui-ngu ngyesa, echiiṙima ikyia?”

²⁷ Yesu kawaitukuya, kagamba, “Ko wandu kyechiiṙimika-pfo, indi ko Ruwa chi wuṙo-pfo; kyipfa shoose shekyeiṙimika ko Ruwa.”

²⁸ Petiro kawooka immbia, “Ambuya, soe luleṙa shoose lukokuosha iyoe.”

²⁹ Yesu kagamba, “Ny'kyaloi, ngammbia, kuwoṙe mndu aleṙa numba, ang'u wana wa wama wa kyisoṟo, ang'u washikyi, ang'u mama, ang'u awu, ang'u wana, ang'u maṙema kyipfa kyako, na kyipfa kya Ndumi Ngyicha-pfo,

³⁰ alechienengo ka igana kyiyeri-kyi kya wulalu, numba, na wana wa wama wa kyisoṟo, na washikyi, na mama, na wana, na maṙema, hamwi na ngapo, na kulya wuyanenyi wuicha moo o mlungana.

³¹ Kyaindi wafoi wakyeri wa kuwooka wechiwa wa mafurumionyi; na wa mafurumionyi wechiwa wa kuwooka.”

Ngumbuṟa ya Kaṟaaṟu ya Upfu lo Yesu

³² Nawo wawekyeri njienyi, kunu wechiṙo iyenda Yerusalemu; na Yesu nawewasongoye. Wakaṟiyio, nawo wechiosha wakaowuo. Kawuta-se walya ikumi na wawi, kawooka iwawia mbonyi tsa shindo shechimmbutikyia,

³³ echigamba, “Ambuyenyi luiṙo iyenda Yerusalemu; na Mono-Mndu nechiwiko mawokonyi ga wang'anyi wa makohanyi na walosha wa mawawaso. Nawo wechimwanduya napfe, wechimmbika mawokonyi ga masanga,

³⁴ nawo wechimtaluo, na impuchia maṙa, na imkapa na ngowa, na immbaaga, na numa ya mfiri iṟaṟu nechiṟuka.”

Kyindo Yakobo na Yohane Waleterewa

³⁵ Na Yakobo na Yohane, wana wa Sebedayo, wakayenda kokye, wakammbia, “Mlosha, lukundi uluwutie ikyo kyoose lochikuterewa.”

³⁶ Kawawia, “Mukundi ngyimmbutie kyi?”

³⁷ Wakammbia, “Uluenengye soe luṙamie, umwi kuwoko kopfo ko kulyoe, na umwi kuwoko kopfo ko kumoso, mng'anonyi opfo.”

³⁸ Yesu kawawia, “Muichi kyindo muiterewa-pfo. Moiṙima iiṙia matuuro ngyigaiṙia, ang'u ipatiso wupatiso ngyipatiso inyi?”

³⁹ Wakammbia, “Loiṙima.” Yesu kawawia, “Matuuro ngyigaiṙia, mochigaiṙia, na wupatiso ngyipatiso inyi mochipatiso,

⁴⁰ kyaindi mbonyi tsa iṙamia kuwoko koko ko kulyoe ang'u kuwoko koko ko kumoso chi momu oko imuenenga-pfo, sile wechienengo iwo wamuṟeyeṟio.”

⁴¹ Na kyiyeri walya ikumi waleicho wakawooka isuuya Yakobo na Yohane.

⁴² Yesu kawalaga, kawawia, “Muichi kye walya wawatale iwa wang'anyi wa masanga wekyemuchilyia kui pfinya, na wasongoru wawo wekyemugaluo nyoe waṟundi wawo.

⁴³ Kyaindi kyechiwa kuṙo konyu-pfo; indi mndu akundi iwa ang'anyi konyu, nechiwa mṟundi onyu,

⁴⁴ na mndu akundi iwa o kuwooka konyu, nechiwa isinga lya woose.

⁴⁵ Cha kyipfa Mono-Adamu alecha icheṟundio-pfo, indi iṟundia wengyi, na ireka moo okye uwe kyindo kyekyiṟa wengyi.”

Ikyiṟo lya Baritolomayo

⁴⁶ Wakashika Yeriko; na kyiyeri aweiwuka pfo, hamwi na wanalosho wakye, na kyisanzionyi, mana o Timayo, Baritolomayo, kyipfupfuṟe kyilya kyiwekyeeṟeṟa, kyiweṙamie mbai ya njia.

⁴⁷ Nakyo kyiyeri kyileicho kye nyi Yesu o Nasareti, kyilewooka ikuilenga, na igamba, “Mono-Dawidi, Yesu, ungyisaṟie.”

⁴⁸ Na wandu wafoi wakakyiṙeṙia kundu kyitsie, kyaindi kyikaengyeṟa ikuilenga, “Mono-Dawidi, ungyisaṟie.”

⁴⁹ Yesu kagoṟoka, kagamba, “Kyilagenyi.” Wakalaga kyipfupfuṟe kyilya, wakakyiwia, “Kuwanze mrimenyi; goṟoka, naikulaga.”

⁵⁰ Kyikawiyitsa ikunya lyakyo, kyikatoola, kyikayenda ko Yesu.

⁵¹ Yesu kakyigaluo, kakyiwia, “Nukundi ngyikuwutie kyi?” Kyipfupfuṟe kyilya kyikammbia, “Mlosha oko, ngyikundi ngyiiṙime iwona.”

⁵² Yesu kakyiwia, “Yenda, iiṙikyia lyapfo lyakukyiṟa.” Cha ilyi kyikaenengo iwona; kyikamwosha njienyi.