Luka 3 - Kivunjo New Testament 1999

Malosho ga Yohane Mpatisi

¹ Maka o ikumi na kataanu o ichilyia lya Kaisari Tiberia, kyiyeri Pontio Pilato awei mchilyi o Uyuda, na Herode mangyi o Galyilaya, na Filyipo, mana o wamae, mangyi o Iturea na uruka lo Tirakoniti, na Lyisania, mangyi o Abilene,

² kyiyeri kya wukohanyi wung'anyi wo Anasi na Kayafa, Ṙeṙo lya Ruwa lyileshika ko Yohane mana o Sakaria, kundu kuumu suwaa kulawoṙe maa mṟinga.

³ Kashika urukyenyi loose lukyeri kufuhi na Yoridan echionguo mbonyi tsa wupatiso wokyeende iṙumbuya wunyamaṟi na ihooṟio maṙeko.

⁴ Chandu kyikyiṟeie kyitapunyi kya moonguo shisuku Yesaya, “Ṟui lya mndu aieṟeṟia nuka, ‘Ṟeyeṟenyi njia ya Mndumii, goṟotsenyi kundu echiiṙia.

⁵ Orio pichi lyechiichuṟo, na orio fumvu na kyifumvu kyechititiṟo; handu haleme hechigoṟoka, na halaharendekyeri herendekyia.

⁶ Na wandu woose wechiwona wukyiṟo wo Mndumii.’ ”

⁷ Kyasia kawia wuingyi wo wandu walya waleyenda kokye kundu nawapatise, “Nyoe maalea ga njoka, nyi wui alemuikyimbia nyoe iṙicha nyashi-yo iicha?

⁸ Kyasia kumbienyi ndunda tsifananyi na iṙumbuya wunyamaṟi; maa mulagambe mrimenyi konyu kye muwoṙe awu, nyi oe Abrahamu, kyipfa ngammbia kye, iwuka kunu magoenyi Ruwa nechiiṙima ienenga Abrahamu wana.

⁹ Na wulalu kuṙi soka lyilyiwikyie matsindenyi ga mashiṙi. Kyasia orio ikyiṙi lyilaikumbia ndunda ngyicha lyechimanyo na iwiyitso moṙonyi.”

¹⁰ Wuingyi wulya wo wandu wukommbesa, “Kyasia luwikye kuṙa?”

¹¹ Kagaluo, echiwawia, “Awoṙe kanzu tsiwi naenengye ulya alawoṙe kanzu; na awoṙe shelya nawewute kuṙo.”

¹² Wesania ukamba nawo wakacha ipatiso, wakammbesa, “Mlosha, luwikye kuṙa soe?”

¹³ Kawawia, “Maa mularikye ngoseṟa ya ikyo muwawie.”

¹⁴ Asikari nawo wakammbesa, wechigamba, “A soe luwikye kuṙa?” Kawawia, “Mulaṙuo kyindo kya mndu ko pfinya, maa mulaṙuo mndu mengyenyi kyipfa kya shindo sha wongo, ngoseṟa shikonyi na shilya muitoo cha wori wonyu.”

¹⁵ Kyasia, lyilya wandu waweiweṙelyia kyindo kyechiwutika, woose wechikusaṟa mrimenyi kowo mbonyi tsa Yohane, kokooya oe nyi oe Kristo,

¹⁶ Yohane nalegaluo kawia woose, “Loi inyi ngyimupatisa kui mṟinga, kyaindi naicha mndu awoṙe pfinya kuta inyi, ngilechiiṙima maa ituruchuo ngowa tsa shiaṙu shakye. Oe nemupatisa kui Mumuyo Mweele na kui moṙo.

¹⁷ Oe indo lyakye lyeela shindo lyikeri kuwokonyi kokye, na oe nechiaia muului oose handu hakye heelyia shindo, na isania nganu yakye kyikumbinyi indi muului nechiurumatsa moṙonyi ulekyeruma.”

¹⁸ Kyasia, kui shindo shifoi shetutuma naleongoya wandu mbonyi ngyicha.

¹⁹ Kyaindi lyilya mangyi Herode aleṙeṙio nyi Yohane kyipfa kya Herodia, mka o mono-wamae, na mawicho goose Herode alewuta,

²⁰ naleengyeṟa-se na wuwicho wungyi wuye ya shoose, kawika Yohane kyipfungonyi.

Ipatiso lya Yesu

²¹ Kyikawa-ng'u wandu woose wampatiso, na Yesu ampatiso na oe naiterewa, mapuchi galeseia.

²² Mumuyo Mweele kasokyia wuye yakye kui mfano o mmbiu cha mbuna; ṟui lyikawuka Ruwewu, “Iyoe nyi Mana oko, mkunde oko, ngyimchihiye kyipfa kyapfo.”

Waku wa Yesu

²³ Na Yesu amonyi, kyiyeri alewooka ilosha, nawewoṙe cha maka makumi gaṟaaṟu, echikusaṟo kye nyi mana o Yosefu, o Elyi.

²⁴ O Matati, o Lewi, o Melyikyi, o Yana, o Yosefu.

²⁵ O Matatia, o Amosi, o Nahomu, o Esilyi, o Nakai.

²⁶ O Maati, o Matatia, o Semei, o Yosefu, o Yuda.

²⁷ O Yoana, o Resa, o Serubabelyi, o Shealyitielyi, o Neri.

²⁸ O Melyikyi, o Adi, o Kosamu, o Elyimadamu, o Eri.

²⁹ O Yosua, o Elyieseri, o Yorimu, o Matati, o Lewi.

³⁰ O Simion, o Yuda, o Yosefu, o Yonamu, o Elyiakyimu.

³¹ O Melea, o Mena, o Matata, o Natan, o Dawidi.

³² O Yese, o Obedi, o Boasi, o Salyimone, o Nashon.

³³ O Aminadabu, o Aramu, o Hesiron, o Peresi, o Yuda.

³⁴ O Yakobo, o Isakyi, o Abrahamu, o Tera, o Nahori.

³⁵ O Seṟuikyi, o Rakau, o Pelekyi, o Eberi, o Sala.

³⁶ O Kyenan, o Arifakyisadi, o Semu, o Noe, o Lamekyi.

³⁷ O Metusela, o Enokyi, o Yaredi, o Mahalalelyi, o Kyenan.

³⁸ O Enosi, o Seti, o Adamu, o Ruwa.