Luka 23 - Kivunjo New Testament 1999

Yesu Mbele ya Pilato

¹ Wandu woose wa kyisanzionyi wakagoṟoka wakamṙuo ko Pilato.

² Wakawooka imshitakyi, wechigamba, “Lulewona ichu eṙetsa wandu waṙu, na iima wandu walatae kodi ko Kaisari, echigamba kye oe amonyi nyi Kristo, mangyi.”

³ Pilato kammbesa, echigamba, “Iyoe nyi oe mangyi o Wayuda?” Kagaluo, kammbia, “Iyoe nogamba.”

⁴ Pilato kawia wang'anyi wa makohanyi na wuingyi wo wandu, “Ngyiwonyi kyindo kyiwicho ko mndu-chu-pfo.”

⁵ Nawo wakaengyeṟa mnu, wechigamba, “Nekyeṙetsa wandu elosha urukyenyi lo Uyuda loose wookyia Galyilaya mṟasa kunu.”

Iṙoo lya Yesu ko Herode

⁶ Kyiyeri Pilato aleicho isho nalewesa kokooya nyi-we mndu o Galyilaya.

⁷ Na kyiyeri alemanya kye nakyeri wuchilyinyi wo Herode, nalemṙika ko Herode, kyipfa maa oe nawekyeri Yerusalemu mfiri iya.

⁸ Na kyiyeri Herode alewona Yesu nalechihiyo mnu, cha kyipfa nawekundi immbona wookyia mfiri ifoi, kyipfa awemwicho mbonyi tsakye, kalanga iwona kyiṟingyishio kyilewuto nyi oe.

⁹ Kammbesa shindo shifoi, oe alamgaluo kyindo kyoose.

¹⁰ Wang'anyi wa makohanyi na walosha wa mawawaso wakagoṟoka wakamshitakyi ko pfinya mnu.

¹¹ Kyasia Herode kammina, hamwi na asikari wakye, kamtaluo, na imṟika nguwo ngyicha, numa kammbiyiṟa na ko Pilato.

¹² Kyasia mfiri ulya ulya Herode na Pilato wakaiṙikyiana iwaṙa umbuya, cha kyipfa ipfo mawookyionyi wawesuanyi.

Ianduyo Iwoogo

¹³ Na Pilato kasanzia handu hamwi na wang'anyi wa makohanyi, wasongoru wa wandu, na wandu,

¹⁴ kawawia, “Mndu-chu momuende na koko mochigamba kye naiṙetsa wandu; na inyi ngaaṙanyia mbonyi tsakye mbele yanyu, indi ngawona ṙeko lyoose kokye ko shindo shilya shamuenenga imshitakyi-pfo.

¹⁵ Maa Herode, cha kyipfa nammbiyiṟa na koṙu. Kyasia kuwoṙe kyindo kyoose awutie kyemwenenga ianduyo ipfa-pfo.

¹⁶ Koikyo ngyigamba nakapo, numa ya iho ngyimlekyie nayende.” [

¹⁷ Kyipfa kyilemkooya iwapfunguya mpfungo umwi kyiyeri kya mfiri ung'anyi.]

¹⁸ Wakakalagatsa woose, wechigamba, “Mmbaage ichu, ulupfunguye Baraba.”

¹⁹ Na oe nyi mndu alewiko kyipfungonyi kyipfa kya wuṟiingyi wulecha mṟinyi, na wuwaagi.

²⁰ Kyasia Pilato naleṙeṙa nawo lya kawi, kyipfa kya chandu awekundi ipfunguo Yesu.

²¹ Kyaindi wakakalagatsa, wechigamba, “Mkapie msalabenyi! Mkapie msalabenyi!”

²² Kawawia lya kaṟaaṟu, “Kyipfa kya kyikyi? Ichu nawuta wuwicho wuha? Ngawona nawoṙe kyindo kyechimwenenga ipfa-pfo. Kyasia ngamumkapa ngyemlekyia.”

²³ Kyaindi wakaṙeṙa na pfinya wakundi nawoogo. Maṟui gawo gakawinga.

²⁴ Pilato kaanduo kye kyilya wakundi kyiṟundikye.

²⁵ Kapfunguo ulya awempfungye kyipfa kya wuṟiingyi na wuwaagi, ulya wawemkundi, kawuta Yesu wammbutie chandu wawekundi.

Ikapio Msalabenyi

²⁶ Na kyiyeri wawemṙuo walekarisana mndu umwi ekyelago Simion Mkyirene, alekoawuka ṙemenyi, wakamṙika msalaba, nauṙuo numa ya Yesu.

²⁷ Wuingyi wung'anyi wo wandu wukomwosha, na waka wawekapa-kapa shipoota na ikapa ṟanyi kyipfa kyakye.

²⁸ Yesu kawaindukyia, echigamba, “Nyoe waka wa Yerusalemu, maa mulangyilyilyie inyi, indi lyilyienyi mrima yanyu na wana wanyu.

²⁹ Cha kyipfa mfiri iicha, wechigamba, ‘Nanga walawoṙe wana na waumba, na mawee galekyeonza.’

³⁰ Nyi lyo-ndu wewooka iwia mafumvu, ‘Luolokyienyi’, na shifumvu ‘Lushikyienyi.’

³¹ Cha kyipfa kokooya wawutia ikyiṙi lyiwishi shindo-shi, kyechiwa kuṙa ikyiṙinyi lyiumu?”

³² Wakaṙoo na wandu wengyi wawi, wandu wanyamaṟie, wawoogo hamwi na oe.

³³ Na lyilya waleshika handu hekyelago, “Ipoṟong'u,” nyi ho-ndu walemkapia msalabenyi, oe na walya wengyi wawi, umwi ura lo kulyoe, na umwi ura lo kumoso.

³⁴ Yesu kagamba, “Awu, uwahooṟie, kyipfa waichi kyindo waiwuta-pfo.” Wakagawana nguwo tsakye, wechikapa kuṟu kuha.

³⁵ Wandu wakagoṟoka wechiambuya. Wasongoru walya nawo wawemtaluo, wegamba, “Nalekyiṟa wengyi; nakukyiṟe amonyi, kokooya oe nyi Kristo o Ruwa, msambuṟe okye.”

³⁶ Asikari walya wakawemtaluo, wechiyenda kokye na imwendie kyindo kyekyetarang'ia,

³⁷ wechigamba, “Kokooya iyoe nyi mangyi o Wayuda, kukyiṟe kumonyi.”

³⁸ Na wuye yakye hawewoṙe kyiṟeio: “ICHU NYI OE MANGYI O WAYUDA.”

³⁹ Na umwi o wanyamaṟi walya wawewamanyikye msalabenyi nalemlahia, echigamba, “Ngyesa iyoe chi Kristo-pfoe? Kyiṟa mrima opfo na soe.”

⁴⁰ Kyaindi ulya o kawi kamgaluo, kamṙeṙia, echigamba, “Iyoe uowuye maa Ruwa, na iyoe nukyeri kyiiṙi kya ianduyo-lyo ilyo?

⁴¹ Nakyo nyi sungusinyi koṙu soe, cha kyipfa luambilyia wori wuwaṟi mawuto gaṙu; indi ichu alewuta kyindo kyoose kyiwicho-pfo.”

⁴² Numa kagamba, “Hoi Yesu, ungyikumbuo ilyi ochiiṙa na Wumangyinyi wopfo.”

⁴³ Yesu kammbia, “Ny'kyaloi, ngakuwia, inu kuṙi nochikaa hamwi na inyi paradiso heonyonya mlungana.”

Ipfa lya Yesu

⁴⁴ Kuwekyeri cha saa tsiṟandaaṟu, kukowaṙa meema urukyenyi koose mṟasa saa kyenda.

⁴⁵ Ngyeela ya mnengyeṟi ikatitia; isulyia lyeshingyia hekalunyi lyikaranduka makyiṙi-gawi.

⁴⁶ Yesu kakuilenga na ṟui lying'anyi, kagamba, “Hoi Awu, mawokonyi gapfo ngawika mrima oko.”

⁴⁷ Amgambe kuṙo nalelekyia moo. Kyiyeri mchilyi ulya alewona shindo shilewutika, naleana Ruwa, echigamba, “Loi mndu-chu nawekyeri msumganyi.”

⁴⁸ Na wandu wa kyisanzionyi kyoose walekowakuumbia iambuya shindo-sho, wammbone kyindo kyilewutika, wakayenda kowo wechikapa-kapa shipoota.

⁴⁹ Na woose wawemwichi, na waka walya waleoshana na oe iwuka Galyilaya, wakagoṟoka kuleshi weambuya shindo-sho.

Iṟiko lya Yesu

⁵⁰ Kukocha mndu umwi, ekyelago Yosefu, awekyeri nyi mndu o mengye ya Wayuda, mndu mcha, awoṙe wusumganyi.

⁵¹ (Maa aleiṙikyiana na kyilya walewuta-pfo), na oe nyi mndu o Arimataya, mṟi umwi o Wayuda, lyingyi-se naweiweṙelyia Wumangyi wo Ruwa.

⁵² Mndu-cho naleyenda ko Pilato, kakunda naenengo mmbiu o Yesu.

⁵³ Kasotsa mmbiu-cho iwuka msalabenyi, kauaṟahia sanda, kauwika kyilomenyi kyiwekyipache iṟaṟenyi, nakyo kyilawendeṟiko mndu-pfo.

⁵⁴ Na mfiri ulya uwekyeri mfiri o ikuṟeyeṟa, na mfiri o onyonya ukowooka iafukyia.

⁵⁵ Na waka walya walecha na oe iwuka Galyilaya waleosha, wakawona kyilome, na chandu mmbiu okye uwemmbikyie.

⁵⁶ Wakawuya wakaṟeyeṟa mafuṙa gekyepfaama necha. Na mfiri o onyonya walechihiyo chandu kyiwekyigambe.