Luka 20 - Kivunjo New Testament 1999

Mbonyi tsa Wuchilyi wo Yesu

¹ Mfiri umwi, kyiyeri aweilosha wandu hekalunyi, na ionguo Ndumi Ngyicha, wang'anyi wa makohanyi na walosha wa mawawaso hamwi na wasongoru wa wandu wakacha na kokye kyituukyia.

² Wakammbesa, “Luwie, nuiwuta shindo-sho kui wuchilyi wo wui? Lyingyi-se nyi wui alekuenenga wuchilyi-wu?”

³ Kagaluo, kawawia, “Na inyi ngyemmbesa nyoe kyindo kyimwi.

⁴ Wupatiso wo Yohane, ngyesa wulewuka ruwewu ang'u nyi ko wandu?”

⁵ Wakawesana wo wenyi ko wenyi, wechigamba, “Kokooya logamba wulewuka ruwewu, negamba, ‘Kyasia ny'kyilyi mulalemwiṙikyia?’

⁶ Na lukogamba wulewuka ko wandu, wandu woose welukapa na magoe, cha kyipfa waleiṙikyia Yohane kye nyi moonguo shisuku.”

⁷ Wakagaluo, “Luichi kundu wulewuka-pfo.”

⁸ Yesu kawawia, “Maa inyi ngyimmbia nyoe nyi kui wuchilyi wuha ngyiwuta shindo-shi-pfo.”

Mfano o Waṟundi wa Ṙema lya Msabibu

⁹ Kawooka iwia wandu mfano-chu: “Mndu umwi nalewaaya ṙema lya msabibu; kalyiṙambika waṙemi, kayenda kandekaa uruka lungyi kyiyeri kyileshi.

¹⁰ Na kyiyeri kya shilyimu naleṙuma mṟundi ko waṙemi walya kundu wamwenengye ndunda ngyaata tsa msabibu; indi waṙemi wakamkapa wakamfuna alawoṙe kyindo.

¹¹ Kaṙuma-se mṟundi ungyi. Ichu na oe wakamkapa, wakamsutsa, wakamfuna alawoṙe kyindo.

¹² Kaṙuma na o kaṟaaṟu. Ichu na oe wakamfaṟa, wakammbiyitsa nja.

¹³ Kyasia, mndumii o ṙema lya msabibu nalegamba, ‘Ngyiwikye kuṙa? Ngyeṙuma mono-ko, mkunde oko; kofia wemwindia oe.’

¹⁴ Kyaindi, waṙemi walya lyilya walemmbona, wakawiana wo wenyi ko wenyi, wechigamba, ‘Ichu nyi oe mokyioṟa. Lummbaage kundu kyioṟa kyiwe kyaṙu.’

¹⁵ Wakammbiyitsa nja ya ṙema lya msabibu, wakammbaaga. Kyasia, mndumii o ṙema lya msabibu newawutia kuṙa?

¹⁶ Nechicha na irumatsa waṙemi walya, na ṙema lyilya lya msabibu nechienenga wandu wengyi.” Kyiyeri waleicho isho, walegamba, “Ote! Shilawutikye isho!”

¹⁷ Kawaitukuya, kagamba, “Kyasia kyindo-kyi kyagamba-kyi chandu kyikyiṟeie, ‘Igoe walelega wewika numba ilyo lyilewa igoe lying'anyi lya ndumbenyi.’ ”

¹⁸ “Orio mndu echioloka wuye ya igoe-lyo nefunjika-funjika; na oose lyechimwolokyia lyemmamiṟa.”

Mbonyi Tsetaa Kodi

¹⁹ Na walosha wa mawawaso na wang'anyi wa makohanyi walepfula immbaṙa kyiyeri kyilya kyilya, wakaowuo wandu, kyipfa walemanya kye mfano-cho alewawia naleṙeṙa kyipfa kyawo.

²⁰ Wakamwowelyia wakaṙuma shisookyi shilekuloṟa cha wandu wasumganyi, kundu wammbaṙe maṙeṙonyi gakye, waiṙime imṙuo ko mchilyi.

²¹ Wakammbesa, wechigamba, “Mlosha, luichi kye nuiṙeṙa na ilosha gakyeri ga wusumganyi, maa okyesaṟa wung'anyi wo mndu-pfo, indi nuilosha njia ya Ruwa kui wuloi.

²² Ngyesa nyi sungusinyi luenengye Kaisari kodi ang'u ote?”

²³ Kyaindi oe nalemanya ngyeṟo tsawo, kawawia,

²⁴ “Ngyiloṟenyi dinari. Iwoṙe fana na kyiṟeio kya wui?”

²⁵ Wakamgaluo, “Kya Kaisari.” Kawawia, “Kyasia, sha Kaisari enengyenyi Kaisari, na sha Ruwa enengyenyi Ruwa.”

²⁶ Maa waleiṙima immbaṙa kui maṙeṙo gakye mbele ya wandu-pfo; wakaṟiyio chandu alewagaluo wakatsia.

Mbonyi Tsa Iṟutso ko Wapfu

²⁷ Numa ya iho Masadukayo waata wakayenda kokye, walya wekyegamba kye kuwoṙe iṟutso lya wapfu-pfo, wakammbesa,

²⁸ wechigamba, “Mlosha, Mose naleluṟeia kye mndu awoṙe mono-wamae awoṙe mka, kyaindi awoṙe mana-pfo, naṙuo mka-chu, nawonie mono-wamae mana.

²⁹ Kyasia, kuwewoṙe wana wa mka mfungaaṙe. O kuwooka nalealyika mka kapfa alawoṙe mana;

³⁰ na o kawi [kaṙuo mka ulya, kapfa alawoṙe mana.]

³¹ Mṟasa o kaṟaaṟu kamwalyika, na wuṙo woose mfungaaṙe, wakapfa, walaṙe wana.

³² Lyefurumia mka ulya na oe kapfa.

³³ Kyasia, kyiyeri kya iṟutso lya wapfu nechiwa mka o wui? Kyipfa nalealyiko na woose mfungaaṙe.”

³⁴ Yesu kawawia, “Wana wa wuyana-wu wekyealyika na ialyiko;

³⁵ kyaindi, walya wekyetalo kye wawaṟi iambilyia wuyana wulya, na kulya iṟuka ko wapfu, wekyealyika maa ialyiko-pfo.

³⁶ Maa weiṙima ipfa-se-pfo; cha kyipfa wekyewa cha malaika, nawo nyi wana wa Ruwa, kyipfa kya ilyi wakyeri wana wa iṟutso.

³⁷ Kyaindi kye wapfu wekyeṟutso, maa Mose naleloṟa kyiṟeionyi kya kyiṙi iho-ndu alegamba kya Mndumii kye nyi Ruwa o Abrahamu, na Ruwa o Isakyi, na Ruwa o Yakobo.

³⁸ Na oe chi Ruwa o wapfu-pfo, indi o wakyeri na moo; cha kyipfa woose wekyewaṙa moo kokye.”

³⁹ Walosha wengyi wa mawawaso wakagaluo, wakammbia, “Mlosha, nogamba necha.”

⁴⁰ Maa walekaria immbesa kyindo numa ya isho-pfo.

Isoruo Mbonyi Tsa Kristo

⁴¹ Kawawia, “Wandu waigamba kuṙa kye Kristo nyi Mono-Dawidi?

⁴² Kyipfa Dawidi oe amonyi naigamba kyitapunyi kya Shiimbo, ‘Mndumii nalewia Mndumii oko, uṙamie kuwoko koko ko kulyoe,

⁴³ mṟasa ngyiwikye washituwa wapfo iwa kyitima kyewikyia maṙende gapfo.’ ”

⁴⁴ “Kyasia Dawidi naimlaga ‘Mndumii,’ nawa-se kuṙa mana okye?”

Yesu Kaṙeṙia Walosha wa Mawawaso

⁴⁵ Na kyiyeri wandu woose wawemwaṙanyia, nalewia wanalosho wakye,

⁴⁶ “Kushowenyi na walosha wa mawawaso, wakundi ichumia waṟee nguwo ngyileshi, na iiṟikyiṟo sangaṙenyi, na iṙamia mbele masinagoginyi, na shitima sha mbele karamenyi.

⁴⁷ Wekyesoka waka wakusu masaa gawo, na kui wukulembecheṟi wekyeterewa shiterewo shileshi. Iwo wewona ianduyo lying'anyi.”