Luka 2 - Kivunjo New Testament 1999

Chandu Yesu Alefeo

¹ Mfiri iya iwawaso lyilewuka ko Kaisari Agusto kye kuṟeio marina ga wandu woose wa wuyana.

² Marina-ga nyigo ga kuwooka galeṟeio kyiyeri Kyirenio awekyeri mchilyi o Shamu.

³ Wandu woose wakandeṟeio, orio mndu mṟinyi kokye.

⁴ Yosefu na oe nalefuma Galyilaya, awuka mṟi o Nasareti, kaṙo kayenda Uyuda mṟasa mṟi o Dawidi, okyelago Betilehemu, kyipfa oe nyi o kyishari kya Dawidi;

⁵ kundu naṟeio hamwi na Maria awekyeri tindi yakye na oe nawei mnene.

⁶ Na kyiiṙi kya ikaa-pfo, mfiri yakye yesaṟio mana ikaafukyia,

⁷ kafee mono-kye mmbele, kamṟika nguwo tsa kyikoku, kamlaṟa mugondinyi o umbe, kyipfa walewona ṙaawa numbenyi ya wayenu-pfo.

Walyisi na Malaika

⁸ Na kulya urukyenyi kuwewoṙe walyisi wawekyeri mapatenyi wechiringa mapoo gawo kyio kui iseiyana.

⁹ Malaika o Mndumii kacha na kowo walakuṟeyeṟie, mng'ano o Mndumii ukowaa ngyuura tsoose, wakaowuo mnu.

¹⁰ Malaika kawawia, “Mulaowuoe; kyipfa inyi ngyimuendie mbonyi ngyicha tsa sia ing'anyi yechiwa ko wandu woose.

¹¹ Kyipfa inu mṟinyi o Dawidi nafeo, kyipfa kyanyu, Mkyiṟa, nyi oe Kristo Mndumii.

¹² Na ikyi nyikyo kyiṟingyishio konyu; mochikooya mana aionga amṟikye nguwo tsa kyikoku, alee mgondinyi o umbe.”

¹³ Cha ilyi wawei hamwi na malaika-cho, wuingyi o ngyuulyimalyi tsa ruwewu, wechiṟumisha Ruwa na igamba,

¹⁴ “Naṟumisho Ruwa wuye Ruwewu, na wuyanenyi kuwe ufoṟo ko wandu awakundi.”

¹⁵ Na lyilya malaika-wo walelekana nawo wechiyenda ruwewu, walyisi walya walewiana, “Luyende mṟasa Betilehemu lundewona kyindo-kyo Ruwa aleluwia.”

¹⁶ Wakayenda faṟa wakakooya Maria na Yosefu, na mana ulya aionga alee mgondinyi.

¹⁷ Wamummbone wakaonguo mbonyi tsakye chandu walekowaongoyo.

¹⁸ Woose waleicho wakaṟiyio kyipfa kya isho walewio nyi walyisi.

¹⁹ Kyaindi Maria kakumbuo shindo-sho shoose, echikusaṟa mrimenyi kokye.

²⁰ Walyisi walya wakawuya weching'anyisa na iṟumisha Ruwa kyipfa kya mbonyi tsoose waleicho na iwona chandu walewio.

Yesu Kaṙumbuyo Rina

²¹ Hamwiṙe mfiri nyanya, kyiyeri kyeṙina mana kyamwafukie, nalelago nyi Yesu, chandu Malaika alekoamlaga kyiyeri alandemogo.

Yesu Kaendo na Hekalunyi

²² Numa ya iho lyilya kyiyeri kya iilyiro lyawo kyileafukyia, chandu mawawaso ga Mose gagambie, waleyenda na oe mṟasa Yerusalemu, wammṙambikye ko Mndumii,

²³ Chandu kyikyiṟeie mawawasonyi ga Mndumii: “Orio mana o kyisoṟo mmbele ko wamae nalago mweele ko Mndumii.”

²⁴ Wandewuta kyiano chandu kyikyigambe mawawasonyi ga Mndumii, “Mbuna tsiwi ang'u maalea gawi ga mbeta.”

²⁵ Na halya Yerusalemu hawewoṙe mndu ekyelago Simion, na oe nyi mndu msumganyi, akundi na iowuo Ruwa, echiweṙelyia kyiyeri kya Waisiraelyi, iwiyiṟio moo na Mumuyo Mweele nawei na oe.

²⁶ Na oe nawemmbie nyi Mumuyo Mweele kye echipfa alawona Kristo o Mndumii-pfo.

²⁷ Kyasia kacha na hekalunyi echisongoyo nyi Mumuyo; na lyilya wafee waleende mana ulya Yesu na numba, kundu wammbutie chandu kyiwekyigambe.

²⁸ Oe amonyi nalemwambilyia kaana Ruwa, echigamba,

²⁹ “Wulalu Mndumii, noenenga kyisinga kyapfo momu, kui ufoṟo chandu ugambie.

³⁰ Kyipfa meso gako gawona wukyiro wopfo,

³¹ ulewuṟeyeṟia wandu woose;

³² Ngyeela yelyimika Masanga, na iwa mng'ano o wandu wapfo Isiraelyi.”

³³ Na awuye na wamae waweiṟiyio kyipfa kya isho shileṙeṙo kyipfa kyakye.

³⁴ Simion kawawikyia mboṟa, kawia Maria, wamae, “Ichu nammbikye kyipfa kya ioloka na igoṟoka lya wandu wafoi wakyeri Isiraelyi, na iwa kyindo kya maṟiyisho kyechiṙeṙo uwicho.

³⁵ Na iyoe kumonyi, kyechiwa cha ilyi ushu loiṙa na mrimenyi kopfo, kundu mrima ya wandu wafoi igalutso.”

³⁶ Kuwewoṙe moonguo shisuku o kyika, ekyelago Ana, mana o Fanuelyi, o ushari lo Asheri, na maka yakye iwefoi. Nalekoamkaa na mii maka mfungaaṙe wookyia kyiyeri alealyiko.

³⁷ Na oe nyi mka mkusu o maka makumi nyanya na ina, ekyewuka hekalunyi-pfo, indi nyi iterewa Ruwa kyio na kyingoto echikuretekyia na iterewa.

³⁸ Ichu nalecha kyiyeri kyilya kyilya kaana Ruwa, na woose waweiweṙelyia wukyiṟo kulya Yerusalemu kawawia mbonyi tsakye.

Iwuya na Nasareti

³⁹ Na kyiyeri walemarisa iwuta shoose chandu kyikyigambe mawawasonyi ga Mndumii, walewuya na Galyilaya mṟasa mṟinyi kowo, Nasareti.

⁴⁰ Mana ulya kang'ana, kaengyeṟika pfinya, aichuo wuṟango na isaṟia lya Ruwa lyiwei wuye yakye.

Yesu Hekalunyi

⁴¹ Kyasia, wafee wakye wekyeyenda Yerusalemu orio maka, kyiyeri kya mfiri ung'anyi o Pasaka.

⁴² Na kyiyeri alesutsa maka ikumi na iwi, waleṙo chandu kyiwekyeri mwichiwie o mfiri ung'anyi.

⁴³ Na mfiri yawo yekaa Yerusalemu yamsie, kyiyeri kya iwuya lyawo, mana ulya Yesu naleṙio numa kulya Yerusalemu, na wafee wakye waweichi-pfo.

⁴⁴ Nawo wakakusaṟa kye nakyeri wandunyi, wakayenda handu ha mfiri umwi, wechimpfula wandunyi wa kyishari kyakye na woṙiao,

⁴⁵ na lyilya walalemmbona, wakawuya na Yerusalemu wechimpfula.

⁴⁶ Na hamwiṙe mfiri iṟaṟu wakammbona hekalunyi, aṙamie makyiṙi-gawi ga walosha, echiwaaṙanyia na iwawesa shindo.

⁴⁷ Na woose waleicho shilya awegamba waleṟiyio kyipfa kya wuṟango wokye na chandu aweiwagaluo.

⁴⁸ Lyilya walemmbona waleṟiyio, na wamae kammbia, “Mono-ko, ny'kyilyi oluwutia kuṙi? Awuyo na inyi luwekupfula luwoṙo nyi fowa mrimenyi.”

⁴⁹ Kawawia, “Kyitewe mungyipfula ny'kyi? Muichi kyangyikooya ikaa numbenyi ya Awu oko?”

⁵⁰ Nawo walemanya kyindo-kyo alewawia-pfo.

⁵¹ Kayenda nawo mṟasa Nasareti, na oe nawekyewaindia; na wamae kawika isho shoose mrimenyi kokye.

⁵² Na Yesu kang'ana, echiengeṟika wuṟango, echichihiṟa Ruwa na wandu.