Luka 15 - Kivunjo New Testament 1999

Mfano wo Ondo Lyiṙekyie

¹ Kyasia wesania ukamba woose na wanyamaṟi wawetikyira kufuhi na oe wamwaṙanyie.

² Mafarisayo na walosha wa mawawaso wakamnunuwia, wechigamba, “Mndu-chu nekyeambilyia wanyamaṟi, na ngoseṟa nekyelya nawo.”

³ Kawawia mfano-chu, echigamba,

⁴ “Nyi wui konyu, awoṙe moondo igana, lyimwi lyikaṙeka ho, alechiṙa galya makumi kyenda na kyenda patenyi, nandepfula lyilya lyiṙekyie mṟasa nalyiwone?

⁵ Na oe kamlyiwona, nekyelyiwika mayewenyi gakye amchihiye.

⁶ Na kamshika kanyi kokye, nekyelaga mbuya tsakye na wamṟasa wakye, kawawia, ‘Chihiyonyi hamwi na inyi, cha kyipfa ngammbona ondo lyako lyiweṙekyie.’

⁷ Ngyimmbia nyi wuṙo kochiwaṙa sia ruwewu kyipfa kya mnyamaṟi umwi echiṙumbuya wunyamaṟi, kuta kyipfa kya wasumganyi makumi kyenda na kyenda walawaṟi iṙumbuya wunyamaṟi.”

Shilyingyi Iweṙekyie

⁸ “Ang'u kuwoṙe mndu mka uha awoṙe shilyingyi ikumi, kaṙetsa imwi alechikoṟa taa na iaiya numba, na ipfula kui wuragari mṟasa naiwone?

⁹ Na kamwiwona, nekyelaga mbuya tsakye na wamṟasa wakye, kawawia, ‘Chihiyonyi hamwi na inyi, cha kyipfa ngawona-se shilyingyi iya iweṙekyie.’

¹⁰ Ngyimmbia, ‘Nyi wuṙo kuwoṙe sia mbele ya malaika wa Ruwa kyipfa kya mnyamaṟi umwi aṙumbuya wunyamaṟi.’ ”

Mfano o Mana Aweṙekyie

¹¹ Kagamba, “Mndu umwi nawewoṙe wana wawi.

¹² Ulya mtutu kawia awuye, ‘Papa, ngyienenga ugawi loko lungyiwaṟi.’ Kawagawia shindo shakye.

¹³ Na komiiṙe mfiri ngyaangu, ulya mtutu kasania shoose, kayenda kyaro uruka lo kuleshi; kaola-ola masaa gakye mbonyinyi tsa wuṟui.

¹⁴ Na amwole-ole shoose, kukocha njaa ing'anyi kulya urukyenyi, na oe kawooka iuṟa kyindo kyelyio.

¹⁵ Kandeterewa kyiṟundio ko mndu umwi o uruka lulya, na oe kamṙuo ṙemenyi lyakye iambuya nguwe.

¹⁶ Kalanga ilya makanda gawekyelyio nyi nguwe, maa kuwoṙe mndu alemwenenga kyindo-pfo.

¹⁷ Kyiyeri alekusaṟa mrimenyi kokye, nalegamba, ‘Nyi waṟundi wenga wa awu oko wekyelya shelya na itsugaṟa, na inyi iha ngyiipfa njaa?’

¹⁸ Ngyefuma, ngyiyende ko awu oko ngyimmbie, ‘Papa, ngyileṙekyio Ruwa na iyoe.

¹⁹ Ngyiwaṟi ngyilago mono-pfo-se-pfo. Ngyigaluo cha umwi o waṟundi wapfo.’

²⁰ Kafuma kayenda ko awuye. Kyiyeri awekyeri kuleshi, awuye nalemmbona, kamsaṟia, kakapa mteeṟa, kamwolokyia ipfo nzingonyi kamkomba mnu.

²¹ Mana ulya kammbia, ‘Papa, ngyileṙekyio Ruwa na iyoe; ngyiwaṟi ngyilago-se mana opfo-pfo.’

²² Kyaindi awuye nalewia waṟundi wakye, ‘Endenyi iwinyi nguwo ngyicha, mumṟikye; mṟikyenyi na peti kyimnyoenyi, na shiaṙu maṙendenyi.

²³ Endenyi ngache iya ngyinoru muishinje; na soe lulye na ichihiyo.

²⁴ Cha kyipfa mana-chu oko nawepfiie, na oe naṟuka; naweṙekyie, na oe nawono.’ Wakawooka ianga na ichihiyo.

²⁵ Kyasia, mana ulya okye mmbele nawekyeri ṙemenyi na lyilya aweicha na itikyira kufuhi na numba, naleicho ṟui lya shiimbo na temo.

²⁶ Kalaga mṟundi umwi, kammbesa, ‘Mbonyi-tso tsaloṟa-kyi?’

²⁷ Kammbia, ‘Mono-womoo nacha, na awuyo namshinjia ngache gyinoru, kyipfa nammbona-se ai na moo.’

²⁸ Kasuo, kalega iiṙa na numba. Kyasia awuye kafumia nja, kamterewa.

²⁹ Kagaluo awuye, kagamba, ‘Inyi ngyilekuṟundia maka-i yoose, maa ngyilandekuṙekyio-pfo, kyaindi ulandengyienengye maa kyiṙaina, ngyichihiyo na mbuya tsako-pfo.

³⁰ Kyaindi, kyiyeri mana-chu opfo acha, alelya shindo shapfo hamwi na maṟai nomshinjia ngache gyinoru.’

³¹ Kammbia, ‘Mono-ko, iyoe nukyeri na inyi mfiri yoose, na shoose ngyiwoṙe nyi shapfo.

³² Lyingyi-se, ichihiyo na ishina kyiwaṟi cha kyipfa mono-wama-chu opfo nawepfiie, na oe naṟuka; naweṙekyie, na oe nawono.’ ”