2 Wakorinto 8 - Kivunjo New Testament 1999

Ilekyia lya Kyikristiano

¹ Lyingyi-se, wana wa wana waṙu, lummbia ulogo lo isaṟia lya Ruwa, siṟi tsa Makyedonia tsileenengo;

² kyipfa kyiyeri waweiyesho kui wukyiwa wung'anyi, sia yawo na wufofo wowo wung'anyi mnu wuleengyeṟa wunjama wo ilekyia lyawo.

³ Kyipfa ngyimuṟingyishia kye, kui pfinya tsawo, na ngoseṟa ya pfinya tsawo, kulawoṙe iitiko nyi mndu walewuta shindo shawo;

⁴ wechiluterewa mnu ko mbonyi tsa isaṟia-lyi, na iṟunda-lyi lyeṟundia wandu wa Ruwa.

⁵ Lyingyi-se walewuta kuṙi chi chandu luwekusurie tikyi-pfo, indi kuwooka waleṙambika mrima yawo ko Mndumii; na koṙu taa, iṙuana na chandu Ruwa akundi.

⁶ Mṟasa lukoikyimbia Tito naafutsie isaṟia-lyi konyu chandu oe alekoalyiwooka.

⁷ Kyaindi chandu muwoṙe shindo shifoi, iiṙikyia, iṙeṙa, na wuṟango, na wuragari woose, na ikunda lyanyu koṙu soe; kyasia na wuṙo muambilyie wuingyi wo isaṟia-lyi taa.

⁸ Ngyiṙeṙa kundu ngyimutsindikye-pfo, indi kui wuragari wo wandu wengyi ngyimanye wusimiri wo ikunda lyanyu.

⁹ Kyipfa mommanya isaṟia lya Mndumii oṙu Yesu Kristo, maa chandu awekyeri mnjama, kyipfa kyanyu, nalewa mkyiwa kundu nyoe muiṙime iwa wanjama kui wufofo wokye.

¹⁰ Na inyi kyipfa kya ikyo, ngyigamba kuṙi, kyachia ko ura lonyu muwookye iwuta shilya mulewooka maka ulesia. Nyoe muwekyeri wa kuwooka iwuta kuṙo.

¹¹ Kyaindi wulalu afutsienyi kyindo-kyo; kundu chandu muwelangyie itarama, pfuṟukanenyi kuṙo chandu mochiiṙima, muafutsie.

¹² Kyipfa kokooya mndu awoṙe mrima o tarama, Ruwa nekyeambilyia kyilya echiiṙima iwuta, ekyerika kya ngoseṟa-pfo.

¹³ Kyipfa ngyigamba isho, kundu wengyi wachihiyo na nyoe muwone wukyiwa-pfo;

¹⁴ indi mbonyi tsiwe necha; kyiyeri-kyi kya wulalu wuingyi wonyu wutarame iuṟa lyawo, kundu na wuingyi wowo wumutarame nyoe kyiyeri nyoe mulawoṙe; kundu mbonyi tsiwe necha.

¹⁵ Chandu kyikyiṟeie, “Alesania shifoi, aleengyeṟikyio-pfo, maa ulya alesania shitutu aleuṟa kyindo-pfo.”

Tito na Woṙoe

¹⁶ Kyaindi Ruwa naṟumisho, ulya mowika wuragari wulya wulya kyipfa kyanyu mrimenyi ko Tito.

¹⁷ Kyipfa naleambilyia loi iikyimbio lyilya ngoseṟa. Lyingyi-se echiwika wuragari, nalepfunga kyaro kya iyenda konyu kulawoṙe iitiko.

¹⁸ Na hamwi na oe lukoṙuma mono-wama ulya kyiṟumi kyakye Nduminyi Ngyicha kyileṙunganana siṟinyi koose.

¹⁹ Maa chi wuṙo tikyi-pfo, indi nalesambuṟo nyi siṟi na iyenda kyaro hamwi na soe mbonyinyi tsa isaṟia-lyi, lulyiṟundia, kundu Mndumii naṟumisho, ikuṟeyeṟa lyaṙu lyimanyikye.

²⁰ Lochikuringa na kyindo-kyi, mndu alachewona ṙeko lyaṙu mbonyinyi tsa kyisumbo-kyi lukyiṟundia;

²¹ lukosonguo ikusaṟa gai mecha, chi mbele ya Mndumii tikyi-pfo, indi na mbele ya wandu.

²² Na soe hamwi nawo loṙuma mono-wama oṙu lulemmbona kyiyeri kyileshi kye nawoṙe wuragari, na wulalu nawoṙe wuragari ngoseṟa mnu kyipfa kya ikusuria lying'anyi awoṙe konyu.

²³ Kyasia mndu kakunda mbonyi tsa Tito, oe nyi mongari oko, na mndu ngyekyeṟunda na oe kyipfa kyanyu; na mndu kakunda mbonyi tsa wana wa wama waṙu, wo nyi wandu wawaṙume nyi siṟi, na mng'ano o Kristo.

²⁴ Kyasia waloṟenyi mbele ya siṟi wuloi wo ikunda lyanyu, na ikushela lyaṙu kyipfa kyanyu.