2 Wakorinto 6 - Kivunjo New Testament 1999

¹ Na soe lukoṟunda handu hamwi na oe lumuterewa maa mulaambilyie isaṟia lya Ruwa wulya.

² (Cha kyipfa naigamba, “Kyiyeri kyiiṙikyie ngyilekuaṙanyia, mfiri o wukyiṟo ngyilekutarama.” Kyiyeri kyiiṙikyie nyi wulalu; mfiri o wukyiṟo nyi wulalu.)

³ Maa lulawe wandu wetewe wengyi ioloka kyindonyi kyoose, kundu ṙeko lyilawono iṟundenyi lyaṙu.

⁴ Indi orio kyindonyi luiwuta luwone kyiṟumi kyicha, cha waṟundi wa Ruwa; kui wusimiri wung'anyi, wukyiwenyi, fowenyi, matuuronyi.

⁵ Ngaponyi, shipfungonyi, wuṟiingyinyi, ilya wukyiwa, ilaa kyiṙombo, ikuretekyia.

⁶ Mkaṟonyi ngyicha, wuṟangonyi, isimiria, wupfererinyi, Mumuyonyi Mweele, ikundenyi lyilawoṙe wukulembecheṟi.

⁷ Ṙeṙonyi lya loi, pfinyenyi ya Ruwa; kui shisha sha wusumganyi sha kuwoko ko kulyoe na sha kuwoko ko kumoso.

⁸ Kui kyiṟumi na sonu; kui iṙeṙo uwicho na iṙeṙo necha; cha wandu wailemba, indi lukyeri wandu wa loi.

⁹ Cha walaichio, indi waichio mnu; cha waipfa, ate lukyeri na moo; cha waitoṟisho, indi walaiwoogo.

¹⁰ Cha wandu wawoṙo nyi fowa, indi mfiri yoose luwoṙe sia; cha wakyiwa indi lochiiritsa wafoi; cha walawoṙe kyindo, indi luwoṙe shido shoose.

¹¹ Luilosha kulawoṙe wuowu konyu nyoe Wakorinto. Mrima yaṙu yaloṟa ikunda konyu.

¹² Mrima yaṙu yamukunda nyoe, indi mrima yanyu mukoishinga.

¹³ Kyasia kundu mutae iṙuana na chandu muleambilyia (ngaṙeṙa na nyoe cha wana watutu) na mrima yanyu iweloṟe ikunda taa.

Kushowenyi na Wandu Walaiṙikyie Ruwa

¹⁴ Maa mulasanzo hamwi na walaiṙikyie, chandu kyilai sungusinyi; kyipfa kuwoṙe umbuya o mbaṟe iha kyiiṙi kya wusumganyi na wunyamaṟi? Lyingyi-se hawoṙe isanza lya mbaṟe iha kyiiṙi kya ngyeela na meema?

¹⁵ Kuwoṙe iiṙikyiana lya mbaṟe iha kyiiṙi kya Kristo na ulya Mmbicho? Ang'u ulya aiṙikyie nawoṙe kyi hamwi na ulya alaiṙikyie?

¹⁶ Lyingyi-se hawoṙe iiṙikyiana lya mbaṟe iha kyiiṙi kya hekalu lya Ruwa na ifano? Cha kyipfa soe nyi hekalu lya Ruwa akyeri na moo; chandu Ruwa alegamba kye, “Ngyechikaa mrimenyi kowo na ichumia kyiiṙi kyawo na inyi ngyewa Ruwa owo, nawo wechiwa wandu wako.”

¹⁷ Koikyo, “Wukyenyi kyiiṙi kyawo, mukae kuleshi nawo, Mndumii nagamba, Maa mulapaaye kyindo kyifanyi, na inyi ngyemuambilyia.

¹⁸ Ngyewa Awu konyu, na nyoe mochiwa wana koko wa kyisoṟo na wa kyika, Mndumii Mopfinya nagamba.”