2 Wakorinto 5 - Kivunjo New Testament 1999

¹ Cha kyipfa luichi kye mmbiu yaṙu lukyeri nayo iha wuyanenyi ikamnyamaṟika, luwoṙe numba iwukyie ko Ruwa, numba ilangyiwikye kui mawoko, ikyeri ya mlungana ruwewu.

² Kyipfa kyiiṙi kya numba-i luiwawio lochilanga mnu ienengo kanyi koṙu kuwukyie ruwewu;

³ kundu lukomṟiko mmbiu ungyi lochiwono lui-se kyiṟanguoe-pfo.

⁴ Cha kyipfa soe lukyeri kyiiṙi kya mmbiu-i luwawio, lochilemio; chi kye lukundi iwuta mmbiu-chu okyepfa-pfo, indi lulangyie iṟiko ulya ulekyepfa, kundu kyilya kyekyepfa kyimeṟo piu nyi moo.

⁵ Kyasia ulya aleluṟeyeṟia isho nyi Ruwa, na oe naleluenenga Mumuyo okye moluringa.

⁶ Kyasia mfiri yoose luwoṙe wukari; lyingyi-se luichi kye, kyiyeri lukyeri iha na mmbiu-chu, lukyeri kuleshi na Mndumii.

⁷ (Kyipfa lokyekaa kui iiṙikyia, chi kui iwona-pfo.)

⁸ Kyaindi luwoṙe mrima ngyikarishe; na soe luwonyi nyi nanga ilekana na mmbiu-i na ikaa hamwi na Mndumii.

⁹ Koikyo-se, kokooya lukyeri iha ang'u lukyeri iha-pfo, luipfuṟukana imchihiṟa oe.

¹⁰ Kyipfa kyalukooya soe loose iloṟo halya kyiṙinyi kya ianduyo kya Kristo, kundu orio mndu naambilyie wori wo shindo alewuta kyimmbiu, chandu alewuta, kye shicha ang'u shiwicho.

Isanzo na Ruwa kui Kristo

¹¹ Kyasia lukomanya iowuo Ruwa, lukuruo wandu; indi loṟingyishio mbele ya Ruwa. Na inyi ngyikusurie kye luwaṟingyishie mrimenyi konyu taa.

¹² Kyipfa luikushela luwenyi mbele yanyu-se-pfo, indi lumuenenga kyimaṙuma kya ikushela kyipfa kyaṙu, kundu muiṙime iwaṙa kyindo kyeloṟa mbele ya iwo waikushela ko shindo sha nja tikyi, maa chi shindo sha mrimenyi-pfo.

¹³ Kyipfa kokooya luwasuko nyi kyipfa kya Ruwa; ang'u kokooya lulawasuko, nyi kyipfa kyanyu.

¹⁴ Kyipfa ikunda lya Kristo lyiluchilyia kyipfa lowona kuṙi, kye umwi nalepfa kyipfa kya woose, kyasia walepfa woose.

¹⁵ Lyingyi-se nalepfa kyipfa kya woose, kundu wai na moo walawe-se na moo kyipfa kya mrima yawo wawenyi, indi kyipfa kyakye oe alepfa kaṟuka kyipfa kyawo.

¹⁶ Na kyawa soe wookyia wulalu luichi mndu oose kui mbaṟe ya mmbiu-pfo. Maa chandu soe lulemanya Kristo kui mbaṟe ya mmbiu, kyaindi wulalu lumwichi-se kuṙo-pfo.

¹⁷ Na kyawa kye, mndu kakaa kyiiṙi kya Kristo nawa mndu mhya; sha kacha shaiṙa, shoose shawa shihya.

¹⁸ Kyaindi shoose taa shiwukyie ko Ruwa alelusanza soe na oe kui Kristo. Na oe naleluenenga iṟunda lyesanza wandu na Ruwa.

¹⁹ Ulogo loṙu nyi kye Ruwa naisanza wandu woose na oe kui Kristo. Ruwa aletala ngyuunyamaṟi tsawo-pfo. Na naluenenga ulogo lo sanza washituwa.

²⁰ Kyasia soe luiṙeṙa handu ha Kristo, cha ilyi Ruwa naiterewa kui maṙumbu gaṙu, lumuterewa nyoe kyipfa kya Kristo musanzo na Ruwa.

²¹ Oe alaichi wunyamaṟi nalemmbuta kyipfa kyaṙu, kundu soe luiṙime iwa wusumganyi wo Ruwa kui oe.