2 Wakorinto 4 - Kivunjo New Testament 1999

Wufofo wo Wandu na Pfinya ya Ruwa

¹ Kyipfa kya ikyo, cha kyipfa luwoṙe iṟunda-lyi, chandu lulewona isaṟia, luiloloma-pfo.

² Kyaindi lulelega mbonyi tsa sonu tsikuṟiikyie, maa luichumia kui mtambo-pfo, maa isanza-sanza Ṙeṙo lya Ruwa na wongo, indi kui iṟingyishia loi lukuloṟa kye luwoṙe wusumganyi, kyilya mrima ya wandu iwonyi kye kyikyicha kyeluṟingyishia mbele ya Ruwa.

³ Kyaindi kookoya Ndumi-i Ngyicha luionguo ikuṟiikyie, yakuṟiika ko iwo waiṙeka;

⁴ wakyeri kye kyiiṙi kyawo ruwa o wuyana-wu naleshingyia makusaṟo ga iwo walaiṙikyie, walachekooyo nyi ngyeela ya Ndumi Ngyicha ya mng'ano okye Kristo akyeri fana ya Ruwa.

⁵ Cha kyipfa lukuongoya mbonyi luwenyi-pfo, indi Kristo Yesu kye nyi Mndumii; na soe luwenyi kye lukyeri waṟundi wanyu kyipfa kya Yesu.

⁶ Cha kyipfa Ruwa, icho alegamba, “Ngyeela yewaa iwuka meemenyi,” nyi oe alewaa mrimenyi koṙu, naluenengye ngyeela ya wuṟango wo mng'ano o Ruwa kyaamunyi kya Yesu Kristo.

⁷ Kyaindi luwoṙe wunjama-wu shindonyi sha teri, kundu pfinya ing'anyi ya wuiṙimi iwe ko Ruwa, maa chi iwuka koṙu-pfo.

⁸ Ngyuura tsoose luilya wukyiwa, indi luiwingo-pfo; lukapa kawi, indi luiloṟa lupfiiyo nyi mṙoe-pfo.

⁹ Lusuiṟo, indi luṙio kulawoṙe itaramo-pfo; luwiyitso wanda, indi luirumatso-pfo.

¹⁰ Mfiri yoose luṙuṙe mmbiunyi yaṙu iwoogo lya Yesu, kundu moo o Yesu uṟingyishio mmbiunyi yaṙu.

¹¹ Kyipfa soe lukyeri na moo, mfiri yoose lokyewuto lupfe kyipfa kya Yesu, kundu moo o Yesu uṟingyishio mmbiunyi yaṙu yekyepfa.

¹² Kyasia iho upfu lokyeṟunda, mrimenyi koṙu, indi moo mrimenyi konyu.

¹³ Kyaindi cha kyipfa luwoṙe Mumuyo ulya ulya o iiṙikyia; chandu kyileṟeio, “Ngyileiṙikyia, na kyipfa kya ikyo ngyileṙeṙa.” Soe na soe luiṙikyie, na kyipfa kya ikyo luṙeṙa.

¹⁴ Luichi kye ulya aleṟutsa Mndumii Yesu nechiluṟutsa na soe hamwi na Yesu, na iluende na mbele yakye hamwi na nyoe.

¹⁵ Cha kyipfa mbonyi tsoose nyi kyipfa kyanyu, kundu isaṟia-lyo lyikaengyeṟika mnu, ko iwo wakyeri wafoi kyiano kyiengyeṟikye, na Ruwa nang'anyiso.

Ikaa kui Iiṙikyia

¹⁶ Koikyo luiloloma-pfo; indi maa chandu kyanja mmbiu yaṙu iloṟa iuṟa pfinya; mrimenyi koṙu lukokohoka orio mfiri.

¹⁷ Kyipfa matuuro gaṙu gai maangu, gakyeri ga kyiyeri kyifuhi tikyi, gekyeluwutia mng'ano o mlungana uingyikyie mnu.

¹⁸ Lulaambuye shekyewono indi shilya shilekyewono. Shilya shekyewono shekyekaa kyiyeri kyifuhi, indi shilya shilekyewono shekyekaa mlungana.