2 Wakorinto 3 - Kivunjo New Testament 1999

Waṟundi wa Mma Mhya

¹ Ngyesa luwooka-se ikushela luwenyi? Ang'u lukundi-se cha iwo wengyi, paruo tsiwoṙe kyiṟumi tsiche na konyu, ang'u iwuka konyu?

² Nyoe nyi paruo yaṙu yeloṟa soe luwaṙume nyi siṟi, ingyiṟeie mrimenyi koṙu, imanyikyie na pata na isomo nyi wandu woose.

³ Muṟingyishio kye mowa paruo iwukyie ko Kristo lulemṙambika nyoe, ingyiṟeie chi kui wiino-pfo, indi na Mumuyo o Ruwa ai na moo; chi shibaunyi sha magoe-pfo; indi shibaunyi shikyeri nyi mrima ya nyama.

⁴ Na ikusuria-lyo lulyiwoṙe mbele ya Ruwa kui njia ya Kristo.

⁵ Chi kye soe lochiiṙima iwuta kyindo kyoose kui pfinya tsaṙu luwenyi-pfo, wuiṙimi woṙu woose wuwukyie ko Ruwa.

⁶ Na oe nyi oe alelutarama iwa waṟundi wa mma mhya; chi wa kyiṟeio-pfo, indi wa Mumuyo; cha kyipfa kyiṟeio kyekyewaaga, indi Mumuyo okyekyiṟa.

⁷ Kyasia, kokooya iṟunda lya upfu lyilekolyaṟeio na itaricho magoenyi, lyilecha mng'anonyi, mṟasa Waisiraelyi walaiṙime iitukuya kyaam kya Mose karii, kyipfa kya mng'ano o kyaam kyakye, nacho nyi-we mng'ano uweiilachika.

⁸ Ngyesa iṟunda lya Mumuyo lyechiengyeṟika iwa mng'anonyi-pfoe?

⁹ Cha kyipfa kokooya iṟunda lya ianduyo lyiwoṙe mng'ano, iṟunda lya wusumganyi lyiwoṙe mng'ano o ngoseṟa.

¹⁰ Kyipfa maa lyilya lyileng'anyiso lyiwewoṙe mng'ano kuṙi-pfo, kyipfa kya mng'ano uiengyeṟika mnu.

¹¹ Cha kyipfa kokooya lyilya lyiweilachika lyiwewoṙe mng'ano, ngoseṟa mnu lyilya lyekyekaa ho mlungana lyiwoṙe mng'ano ung'anyi ngoseṟa.

¹² Kyasia, kyipfa luwoṙe iweṙelyia lya mbaṟe-i luwika wuragari na wukari wung'anyi.

¹³ Na soe chi chandu Mose alewika kyindo wuye ya kyaam kyakye, kundu Waisiraelyi walaitukuye mnu mafurumionyi ga kyilya kyiweilachika-pfo;

¹⁴ indi makusaṟo gawo galewiko meema. Kyipfa maa mṟasa inu, kyiyeri Mma Mku okyesomo, kyindo-kyo kyeshikyia kyaam kyekyeweṙio ho. Kyimwi na igamba kye, kyileloṟo kye kyindo-kyo kyeshikyia kyewuto ho kyiiṙi kya Kristo-pfo.

¹⁵ Indi mṟasa inu, kyiyeri uwawaso lo Mose lokyesomo, kyindo-kyo kyekyeṙio mrimenyi kowo.

¹⁶ Indi kyiyeri kyoose wechigalukyia Mndumii, kyindo kyilya kyeshikyia kyaam kyewuto ho.

¹⁷ Kyasia “Mndumii” nyi oe Mumuyo; kyaindi handu akyeri Mumuyo o Mndumii, iho nyi ho-ndu hawoṙe ikaa kulawoṙe ichilyio nyi kyindo.

¹⁸ Kyaindi soe loose, kui kyaam kyilakyishikyie nyi kyindo, luloṟa mng'ano o Mndumii, cha mng'ano uwukyie kyiyewonyi, lokyeilacho luwe cha mfano-cho icho, iwuka mng'ano mṟasa mng'ano ung'anyi ngoseṟa cha mng'ano uwukyie ko Mndumii, akyeri Mumuyo.