2 Wakorinto 2 - Kivunjo New Testament 1999

¹ Kyaindi mrimenyi koko ngyilekusuria kuṙi, ngyilache-se na konyu kui ikuinaṙia.

² Kyipfa inyi ngamtewe mukokuinaṙia, kyasia nyi wui engyichihiṟa inyi sile nyi ulya inyi ngamwenenga ikuinaṙia?

³ Na inyi ngyilemṟeia kyindo-kyo ikyo, kundu kyiyeri ngyechicha ngyilacheenengo ikuinaṙia nyi walya kyiwengyiwaṟi ichihiyo kyipfa kyawo; ngyechimukusuria nyoe moose kye sia yako nyi yanyu moose taa.

⁴ Ngyilemuṟeia paruo kui mcheṟeṟe ifoi na mrima uwoṙe fowa na ikuinyṙia lying'anyi. Chi kye muwaṙe ikuinaṙia-pfo, indi muiṙime imanya ikunda lyako konyu chandu lying'anyi.

Ihooṟiana

⁵ Kyaindi kokooya mndu atewe oṙoe iwaṙa ikuinaṙia, angyitewe inyi tikyi-pfo, indi kui ura lumwi (ngyilacheewa ṟio mnu ko mndu), namutewe nyoe moose iwaṙa ikuinaṙia.

⁶ Ianduyo lyilya mndu-cho aleenengo iwuka ko wandu wafoi lyimshikyie.

⁷ Maa kyilaṙuṙanyi na isho, nyi nanga mumhooṟie na immbiyiṟia moo, mndu cha icho alachemeṟo nyi ikuinaṙia lyakye lying'anyi mnu.

⁸ Koikyo ngyimuterewa mumṟingyishie ikunda lyanyu.

⁹ Kyipfa ngyileṟeia kyipfa kya ikyo taa, kundu ngyimanye na pata konyu kye muleindia shindo shoose.

¹⁰ Kyaindi kokooya mohooṟia mndu kyindo kyoose, na inyi ngyewemhooṟia; kyipfa maa inyi, kookoya ngahooṟia mndu kyindo kyoose, ngamhooṟia kyipfa kyanyu mbele ya Kristo.

¹¹ Satana alaenengo ṙaawa lyelulemba; cha kyipfa lolemo imanya ngyeṟo tsakye-pfo.

Paulo Mṟinyi o Tiroa

¹² Kyasia kyiyeri ngyileshika Tiroa kyipfa kya Ndumi Ngyicha ya Kristo, Mndumii kangyipfunguya moongo.

¹³ Ngyilewona sia mrimenyi koko-pfo, kyipfa ngyilewona mono-wama oko Tito-pfo, indi ngyilesamana nawo, ngafuma iyenda Makyedonia.

Iwinga kui Itaramo nyi Kristo

¹⁴ Kyaindi Ruwa naano, ekyeluenenga ichihiyo kyipfa kya wuwinzi kyiiṙi kya Kristo, na iloṟa mpfaamo mcha o ulogo lo Kristo handu hoose kui iṟunda lyaṙu.

¹⁵ Cha kyipfa soe nyi mafuṙa ga Kristo, gekyepfaama necha, mbele ya Ruwa, ko iwo waikyiṟo, na ko iwo waiṙeka.

¹⁶ Ko iwo wa kawi mpfaamo o upfu okyeende upfu; ko iwo wa kuwooka mpfaamo o moo okyeende moo. Na oe nyi wui echiiṙima shindo-sho?

¹⁷ Cha kyipfa soe chi kyimwi na wandu wafoi wekyekapa mbucha na ulogo lo Ruwa-pfo. Soe luonguo ulogo lo Ruwa kui wuwaṙami wo mrima cha wandu waleṙumo nyi Ruwa, luwalungye na Kristo.