2 Wakorinto 13 - Kivunjo New Testament 1999

Malosho na Shiiṟikyiṟo Shefurumia

¹ Nyi kamba lya kaṟaaṟu inyi icha na konyu. Kui maṙumbu ga waṟingyishi wawi ang'u waṟaaṟu orio ṙeṙo lyechimanyika na pata.

² Ngasonguo immbia, na chandu ngyiwekyeri ho lya kawi, na wuṙo maa wulalu ngyilakyeri ho, ngyimmbia na pata iwo walewuta sha wunyamaṟi wookyia kyiyeri-kyo, na wengyi woose, kye ngacha, ngyehooṟia-pfo.

³ Cha kyipfa muipfula chandu Kristo akyeri, icho aiṙeṙa mrimenyi koko, ulya alakyeri mfofo konyu, indi nawoṙe pfinya mrimenyi konyu.

⁴ Kyipfa nalewoogio msalabenyi, wufafenyi, kyaindi nai na moo kui pfinya tsa Ruwa. Kyipfa maa soe lukyeri wafafa kyiiṙi kyakye; indi lochikaa na moo hamwi na oe kui pfinya tsa Ruwa.

⁵ Kuruwe-ruwenyi muwenyi kye mukyeri iiṙikyienyi. Kuṟingyishienyi muwenyi. Ang'u muichi muwenyi kye Yesu Kristo nakyeri mrimenyi konyu? Sile molego.

⁶ Kyaindi ngyikusurie kye momanya kye soe lulelego-pfo.

⁷ Na soe luiterewa Ruwa, maa mulawute kyindo kyoose kyiwicho. Chi kundu soe lukuloṟe kye luwaiṙikyie-pfo, indi nyoe muwute kyilya kyikyicha, maa chandu soe lukyeri cha wandu walelego.

⁸ Kyipfa loiṙima iwuta kyindo kyoose kyilakyeri kya loi-pfo, indi kyipfa kya wuloi.

⁹ Kyipfa luchihiyo, kokooya soe lukyeri wafofo, na nyoe muwoṙe pfinya. Lyingyi-se loterewa muwe wandu waafutsie kyiiṙikyia.

¹⁰ Kyipfa kya ikyo, ngyiṟeia ishi ngyilakyeri ho, kundu ngyikyeri ho, ngyilaṟunde kui wuchilyi wulya ngyileenengo nyi Mndumii, kui ikarisha mrima maa chi iinyamaṟa-pfo.

¹¹ Numa ya iho, wana wa wama, nakonyu. Muafutsie, muwiyiṟio moo. Kusurienyi kyimwi, mukae ufoṟonyi. Na Ruwa o ikunda na ufoṟo nechikaa hamwi na nyoe.

¹² Iṟikyiṟanenyi chandu walya waiṙikyie Yesu wekyeiṟikyiṟana.

¹³ Wandu wa Ruwa woose wamuiṟikyiṟa.

¹⁴ Isaṟia lya Mndumii Yesu Kristo, na ikunda lya Ruwa, na isanza lya Mumuyo Mweele, lyikae na nyoe moose.