2 Wakorinto 11 - Kivunjo New Testament 1999

Paulo na Wasu wa Wongo

¹ Nanga muweṙuana na inyi wutondonyi woko kyitutu! Yee, muṙuane na inyi.

² Kyipfa ngyimunyeng'ia, wunyeng'i wo Ruwa; kyipfa ngyilemukosia msoṟo umwi, kundu ngyiendie Kristo mana mkyega mcha.

³ Kyaindi ngyiowuo; chandu njoka iya ilelemba Eva kui ngyeṟo tsayo, ilachenyamaṟa makusaṟo ganyu, mukoṙa wunyotsu na wucha wonyu ko Kristo.

⁴ Kyipfa mndu oose kacha eonguo Yesu ungyi lulalemwonguo soe, ang'u mukoambilyia mumuyo ungyi alakyeri cha ulya muleambilyia, ang'u ndumi ngyicha ingyi ilakyeri cha iya muleambilyia, muwuta necha iṙuana na oe!

⁵ Kyipfa ngakusaṟa kye kuwoṙe kyindo wasu wang'anyi wawoṙe ngyilakyiwoṙe inyi-pfo.

⁶ Kyaindi maa kokooya inyi nyi mndu alaichi iṙeṙa, ikyo chi mbaṟe yako wuṟangonyi-pfo, indi ko orio kyindo luleṟingyishio konyu.

⁷ Ngyesa ngyilenyamaṟa kui iindia kundu nyoe mung'anyiso, kyipfa kya ilyi ngyilewaongoya Ndumi Ngyicha kulawoṙe wori?

⁸ Ngyilesoka siṟi tsingyi masaa gawo, ngawuta kowo kyindo kyako kyelyio kundu ngyimuṟundie nyoe.

⁹ Na inyi kyiyeri ngyiwekyeri hamwi na nyoe na ipfula kyindo kyengyitarama, ngyilewa ṟio ko mndu-pfo. Kyipfa wana wa wama walewuka Makyedonia walengyienenga orio kyindo ngyiwekundi; na inyi mbonyinyi tsoose ngyilekuringa ngyilacheewa ṟio konyu maa ale. Lyingyi-se ngyekuringa.

¹⁰ Chandu loi iya ya Kristo ikyeri mrimenyi koko, kuwoṙe mndu echiiṙima ingyiima ikushela mṟasenyi ya Akaya-pfo.

¹¹ Kyitewe ny' kyi? Ngyesa nyi kyipfa nygilamukundi nyoe? Ruwa naichi.

¹² Kyaindi kyindo ngyiwuta ngyekyiwuta, kundu ngyiwingane na iwo waipfula ṙaawa walawone, kundu kyindo-kyo waikushelyia wawono wakyeri cha soe.

¹³ Kyipfa wandu wa mbaṟe-yo-iyo nyi wasu wa wongo, wekyeṟunda kui ngyeṟo, wekyekuloṟa cha ilyi nyi wasu wa Kristo.

¹⁴ Maa chi kyindo kyeṟiyio-pfo. Kyipfa Satana oe amonyi nekyekuloṟa cha ilyi nyi malaika o ngyeela.

¹⁵ Kyasia chi kyindo kying'anyi waṟundi wakye ikuloṟa cha ilyi nyi waṟundi wa wusumganyi wakyeri kye ifurumia lyawo lyechiwa kyimwi na maṟunda gawo-pfo.

Matuuro ga Paulo cha Msu

¹⁶ Ngyigamba-se, mndu alakusaṟe kye inyi ngyimtondo. Kyaindi maa mukokusaṟa kyako kuṙo, mungyiambilyie cha tondo; kundu na inyi ngyiiṙime ikushela kyitutu.

¹⁷ Kyindo ngyiṙeṙa kyiwukyie ko Mndumii-pfo, indi nyi cha kya wutondo, kui wukari-wu wo ikushela.

¹⁸ Cha kyipfa wafoi waikushela kui mbaṟe ya kyimndu na inyi ngyekushela.

¹⁹ Nyoe, kyipfa muwaṟango, mokyeṙuana na matondo kui sia.

²⁰ Kyipfa mokyeṙuana na mndu echimmbika wutumonyi, na immbutia shindo shiwicho sha orio mbaṟe maa imukapa ipfo kyaam.

²¹ Ngyiṙeṙa kui mbaṟe ya wufofo cha ilyi luwewafofo. Kyaindi kokooya mndu awoṙe wuṟango na wukari kyindonyi kyoose (ngyiṙeṙa kyitondo), maa inyi ngyiwoṙe wuṟango na wukari.

²² Wo nyi Waebrania? Na inyi taa. Wo nyi Waisiraelyi? Na inyi taa. Wo nyi wa kyishari kya Abrahamu? Na inyi taa.

²³ Wo nyi waṟundi wa Kristo? (Ngyiṙeṙa cha msuko), inyi nyi ngoseṟa. Wukyiwenyi nyi ngoseṟa mnu; shipfungonyi nyi ngoseṟa mnu; kyiiṙi kya ikapo nyi ngoseṟa na kuta; kyiiṙi kya ikyia upfu kyiyeri kyileshi.

²⁴ Ko Wayuda kataanu ngyilekapo ka makumi gaṟaaṟu na kyenda.

²⁵ Kaṟaaṟu ngyilekapo na upoi; lyimwi ngyilekapo magoe; kaṟaaṟu ngyilenyamaṟikyio nyi ngalawa; kyingoto puti na kyio taṟaṟa ngyikyeri mṟingyenyi.

²⁶ Kui iyenda kyaro kafoi; ngataṟa tsa mfo; ngataṟa tsa wasokyi; ngataṟa iwuka ko Wayuda woṙia; ngataṟa iwuka ko wandu wa masanga gengyi; ngataṟa tsa mṟinyi; ngataṟa tsa nukyenyi ngyuumu suwa ilawoṙe maa mṟinga; ngataṟa tsa ipalyipalyinyi; ngataṟa tsa wambuya wa wongo.

²⁷ Wukyiwenyi na matuuronyi; ilaa kyiṙombo kafoi; njaenyi na wuangarinyi; kyiiṙi kya ikuretekyia kafoi; mbehonyi na iṙio kyiṟanguoe.

²⁸ Kulawoṙe ionguo shindo shingyi shifoi, orio mfiri ngyiwoṙe maṟunda ga iambuya siṟi tsoose.

²⁹ Nyi wui akyeri mfofo, na inyi ngyilawe mfofo? Nyi wui aletewo na mndu inyamaṟa na inyi ngyilawihiyo?

³⁰ Kyikangyikooya ikushela, ngyekushelyia wufofo woko.

³¹ Ruwa, Awu o Mndumii Yesu, awaṟi kyiṟumi mṟasa mlungana, naichi kye ngyiṙeṙa wongo-pfo.

³² Ipfo Dameskyi mchilyi o mangyi Areta naweiringa mṟi o Wadameskyi, kundu nangyiwaṙe;

³³ na inyi ngasotso dirishenyi lya kyiambasa ngyikyeri kyikapunyi, ngakyiṟo iwuka mawokonyi gakye.