2 Wakorinto 10 - Kivunjo New Testament 1999

Paulo Karinga Iṟunda lyakye

¹ Kyasia, inyi Paulo ngyimonyi ngyimuterewa kui wuhoo na wuyendelyi wo Kristo, inyi ngyikyeri msimiri ngyikyeri hamwi na nyoe, indi ngyilakyeri ho ngyiwoṙe wuṟango na wukari konyu.

² Yee, ngyiterewa kye ngyikyeri ho ngyilawaṙe wuṟango na wukari cha wulya ngyiwoṙe ko walya wekyelushitakyi kye soe lokyeosha shindo sha kyiwuyana.

³ Kyipfa maa chandu luosha shindo sha kyiwuyana, lokyekapana shiṙa kui mbaṟe ya kyiwuyana-pfo;

⁴ (kyipfa shisha sha shiṙa shaṙu chi sha kyiwuyana-pfo, indi shiwoṙe pfinya kyiiṙi kya Ruwa mṟasa iunduo moombo;)

⁵ lochinyamaṟa makusaṟo na orio kyindo kyekyeshingyia, kyekyeshingyia wuṟango wo Ruwa, na lochichilyia orio mndu naiṙime iindia Kristo.

⁶ Lyingyi-se lukowa lukuṟeyeṟie itaa kyiṟaache wuwicho woose, kyiyeri iiṙikyia lyanyu lyeafukyia.

⁷ Ambuyenyi shikyeri mbele ya meso ganyu. Mndu kawona oe amonyi kye nyi mndu o Kristo, nawekusaṟe kuṙi taa mrimenyi kokye, kye chandu oe akyeri mndu o Kristo, nyi wuṙo na soe.

⁸ Kyipfa maa ngakushela ngoseṟa kyitutu kyipfa kya wuchilyi woṙu (luleenengo nyi Ruwa, luiṙime imugoṟotsa maa chi imuolotsa-pfo), ngyerigo nyi sonu-pfo;

⁹ ngyilachewono cha ilyi kye ngyikundi imuowesha kui paruo tsako.

¹⁰ Kyipfa wekyegamba, paruo tsakye tsingyikari na tsioweshie; indi akyeri amonyi kyimmbiu namfofo, na maṙeṙo gakye chi kyindo-pfo.

¹¹ Mndu o mbaṟe-yo iyo nakusaṟe kuṙi, kye kyindo kyilya lokyeṟeia paruonyi lulakyeri na nyoe nyikyo lochiwuta lukyeri na nyoe.

¹² Cha kyipfa lochikaria ikutala hamwi na wandu waata wa iwo wekyekushela wawenyi, maa ikulyingatsana nawo-pfo. Wandu wekyekuloṟa kye wo nyi kyiyeṟo kyekuyeṟa, na wandu wekyekulyingatsana wo wenyi ko wenyi nyi matondo.

¹³ Kyaindi soe luikushela ngoseṟa ya chandu kyiwaṟi koṙu-pfo; indi chandu kyiwaṟi kyiyeṟo kyilya kyikyiwikye nyi Ruwa, nakyo nyi ishika mṟasa konyu.

¹⁴ Kyipfa luikulandaṟa luwenyi kuta chandu kyiwaṟi-pfo, cha ilyi lulaishika konyu nyoe; cha kyipfa lulesonguo ishika mṟasa konyu Nduminyi Ngyicha ya Kristo.

¹⁵ Maa luikushela kuta chandu kyiwaṟi, kyipfa kya iṟunda lya wandu wengyi-pfo; indi ikusuria lyaṙu nyi kye chandu iiṙikyia lyanyu lyiengyeṟika, iṟunda lyaṙu konyu lyeng'ana,

¹⁶ kundu luiṙime ionguo Ndumi Ngyicha ngyuurukyenyi tsingyi kuleshi na nyoe; kulawoṙe ikushelyia iṟunda lyiṟunde nyi wandu wengyi.

¹⁷ Kyaindi ulya mokushela, nakushele kyiiṙi kya Mndumii.

¹⁸ Kyipfa mndu moiṙikyio chi ulya ekyekushela-pfo, indi nyi ulya ekyeṟumisho nyi Mndumii.