2 Timoteo 4 - Kivunjo New Testament 1999

¹ Ngyikuwia mbele ya Ruwa na Kristo Yesu, echianduya wai na moo na wapfiie; kui iloṟo lyakye na kui Wumangyi wokye,

² onguo Ṙeṙo lya Ruwa ukuṟeyeṟe kyiyeri kyicha na kyiyeri kyilakyicha kopfo. Ṟoṟoma kui pfinya, na iikyimbia kui wusimiri woose na malosho.

³ Kyipfa kuicha kyiyeri wechilega malosho gawoṙe moo; indi kui iosha kyilya wakundi wawenyi wepfula walosha wawo wafoi, cha kyipfa wawoṙe maṙwi gesoruo-soruo shindo.

⁴ Nawo wekaa kuleshi walacheicho mbonyi tsa loi, na iindukyia malosho ga wongo.

⁵ Indi iyoe uwaṙe meena shindonyi shoose. Karishia mawicho, ṟunda iṟunda lyeonguo Ndumi Ngyicha, ṟunda kyilya kyikuwaṟi cha mṟundi o Ruwa.

⁶ Cha kyipfa wulalu inyi ngyiambilyia matuuro ga upfu, na kyiyeri kya ipfa lyako kyashika.

⁷ Ngyilekapana shiṙa ngyicha, kyaro ngamkyimarisa, Iiṙikyia ngyilelyiringa.

⁸ Numa ya iho Ruwa nangyikoomie oṟo ya wusumganyi, iya Mndumii moanduya awoṙe wusumganyi echingyienenga mfiri ulya, maa chi inyi tupu-pfo, indi na wandu woose taa wakundi iwona iloṟo lyakye.

Mbonyi tsa Paulo amonyi

⁹ Pfuṟukana icha na koko iwinyi.

¹⁰ Kyipfa Dema nalengyiṙa echikunda wuyana-wu wo wulalu, kapfunga kyaro iyenda Tesalonikye. Kyiresikye nayenda Galatia; Tito nayenda Dalyimatia.

¹¹ Nyi Luka amonyi tikyi akyeri iha hamwi na inyi. Uwute Mariko uche na oe, kyipfa nangyiwoṙie kyiira iṟundenyi.

¹² Kyaindi Tikyiko ngyilemṙuma Efeso.

¹³ Ijoho lyilya ngyileṙa ko Karipo ipfo Tiroa, kyiyeri uicha ulyiende, na shitapu shilya, ngoseṟa shilya sha njonyi.

¹⁴ Iskanda, ulya akyeri mnganya, naleloṟa wuwicho wung'anyi koko; Mndumii nemtaa iṙuana na mawuto gakye.

¹⁵ Na iyoe ukushowe na oe, cha kyipfa nalelega mnu maṙeṙo gaṙu.

¹⁶ Kyiyeri kyilya ngyilegoṟotso mengyenyi lya kuwooka kuwoṙe mndu alegoṟoka ura loko-pfo, indi woose walengyiṙa. Ngyiterewa walatalyio ṙeko kyipfa kya kyindo-kyo.

¹⁷ Kyaindi Mndumii nalegoṟoka ura loko kangyienenga pfinya, kundu kui iṟunda lyako mbonyi tsilya tsigambo nakamwi, mṟasa woose walaiṙikyie Ruwa waicho; na inyi ngakyiṟo iwuka upfunyi.

¹⁸ Mndumii nengyikyiṟa na orio kyindo kyiwicho, na ingyiringa mṟasa ngyishikye Wumangyinyi wo Ruwewu. Mng'ano ukyeri kokye mlungana na mlungana. Amen.

Shiiṟikyiṟo sha Mafurumionyi

¹⁹ Ngyiiṟikyiṟia Pirisikyila na Akyila, na walya wa kanyi ko Onesifoṟo.

²⁰ Erasto nalekaa Korinto. Tirofimo ngyilemṙa kulya Mileto, aluoe.

²¹ Pfuṟukana uche kyiyeri mbeho ilandeche. Eubulo, Pude, Lyino, Kyilaudia na wana wa wama waiṙikyie Yesu woose taa wakuiṟikyiṟa.

²² Mndumii nakae hamwi na mrima opfo. Isaṟia lyikae hamwi na nyoe.