2 Timoteo 3 - Kivunjo New Testament 1999

Mfiri ya Mafurumionyi

¹ Kyaindi umanye mbonyi-tsi kye mfiri ya mafurumionyi kowaṙa shiyeri sha ngataṟa.

² Kyipfa wandu wechiwa nyi wandu wakukundi wawenyi, wakundi heleri, wekyekuiring'isha, wawoṙe tiri, wekyelahia, walekyeindia wafee wawo, walekyeana, wa kyiwuyana.

³ Walakundi wandu wa kanyi kowo, walakundi isanzo na walya waluyanyi nawo, wekyeiria woṙoe shindo sha wongo, walekyeiṙima ichilyia lango, walang'a, walakundi mecha.

⁴ Wekyeṟiinga woṙoe, walekyeicho, wekyekushela, wakundi sia tsa wuyana kuta ikunda Ruwa.

⁵ Wawoṙe mbaṟe ya iowuo na ikunda Ruwa, kyaindi wechikana pfinya tsakye. Iwo taa ukushowe nawo.

⁶ Cha kyipfa kyiiṙi kya iwo kuwoṙe walya wekyekuwika numbenyi tsa wandu, na iwaṙa pfo waka wai matondo wawoṙe maṟio ga wunyamaṟi, waleṙoo nyi lango tsa orio mbaṟe;

⁷ wechikulosha mfiri yoose, indi walaiṙime maa ale iwaṙa wuṟango wo loi.

⁸ Na chandu Yane na Yambre walewingana na Mose, na wuṙo na iwa waiwingana na wuloi wo Ndumi Ngyicha. Nyi wandu wanyamaṟikyie mṙoe yawo, wawalege kyipfa kya iuṟa iiṙikyia.

⁹ Kyaindi wechishika kuleshi nawi-pfo, kyipfa wutondo wowo wochimanyika na pata ko wandu woose, chandu na wutondo wo iwo wulewemanyika.

Malosho ga Mafurumionyi

¹⁰ Indi iyoe noosha malosho gako, na mchumie oko, na kyilya ngyikundi, na iiṙikyia, na wusimiri,

¹¹ na ikunda, na ikarishia. Lyingyi-se na ngyuukyiwa na matuuro gako. Shindo shilengyikooya kulya Antiokyia, kulya Ikonio, na kulya Lyistira. Orio mbaṟe ya wukyiwa wung'anyi ngyilekarishia; na Mndumii nalengyikyiṟa iwuka isho shoose.

¹² Yee, na woose wakundi iwaṙa mkaṟo yeowuo na ikunda Ruwa kyiiṙi kya Kristo Yesu wechipfulutso nyashi.

¹³ Kyaindi wandu wawicho na walya wekyelemba wechiengyeṟika, na iengyeṟa iwa wawicho, wechilemba na ilembo.

¹⁴ Indi iyoe ukae kyiiṙi kya shindo shilya ulelosho na iṟingyishio, cha kyipfa nuichi nyi wakyi ulekulosha kowo.

¹⁵ Na kye wookyia wututu nulemanya shiṟeio shiele, isho shechiiṙima ikuṟangusha mṟasa uambilyie wukyiṟo kui iiṙikyia lyikyeri kyiiṙi kya Kristo Yesu.

¹⁶ Orio kyiṟeio kyiwoṙe mṟufui o Ruwa, kyikyicha kyelosha, na iikyimbia wandu kyipfa kya maṙeko gawo, na kui ilosha wandu wawe wusumganyinyi.

¹⁷ Kundu mṟundi o Ruwa nawe mndu aafutsie echiiṙima iṟunda orio iṟunda lyicha.