2 Petiro 1 - Kivunjo New Testament 1999

¹ Inyi Simion Petiro, ngyikyeri mṟundi na msu o Yesu Kristo, ngaṟeia paruo-i ko walya walewona iiṙikyia lyimwi na soe, lyiwoṙe woguru, wusumganyinyi wo Ruwa oṙu, na Mkyiṟa Yesu Kristo.

² Isaṟia lyikae konyu na ufoṟo luengyeṟo kyiiṙi kya imanya Ruwa na Yesu Mndumii oṙu.

Chandu Wakristiano Wawaṟi lwa

³ Cha kyipfa wuiṙimi wokye wo kyiRuwa wuleluenenga shindo shoose shiwaṟi moo na iowuo hamwi na iindia Ruwa, kui immanya oe alelulaga kui mng'ano okye na wucha wokye amonyi.

⁴ Lyingyi-se ko isho naleluenenga shaasa shing'anyi mnu, sha woguru, kundu kye kui ikyo muiṙime iwa hamwi na walya wawoṙe mkaṟo o kyiRuwa, mochikyiṟo iwuka wunyamaṟinyi wukyeri wuyanenyi kyipfa kya lango.

⁵ Yee, na kyipfa kya ikyo mochipfuṟukana mnu ura lonyu, iiṙikyienyi lyanyu, wikyenyi ho na wucha, na wuchenyi wonyu wuṟango.

⁶ Na wuṟangonyi wonyu meena, na meenenyi onyu wusimiri; na wusimirinyi wonyu iowuo na iindia Ruwa.

⁷ Na kyiiṙi kya iowuo na iindia Ruwa, ikundana lya wana wa mka; na kyiiṙi kya ikundana lya wana wa mka, ikunda.

⁸ Kokooya shindo sha mbaṟe-i-iyi shakaa konyu na iingyikyi, shemuenenga nyoe iwaṙa wuragari na ikumbia ndunda ngyicha, kui imanya Mndumii oṙu Yesu Kristo.

⁹ Kyipfa ulya alawoṙe isho nyi kyipfupfuṟe, echiiṙima iwona shindo shikyeri kuleshi-pfo, nawaṙima kulya iyeṟemtso maṙeko gakye ga kacha.

¹⁰ Koikyo wana wa wama, pfuṟukanenyi ngoseṟa ikarisha ilago lyanyu na isambuṟo lyanyu; kyipfa mukowuta isho mochikapa ṙende-pfo.

¹¹ Kyipfa kuṙi mochitaramo ienengo iiṙa na Wumangyinyi wo mlungana wo Mndumii oṙu, Mkyiṟa oṙu Yesu Kristo.

¹² Koikyo ngyikusurie imukumbuṟa isho mfiri yoose, maa chandu mushiichi na iṟingyishio kyiiṙi kya loi mukyeri nayo.

¹³ Na inyi ngyiwonyi nyi sungusinyi, ko kyiyeri-kyi ngyikyeri na moo, iwapaaya-paya kui iwakumbuṟa.

¹⁴ Ngyiichi kye ipfa lyako lyiafukyia iwinyi, chandu Mndumii oṙu Yesu Kristo alengyiloṟa.

¹⁵ Kyaindi ngyechipfuṟukana, kye ngampfa inyi muiṙime ikumbuo mbonyi-tso.

Walya Walewona Mng'ano o Kristo

¹⁶ Kyipfa luleosha shindo shileṟeio kui wuṟango na ngyeṟo kyiyeri lulemmanyisha nyoe pfinya tsa Mndumii oṙu Yesu Kristo na icha lyakye-pfo; indi lulekolowona luwenyi wung'anyi wokye.

¹⁷ Kyipfa naleambilyia iwuka ko Ruwa Awu kyiṟumi na mng'ano, iho-ndu aleendio ṟui lyilewuka mng'anonyi ung'anyi, “Ichu nyi Mana oko, mkunde oko, ngyimchihie kyipfa kyakye.”

¹⁸ Na ṟui-lyo soe lulelyiicho lyechiwuka Ruwewu kyiyeri luwekyeri na oe fumvunyi lyilya lyiele.

¹⁹ Na soe luiṙikyie necha shilya weonguo shisuku wagambie, shilya nyoe mukoshiambuya necha, cha taa ilyimika meemenyi, mowuta necha mṟasa kyiyeri kochikya na nyenyeri ya ngamenyi iwaa mrimenyi konyu.

²⁰ Mochimanya ulogo-lu kuwooka kye kuwoṙe ionguo shisuku shiṟeionyi lokyetambuluo chandu mndu mlyiwe akunda tupu-pfo.

²¹ Kyipfa ionguo shisuku lyichie na handu hoose chandu mndu akundi-pfo; indi wandu waleṙeṙa mbonyi tsiwukyie ko Ruwa, wechisongoyo nyi Mumuyo Mweele.