1 Wakorinto 6 - Kivunjo New Testament 1999

Iṙuo Mndu Aiṙikyie Ruwa Mengyenyi

¹ Ngyesa kokooya kuwoṙe mndu konyu awoṙe moondu na oṙoe nekaria iṙuo moondu-cho mbele ya wandu walawasumganyi, na chi mbele ya wandu wa Ruwa-pfo?

² Ang'u muichi kye wandu wa Ruwa wechianduya wandu wa wuyana? Na kokooya wandu wa wuyana wechianduyo nyi nyoe, ngyesa muwaṟi ianduya maa shindo shitutu-pfoe?

³ Muichi kye lochianduya maa malaika-pfoe? Na kokooya nyi wuṙo chi loiṙima ngoseṟa ianduya shindo sha iha wuyanenyi-pfoe?

⁴ Kyasia, mukyeri handu heṙeṙia moondu ya iha wuyanenyi, mokyewika walya walawoṙe kyiira siṟinyi iwa weṙumbuo moondu yanyu?

⁵ Ngyigamba kuṙo ngyiiṙime imuriisa sonu. Ngyesa nyi wuṙo, kye konyu kuwoṙe maa mndu umwi awoṙe wuṟango eiṙima iṙumbuo moondu o wana wa wamae?

⁶ Indi mokyeṙuana mengyenyi, wandu muiṙikyie Ruwa, mbele ya walya walaiṙikyie Ruwa.

⁷ Kyasia nyi wufafa wung'anyi konyu kye muṙuana mengyenyi nyoe wenyi ko wenyi. Kyipfa chi nanga iilamo-pfoe? Kyipfa chi necha isoko masaa ganyu-pfoe?

⁸ Indi kyilaṙuṙanyi na ikyo mokyeilama wandu na iwasoka masaa gawo; yee, maa wana wa wama wanyu.

⁹ Ang'u muichi kye wandu wawicho wechioṟa Wumangyi wo Ruwa-pfo? Maa mulakulembe. Waṟui wechioṟa Wumangyi wo Ruwa-pfo. Maa wekyeindia mafano, maa wekyewuta shindo shiwicho na wandu wa nguwo tsawo,

¹⁰ maa mbafu, maa wawoṙe wulanga, maa wekyenango, maa wekyelahia, maa wasokyi.

¹¹ Na waata kyiiṙi kyanyu wawekyeri wandu wa mbaṟe-i; kyaindi mulesanjo, kyaindi muleilyisho, kyaindi muletalo kye muwasumganyi rinenyi lya Mndumii Yesu Kristo, na Mumuyonyi o Ruwa oṙu.

Mmbiu Yanyu Ienengye Ruwa Kyiṟumi

¹² Ngyiwoṙe momu o wuta kyindo kyoose ngyikundi, kyaindi chi shoose shiwoṙe kyiira-pfo. Ngyiwoṙe momu o wuta kyindo kyoose, kyaindi inyi ngyechiwa mtumo o kyindo kyoose-pfo.

¹³ Shelya shiwaṟi ikaa ndewunyi, na ndewu iwaṟi iwaṙa shelya; kyaindi Ruwa nechinyamaṟa shoose shishiwi, ndewu na shelya. Kyaindi mmbiu uwaṟi iwa o wuṟui-pfo indi o iṟundia Mndumii, na nyi Mndumii ekyeembeṟa mmbiu.

¹⁴ Na Ruwa naleṟutsa Mndumii, na lyingyi-se nechiluṟutsa soe kui wuiṙimi wokye.

¹⁵ Ngyesa muichi kye mmbiu yanyu nyi shiwungo sha Kristo-pfoe? Kyasia ngyiwute shiwungo sha Kristo na ishigaluo sha iṟai? Ote!

¹⁶ Ang'u muichi kye ulya amlungye na iṟai nakyeri mmbiu umwi na oe? Kyipfa shiṟeio shiele shigambie, “Iwo wawi wechiwa mmbiu umwi.”

¹⁷ Kyaindi ulya amlungye na Mndumii nakyeri kyindo kyimwi na oe mrimenyi kokye.

¹⁸ Kaenyi kuleshi na wuṟui. Orio ṙeko mndu ekyewuta nyi nja ya mmbiu okye; indi ulya awuta shindo sha wuṟui nawuta kyindo kyechinyamaṟa mmbiu okye amonyi.

¹⁹ Ang'u muichi kye mmbiu yanyu nyi hekalu lya Mumuyo Mweele akyeri mrimenyi konyu, muleenengo nyi Ruwa-pfoe? Maa nyoe chi masaa ganyu muwenyi-pfo;

²⁰ kyipfa muleguṟo kui woguru wung'anyi. Kyasia wulalu, ṟumishenyi Ruwa kui mmbiu yanyu.