1 Wakorinto 5 - Kivunjo New Testament 1999

Wuṟui Siṟinyi

¹ Kuwoṙe mbonyi tsiṙeṙo orio handu kye konyu kuwoṙe wuṟui, wuṟui wo mbaṟe ilakyeri maa ko walya walaiṙikyie Ruwa, kye mndu nakae na mka o awuye.

² Na nyoe mokyekushela, maa mokyewoṙo nyi fowa mrimenyi-pfo, kye nawuto konyu ulya awuta kyindo kya mbaṟe-yo.

³ Cha kyipfa loi, ngyilakyeri konyu kyimmbiu, kyaindi ngyikyeri konyu kyimrima, inyi ngyimonyi ngamwanduya ulya awuta kyindo-kyo, cha ilyi ngyikyeri pfo.

⁴ Rinenyi lya Mndumii oṙu Yesu, nyoe musanzie handu hamwi na mrima oko, hamwi na wuiṙimi wo Mndumii oṙu Yesu;

⁵ iṙambika Satana mndu-cho, kundu mmbiu ulyiso wukyiwa, kundu na mrima ukyiṟo mfiri ulya Mndumii Yesu echicha.

⁶ Ikushela lyanyu chi kyindo kyicha-pfo. Muichi kye chachu kyitung'tu yekyetarang'isha itongye lyoose?

⁷ Kyasia, kusanjenyi, muwute chachu iya ya kacha, muiṙime iwa itongye lyihya, muwe cha mulawawikye chachu. Cha kyipfa Kristo, Kyiondo kyaṙu kya mṟumoe o Pasaka amṙaso.

⁸ Kyasia luwaṙe mṟumoe, chi kui chachu ya kacha-pfo, maa kui chachu ya wuwicho-pfo, indi kui shindo shilechitarang'ia, nyiwo wuilyi wo mrima na wuloi.

⁹ Ngyilemuṟeia kyiiṙi kya paruo-i, kye mulakusanze-sanze na waṟui.

¹⁰ Ngyigamba maa mulakusanze-sanze maa ale na waṟui wa wuyana-wu-pfo, ang'u na wawoṙe wulanga, ang'u na wasokyi, ang'u na wekyeindia mafano-pfo; kyipfa kuṙo muwaṟi iwuka wuyanenyi.

¹¹ Kyaindi, chandu mbonyi tsikyeri, ngyilemuṟeia kye mulakusanze-sanze na mndu oose ekyegamba oe nyi mndu aiṙikyie Ruwa, kokooya nyi mṟui ang'u nawoṙe wulanga ang'u nekyeindia mafano ang'u nekyelahia ang'u nekyenango ang'u msokyi; mndu o mbaṟe-i mulaiṙikyie maa ilya na oe.

¹² Kyipfa kyingyiwaṟi kuṙa ianduya walya walaiṙikyie Ruwa? Nyoe mokyeanduya walya waiṙikyie Ruwa-pfoe?

¹³ Kyaindi walya walaiṙikyie Ruwa, oe amonyi nechiwaanduya. Nyoe wutenyi ulya mmbicho kyiiṙi kyanyu.