1 Wakorinto 16 - Kivunjo New Testament 1999

Shienengo Shetarama Oṙiaṙu Waiṙikyie Yesu

¹ Ko mbonyi tsa isania heleri tsetarama wandu wa Ruwa walya waiṙikyie Yesu, chandu ngyilewia siṟi tsa Galatia, na nyoe wutenyi kuṙo.

² Orio mfiri o Ruwa orio mndu konyu nakoome kyiseyesoe, iṙuana na chandu awona; kundu heleri-tso tsilasanio kyiyeri ngyechicha.

³ Na inyi ilyi ngyeafukyia ngyeṙuma walya mochiwasambuṟa waṙuṙe paruo, waṙuo Yerusalemu heleri tsilya mosania.

⁴ Na kyikachia na inyi ngyiyende, wechiyenda na inyi.

Shindo Paulo Awekusaṟie Iwuta

⁵ Kyaindi ngyechicha na konyu, ngamuiṙia uruka lo Makyedonia; kyipfa ngyiiṙia Makyedonia.

⁶ Kofia ngyechikaa konyu. Yee, kofia kyiyeri kyoose kya mbeho, muiṙime ingyiṙuo kundu koose ngyechiyenda.

⁷ Kyipfa ngyikundi iwonana na nyoe wulalu-pfo, nyi ikuiṙia tupu, cha kyipfa ngyikusaṟie ikaa konyu kyiyeri kyitutu, Mndumii kangyienenga wuiṙimi wo wuta kuṙo.

⁸ Kyaindi ngyechikaa Efeso mṟasa kyiyeri kya Pentekoste;

⁹ cha kyipfa ngaenengo ṙaawa lying'anyi na lyicha mnu, na kuwoṙe wengyi waiwingana na inyi.

¹⁰ Kyaindi Timoteo kacha, nakae konyu kulawoṙe wuowu; kyipfa naiṟundia Mndumii cha inyi ngyimonyi.

¹¹ Kyasia mndu oose alammine, kyaindi muimienyi kui ufoṟo, kundu nache na koko; kyipfa ngyimmbeṙelyia nawuye hamwi na wana wa wama waṙu.

¹² Kyaindi ko mbonyi tsa Apolo, mono-wama oṙu, ngyilemterewa mnu nayende konyu hamwi na wana wa wama-wo waṙu; ulya kyilakyeri makusaṟo gakye iyenda wulalu; indi nechicha ilyi ewona ṙaawa.

Maṙeṙo Gefurumia

¹³ Laenyi kyiṙombo, mulalolome Iiṙikyienyi, waṙenyi wukari wo kyisoṟo; muwaṙe wuṟango.

¹⁴ Shindo shanyu shoose shiwutikye ikundenyi.

¹⁵ Lyingyi-se, wana wa wama, ngamterewa; (muichi wandu wa kanyi ko Stefana kye nyi wandu wa kuwooka kulya Akaya walegalutso wakaiṙikyia Yesu. Wandu-wa wakuwikyie nakamwi iṟundenyi lyetarama wandu wa Ruwa.)

¹⁶ Indienyi wandu cha iwo, na orio mndu ekyeṟunda na ikulyisa wukyiwa hamwi nawo.

¹⁷ Na inyi ngachihiyo kyipfa kya icha lya Stefana na Foritunato na Akaiko; kyipfa iwa walengyienenga kui mrima shilya mulalengyienenga.

¹⁸ Kyipfa walechihiṟa mrima oko, na mrima yanyu taa; kyasia manyenyi mnu wandu cha iwo.

¹⁹ Siṟi tsa Asia tsamuiṟikyiṟa. Akyila na Pirisikyila wamuiṟikyiṟa mnu kyiiṙi kya Mndumii, hamwi na siṟi ikyeri kanyi kowo.

²⁰ Wana wa wamanyu wekyeosha Yesu iha wamuiṟikyiṟa. Iṟikyiṟanenyi chandu walya waiṙikyie Yesu wekyeiṟikyiṟana.

²¹ Ikyi nyi kyiiṟikyiṟo kyako Paulo ngaṟeia ngyimonyi.

²² Mndu oose alakundi Mndumii nawe namsese. Maranata (kyimwi na igamba Mndumii oṙu naicha.)

²³ Isaṟia lya Mndumii Yesu lyiwe na nyoe.

²⁴ Ikunda lyako lyiwe hamwi na nyoe moose kyiiṙi kya Kristo Yesu.