1 Wakorinto 13 - Kivunjo New Testament 1999

Ikunda

¹ Ngaṙeṙa kui mṙeṙie ya wandu na ya malaika, kokooya ngyilawoṙe ikunda, ngawa cha menya iwuta ṟui na mmanga uiṙeṙa.

² Lyingyi-se ngaiṙima ionguo shisuku na imanya shiṟika shoose na wuṟango woose; ngawaṙa iiṙikyia lying'anyi ngaiṙima maa isamiṟa fumvu, kokooya ngyilawoṙe ikunda, inyi chi kyindo-pfo.

³ Lyingyi-se ngawuta masaa gako goose iigutsa wakyiwa; lyingyi-se ngaenengyia mmbiu oko ukoṟo nyi moṙo, kokooya ngyilawoṙe ikunda, ngyeiria ho kyindo-pfo.

⁴ Ikunda lyekyekarishia, lyekyesaṟia. Ikunda lyiwoṙe wunyeng'i-pfo. Ikunda lyekyekutuuta maa lyekyekushela-pfo.

⁵ Lyekyeṙa iwaṙa wupfereri-pfo; lyekyepfula shindo shalyo lyimonyi-pfo; lyiwoṙe isuo-pfo; lyekyetala mawicho-pfo.

⁶ Lyekyechihiyo kyipfa kya wuwicho-pfo, indi lyekyechihiyo hamwi na wuloi.

⁷ Lyekyekarishia shoose; lyekyeiṙikyia shoose; lyiwoṙe ikusuria; lyekyekarishia shoose.

⁸ Ikunda lyekyekaa mlungana; indi kuwoṙe ionguo shisuku ionguo-lyo lyechiiṙa. Kukowaṙa iṙeṙa mṙeṙie wandu walaiichi mṙeṙie-yo yechisia. Kukowaṙa ngyuuṟango, tsechisia.

⁹ Cha kyipfa lokyemanya mbashu-mbashu; na lokyeonguo shisuku mbashu-mbashu;

¹⁰ kyaindi kyiyeri-kyo kyilya kyilakyeri mti kyechicha, kyilya kyii mbashu-mbashu kyechisia.

¹¹ Kyiyeri ngyiwei mana mnangu, ngyileṙeṙa cha mana mnangu, ngyilemanya cha mana mnangu, ngyilekusaṟa cha mana mnangu. Wookyia kyiyeri ngyilewa mndu apfulukyie, ngyileṙa shindo shilya sha wututu.

¹² Kyipfa kyiyeri kya wulalu luwonyi kui kyiyewo cha maushe-ushe. Kyiyeri kyilya lochiwona ushangu kui ushangu. Kyiyeri kya wulalu ngyiichi mbashu-mbashu. Kyiyeri kyilya ngyechimanya mnu chandu inyi ngyiichio mnu.

¹³ Kyasia, wulalu hatsugaa iiṙikyia, ikusuria na ikunda; ishi shiṟaaṟu, na kyiiṙi kya isho kying'anyi kuta shoose nyi ikunda.