1 Wakorinto 12 - Kivunjo New Testament 1999

Shisumbo Shiwukyie ko Mumuyo Mweele

¹ Kyasia, wana wa wama wako, ko mbonyi tsa shisumbo sha mrimenyi, ngyikundi muṙe mulamanya-pfo.

² Muichi kye kyiyeri muwei wandu walaiṙikyie Yesu, muwekyeosha mafano galekyeṙeṙa, chandu muwekyesongoyo nyi makusaṟo ganyu.

³ Koikyo ngammbia kye kuwoṙe mndu ekyeṙeṙa Mumuyonyi o Ruwa igamba, “Yesu namsese,” maa mndu eiṙima igamba, “Yesu nyi Mndumii,” sile Mumuyonyi Mweele-pfo.

⁴ Kyasia kuwoṙe mbaṟe tsifoi tsa shisumbo indi Mumuyo nyi ulya ulya.

⁵ Lyingyi-se kuwoṙe mbaṟe tsifoi tsa maṟunda, na Mndumii nyi ulya ulya.

⁶ Naaho-ng'u kuwoṙe mbaṟe tsifoi tseṟunda, indi Ruwa nyi ulya ulya ekyeṟunda maṟunda goose kyiiṙi kya woose.

⁷ Kyaindi orio mndu nekyeenengo nyi Ruwa imanya kye Mumuyo nakyeri ho, kui ienengana kyiira.

⁸ Kyipfa mndu umwi kui Mumuyo namwenengye wunyotsu; na ungyi iṙeṙa kui wuṟango chandu Mumuyo ulya ulya akundi.

⁹ Ungyi iiṙikyia Mumuyonyi ulya ulya; na ungyi shisumbo shekyiṟa waluoe Mumuyonyi ulya umwi.

¹⁰ Na ungyi mawuto ya maṟiyisho; na ungyi ionguo shisuku na ungyi wuiṙimi wo manya nyi shisumbo shiha shiwukyie ko Mumuyo na nyi shiha shilawukyie ko Mumuyo; ungyi mbaṟe tsa mṙeṙie wandu walaiichi; na ungyi itambaluo mṙeṙie wandu walaiichi.

¹¹ Kyaindi maṟunda-ga goose gekyeṟundo nyi Mumuyo-cho umwi, ulya ekyegawia orio mndu chandu akundi oe.

Mmbiu Umwi Uwoṙe Shiwungo Shifoi

¹² Chandu mmbiu ukyeri umwi, nacho uwoṙe shiwungo shifoi, na shiwungo shoose sha mmbiu-cho, maa chandu shifoi, nyi mmbiu umwi, nyi wuṙo na Kristo.

¹³ Cha Kyipfa Mumuyonyi umwi soe loose lulepatiso iwa mmbiu umwi. Kye lui Wayuda, ang'u kye lui Wakyiṟikyi; kokooya lui watumo ang'u wandu lulawachilyie nyi mndu; na soe loose luleletsio Mumuyo umwi.

¹⁴ Cha kyipfa mmbiu chi kyiwungo kyimwi-pfo, indi nyi shifoi.

¹⁵ Kuṙende kukogamba, “Kyipfa inyi ngyilai kuwoko, inyi chi o mmbiu-pfo;” ngyesa kuṙende-ko koṙa iwa kyiwungo kya mmbiu kyipfa kya ikyo-ng'ue?

¹⁶ Na kuṙwi kukogamba, “Kyipfa inyi ngyilai riso, inyi chi o mmbiu-pfo;” ngyesa kuṙwi-ko koṙa iwa kyiwungo kya mmbiu kyipfa kya ikyo-ng'ue?

¹⁷ Kokooya mmbiu oose owa riso, ny'kyikyi kyeaṙanyia? Kokooya mmbiu oose owa kuṙwi ny'kyikyi kyepfaamiṟa?

¹⁸ Indi Ruwa nawikyie shiwungo orio kyimwi mmbiunyi chandu alekunda.

¹⁹ Kyaindi kokooya shiwungo shoose shiwei kyiwungo kyimwi, mmbiu uwekaa kwi?

²⁰ Kyaindi wulalu shiwungo nyi shifoi, indi mmbiu nyi umwi.

²¹ Na riso lyeiṙima iwia kuwoko, “Ungyiwoṙie kyiiṙa-pfo;” maa lyingyi-se mṙoe oiṙima iwia maṙende, “Mungyiwoṙie kyiira-pfo.”

²² Indi ngoseṟa mnu shiwungo shilya sha mmbiu shekyekusaṟo kye shishifofo mnu shiwoṙe kyiira ngoseṟa.

²³ Na shiwungo shilya sha mmbiu shekyekusaṟo kye nyi sha wusutsu, shiwungo-sho lokyeshienenga mng'ano ngoseṟa; na shiwungo shaṙu shilawoṙe wucha nyi shiwoṙe wucha ngoseṟa mnu.

²⁴ Cha kyipfa shiwungo shaṙu shiwoṙe wucha shiwoṙe kyiira-pfo; indi Ruwa nagumbie mmbiu, na ienenga mng'ano ngoseṟa kyiwungo kyilakyicha,

²⁵ kundu mmbiu ulaṙe iwa kyindo kyimwi, indi shiwungo shitaramane, orio kyiwungo na oṙoe.

²⁶ Na kyiwungo kyimwi kyikawawio, shiwungo shoose shekyewawio hamwi nakyo; na kyiwungo kyimwi kyikang'anyiso, shiwungo shoose shekyechihiyo hamwi nakyo.

²⁷ Kyasia nyoe mowa mmbiu o Kristo, na shiwungo orio kyimwi handu hakyo.

²⁸ Na Ruwa nawikyie wengyi Siṟinyi, wa kuwooka wasu, wa kawi weonguo shisuku, wa kaṟaaṟu walosha; numa ya iho shindo sheṟiyisha, shisumbo sha ikyiṟa waluoe, na itaramana, na wusongoru, na mbaṟe tsa iṙeṙa mṙeṙie wandu walaiichi.

²⁹ Ngyesa woose nyi wasu? Woose nyi weonguo shisuku? Woose nyi walosha? Woose wekyewuta shindo sheṟiyisha?

³⁰ Woose wawoṙe shisumbo shekyiṟa waluoe? Woose wekyeṙeṙa mṙeṙie wandu walaiichi? Woose wekyetambuluo mṙeṙie wandu walaiichi?

³¹ Kundenyi mnu mrimenyi konyu iwona shisumbo shicha kuta isho. Maa kuṙo ngyimuloṟa nyoe njia ngyicha.