1 Wakorinto 10 - Kivunjo New Testament 1999

Ikushowa na Mafano

¹ Cha kyipfa, wana wa wama, ngyikundi mulemo imanya kye waku waṙu wawekyeri woose wanda ya ipuchi; woose wakaiṙa ipalyipalyinyi.

² Woose wakapatiso wawe wa Mose ipuchinyi na ipalyipalyinyi.

³ Woose wakalya kyelya kyilya kyilya kya mrima.

⁴ Woose wakanyo kyindo kyilya kyilya kya mrima; cha kyipfa walenyo iwuka kulya iṟaṟenyi lyilewaosha; na iṟaṟa-lyo lyiwei nyi Kristo.

⁵ Kyaindi wafoi kyiiṙi kyawo, walechihiṟa Ruwa-pfo, koikyo wakarumatso nukyenyi ngyuumu suwaa ilawoṙe maa mṟinga.

⁶ Kyasia shindo-shi shiwekyeri mfano koṙu, kundu soe lulawe wandu welanga shindo shiwicho, chandu walya nawo walelanga.

⁷ Maa mulawe weindia mafano, chandu wengyi nawo wawekyeri; chandu kyikyiṟeie, “Wandu waleṙamia ilya na inyo, na numa ya iho wakagoṟoka wateme.”

⁸ Maa lulawute shindo sha wuṟui, chandu wandu wengyi wawo walewuta, wakapfa mfiri umwi wandu shiku makumi gawi na shiṟaaṟu.

⁹ Maa lulayeshe Mndumii, chandu wengyi wawo walemyesha, wakaumaṙo nyi njoka.

¹⁰ Maa lulanunuwe, chandu wengyi wawo walenunuwa, wakarumatso nyi malaika o upfu.

¹¹ Kyasia shindo-sho shilewutika kowo kui mfano, shikaṟeio kundu shiluikyimbie soe, wa shiyeri-shi shikyeri kufuhi na mafurumionyi.

¹² Koikyo akusaṟie kye nagoṟokyi naambuye necha alaolokye.

¹³ Nyoe muleyesho, sile kyiyesho kyilya kyekyecha na ko wandu woose-pfo. Indi Ruwa nekyeafutsia shilya ateṟia. Ruwa ulya alechimuṙa nyoe muyesho kuta wuiṙimi wonyu. Kyaindi hamwi na kyiyesho kyilya nechiwika na moongo o fumia, kundu muiṙime ikarishia.

¹⁴ Kyipfa kya ikyo, wakunde wako, kushowenyi na iindia mafano.

¹⁵ Ngyigamba kuṙo kyipfa ngyiṙeṙa na wandu waṟango. Ngyimuitika iiṙikyia ishi ngyigamba-pfo; indi kusaṟenyi nyoe muwenyi.

¹⁶ Kyiṙoo kyilya kya kyilaayo kyiele lokyeana Ruwa kyipfa kyakyo chi samu ya Kristo lokyeinyo handu hamwi-pfoe? Mkate ulya lokyeupeṟenguo, chi mmbiu o Kristo lokyeulya handu hamwi-pfoe?

¹⁷ Cha kyipfa mkate nyi umwi, soe lui wafoi lukyeri mmbiu umwi; cha kyipfa soe loose lokyeambilyia kyifunjoe kya mkate umwi.

¹⁸ Wonenyi Waisiraelyi-wo chandu wawekyeri mbaṟe ya mmbiu; walya wekyelya shiṙaso. Ngyesa wekyeikanana shiṙaso-pfoe?

¹⁹ Kyasia ngyigambe kyi? Kye kyilya kyaṙasio mafano nyi kyindo? Ang'u kye mafano nyi kyindo?

²⁰ Chi wuṙo-pfo, kyaindi shindo shoose wandu walaiṙikyie Yesu wekyeṙasa wekyeshienenga waṟufui wa Satana, maa chi Ruwa-pfo; na inyi ngyikundi muṟundie masatana-pfo.

²¹ Moiṙima inyo kyindo iwuka kyiṙoonyi kya Mndumii na kyiṙoonyi kya waṟufui wa Satana-pfo.

²² Ang'u lokusaṟa loiṙima imina Ruwa lulechiolotsio ngapo? Ngyesa luwoṙe pfinya kuta oe?

²³ Kuwoṙe momu o wuta kyindo kyoose, indi chi shoose shiwoṙe kyiira-pfo. Kuwoṙe momu o wuta kyindo kyoose, indi chi shoose shekyetarama siṟi-pfo.

²⁴ Mndu alapfule kyiira kyakye amonyi, indi kyiira kya oṙoe.

²⁵ Orio kyindo kyekyekumbo sangaṙa lyenyi kulawoṙe iwesa-wesa; maa mulaikulyisa wukyiwa mrimenyi kui ikusaṟa nyi kyiha kyii kyicha na nyi kyiha kyii kyiwicho.

²⁶ Kyipfa, “Wuyana nyi isaa lya Mndumii na shoose shikyeri pfo.”

²⁷ Na mndu alaiṙikyie Ruwa kakunda muyende kanyi kokye, na nyoe mukokunda iyenda, lyenyi orio kyindo moenengo kulawoṙe iwesa-awesa; maa mulaikulyisa wukyiwa mrimenyi kui ikusaṟa nyi kyiha kyii kyicha na nyi kyiha kyii kyiwicho.

²⁸ Kyaindi mndu kammbia, “Kyindo-kyi kyawuto kyiwe kyiṙaso,” maa mulalye, kyipfa kya ulya ammbia na kyipfa kya makusaṟo ga mrimenyi, nyi kyiha kyii kyicha na nyi kyiha kyii kyiwicho;

²⁹ chi kyipfa kyapfo-pfo indi kyipfa kya icho ungyi ammbia mbonyi-tso. Kyipfa kulya inyi iwa mndu alamchilyie nyi kyindo kulaanduyo nyi makusaṟo ga mndu kye nyi kyiha kyii kyicha na nyi kyiha kyii kyiwicho. Chi kyipfa kyapfo-pfo indi kyipfa kya ulya ungyi ammbia mbonyi-tso. Kyipfa kulya inyi iwa mndu alamchilyie nyi kyindo kuleanduyo nyi makusaṟo ga mndu kye nyi kyiha kyii kyicha na nyi kyiha kyii kyiwicho.

³⁰ Kokooya inyi ngawona kyitumbuṟe kyako kya isaṟia, kyitewe ngyilahiyo ny'kyi?

³¹ Kyasia, kyiyeri muilya, ang'u muinyo, ang'u muiwuta kyindo kyoose, wutenyi kuṙo kui ienenga Ruwa kyiṟumi.

³² Maa mulatewe Wayuda maa Wakyiṟikyi maa siṟi ya Ruwa wawute kyindo kyiwicho.

³³ Nyi wuṙo chandu inyi ngyekyechihiṟa wandu woose shindonyi shoose, ngyilalepfula kyiira kyako ngyimonyi, indi kyiira kya wandu wafoi, kundu wakyiṟo.