1 Timoteo 6 - Kivunjo New Testament 1999

¹ Wandu woose waiṙikyie Yesu wawapfungye nyi mshe ya wusinga, wawone wandumii wawo kye wawaṟi iindio mnu, rina lya Ruwa lyilamino hamwi na malosho gaṙu.

² Na walya wawoṙe wandumii waiṙikyie Yesu walawamine cha kyipfa nyi wana wa wama kyiiṙi kya Yesu; indi nyi kyicha wawaṟundie, cha kyipfa wandumii-wo wekyewona kyiira kya iṟunda lyawo wawa wandu wakunde.

Malosho ga Wongo na Ikunda Masaa

³ Uloshe na itutuma shindo-shi. Mndu oose kalosha mbonyi tsingyi, alaiṙikyie mbonyi tsiwoṙe moo o Mndumii oṙu Yesu Kristo, maa malosho galaṙuṙanyi na iowuo na ikunda Ruwa,

⁴ mndu-cho nakushela. Maa aichi kyindo kyoose-pfo; indi nawoṙe wusuko wo ikunda igaluana na iluyana kui maṙeṙo, maṙeṙo gekyeende wunyeng'i, shiloyano, shilahio, na ikusaṟa kye mndu ungyi nawuta kyindo kyiwicho.

⁵ Na igaluana lya maṙeṙo lya wandu wanyamaṟikyie mṙoe yawo, walaichi wuloi, kunu wechikusaṟa kye iowuo na ikunda Ruwa nyi njia ya iwona kyiira.

⁶ Kyaindi iowuo na ikunda Ruwa hamwi na iṙa ilanga shindo shifong'ui nyi kyindo kyiwoṙe kyiiṙa kying'anyi.

⁷ Cha kyipfa lulecha na wuyanenyi luwoṙe kyindo-pfo; lyingyi-se lochiwuka pfo luwoṙe kyindo-pfo.

⁸ Indi lukowaṙa kyelya na nguwo lulapfule-pfule-se shindo sha ngoseṟa.

⁹ Kyaindi iwo wakundi iwaṙa masaa wekyeoloka shiyeshonyi na mṙegonyi, na langonyi tsingyi tsa maai, tsekyelyisa wukyiwa, tsekyeolotsa wandu wuṙetsinyi na wunyamaṟinyi.

¹⁰ Kyipfa mri o mawicho ga orio mbaṟe nyi ikunda heleri. Nyi kui ikunda mnu heleri wandu waata walelekana na iiṙikyia wechikulyisa ngyuukyiwa tsifoi.

Mkaṟo o Kyikristiano

¹¹ Indi iyoe mndu o Ruwa, uṙiche shindo-sho; uoshe wusumganyi, iowuo na ikunda Ruwa, iiṙikyia, ikunda, wusimiri, na wuhoo.

¹² Kapana shiṙa shilya shicha sha iiṙikyia. Waṙa moo ulya o mlungana ulelagio nyi Ruwa kyiyeri ulegamba na pata iiṙikyia lyapfo mbele ya waṟingyishi wafoi.

¹³ Ngakuwia mbele ya Ruwa ekyeringa shindo shoose, na mbele ya Kristo Yesu, alegamba iiṙikyia lyakye mbele ya Pontio Pilato,

¹⁴ kye uringye iwawaso-lyi kulawoṙe tewe, kulawoṙe mndu igamba kye nowuta kyindo kyiwicho, mṟasa kyiyeri Ruwa echishukuo Mndumii oṙu Yesu Kristo.

¹⁵ Kyiyeri oe amonyi echikuṟingyishia kyiyeri kyikashika, ulya aleṟumisho, awoṙe pfinya oe amonyi, Mangyi o wamangyi, Mndumii o wandumii.

¹⁶ Ulya alekyepfa, akyeri ngyeelenyi ilekyeiṙima irumisho; maa kulawoṙe mndu alemummbona, maa eiṙima immbona. Kyiyeri kyoose naenengo kyiṟumi na pfinya mṟasa mlungana. Amen.

¹⁷ Walya wakyeri wanjama wa wuyana wo wulalu uwawie walakushele, maa walakusurie wunjama wowo wukyeri cha mboshia, indi wakusurie Ruwa ekyeluenenga shindo shoose kulawoṙe iehia kundu luṟunde nasho kui sia.

¹⁸ Wawute shindo shicha, wawe wanjama kui iwuta wucha, waenengyie masaa gawo, wakae na wandu wengyi kui mrima;

¹⁹ kunu wechikooma kyiseyesoe kyiwe urende lucha ko kyiyeri kyiicha, kundu wawone moo o loi.

²⁰ Iyoe Timoteo, ringa kyilya Ruwa alekuṙambika, ukushowe na malosho galaṙuṙanyi na galya ga wandu wekyeindia Ruwa, ga wutondo, na maṙeṙo ga wutondo gekyelago malosho kui wongo;

²¹ galya wengyi wekyegaṙeṙa wakaasha Iiṙikyia. Isaṟia lyikae na nyoe moose.