1 Timoteo 5 - Kivunjo New Testament 1999

Shindo Walya Waiṙikyie Yesu Wawaṟi Iwuta

¹ Ulaṟoṟome mndu meeku, indi ṙeṙa na oe cha awu opfo; na ndaka cha wana wa womoo.

² Ṙeṙa na wakyeku cha wamama wapfo; wana wa kyika cha washikyi wapfo; kui mkaṟo ulawoṙe ukoe lo wuṟui.

³ Uindie wakusu wai wakusu wa loi.

⁴ Kyaindi mkusu kokooya nawoṙe wana ang'u wachuku, wakuloshe kuwooka iwuta shilya wawaṟi iwutia wa kanyi kowo, na itaa wafee wawo. Cha kyipfa nyi kyindo kyichihiṟie mbele ya Ruwa.

⁵ Kyasia, ulya ai mkusu o loi, namṙe amonyi, icho nakusurie Ruwa, na oe orio mfiri nekyeterewa kyingoto na kyio.

⁶ Indi, ulya alekyeringa mrima okye napfiie maa chandu ai na moo.

⁷ Shindo-sho taa ushigambe, kundu mndu oose alagambe kye walya owawia wawoṙe ṙeko.

⁸ Kyaindi mndu oose alekyeambuya walya wakyeri wakye, ngoseṟa walya wa kanyi kokye, nakana Iirikyia, lyingyi-se nammbicho kuta mndu alaiṙikyie Yesu.

⁹ Mkusu alatalo nyi mkusu sile awaṙa maka makumi gaṟandaaṟu; na oe nai mka o mii umwi.

¹⁰ Na oe naṟingyishio kye nawoṙe mawuto mecha; kokooya naleambuya na iṙosa wana necha, kokooya naleambilyia wayenu, kookoya nalekutitiṟa mṟasa kaanguo wandu wa Ruwa maṙende, kokooya naletarama wandu wailyiso wukyiwa, kokooya nalewika wuragari iṟundenyi lyicha.

¹¹ Indi wakusu wakoho ulawatale kye nyi wakusu, kyipfa wakang'anyio nyi lango kyilaṙuṙanyi na malosho ga Kristo, wakundi ialyiko.

¹² Nawo wechianduyo kyipfa waṙa iiṙikyia lyilya lyawo lya kuwooka.

¹³ Lyingyi-se, hamwi na isho, wekyekulosha iṙokuo, wechitenga-tenga numba kui numba. Maa chi waṙoko tupu-pfo; kyaindi wekyeṙeṙa shindo shekyeende kyituwa na wekyesuma-suma shindo sha wandu wengyi wechiṙeṙa shindo shilawawaṟi iṙeṙa.

¹⁴ Kyasia ngyikundi wakusu, walawaku, waalyiko, wafee wana, wachilyie kanyi kowo; kundu walaenengye mokyituwa ṙaawa lyegamba kye luwoṙe ṙeko.

¹⁵ Cha kyipfa wengyi wamuilachika na iosha Satana.

¹⁶ Mndu mka aiṙikyie, kokooya nawoṙe wakusu, nawatarame oe amonyi, kundu siṟi ilalemio; kundu siṟi itarame walya wakyeri wakusu wa loi.

¹⁷ Wameeku wa siṟi wekyechilyia necha na watalo kye wawaṟi iindio ngoseṟa, ngoseṟa walya wekyekuwinisha iṙeṙa mbele ya wandu na ilosha.

¹⁸ Kyipfa kyiṟeio kyiele kyagamba, “Maa ulaime umbe ilya ilyi ikutarama ihuo nganu.” Na lyingyi-se, “Mṟundi nawaṟi wori wokye.”

¹⁹ Molaiṙikyie kyiyeri oicho kye mndu meeku nawuta kyindo kyiwicho, sile kokooya noicho waṟingyishi wawi ang'u waṟaaṟu wegamba kuṙo.

²⁰ Walya wekyewuta sha wunyamaṟi orio kyiyeri uwaṟoṟome mbele ya wandu woose kundu na wengyi waowuo.

²¹ Ngakuwia mbele ya Ruwa, mbele ya Kristo Yesu, na mbele ya malaika wasambuṟe, uwute isho kulawoṙe ianduya kui iṙimaṙima. Ulawute kyindo kyoose kui ikundia.

²² Ulayekyie mndu mawoko kui iṙimaṙima, maa ulakuwikye ngyuunyamaṟinyi tsa wandu wengyi. Uringye mrima opfo ulafanyiṟo nyi ukoe.

²³ Wookyia wulalu ulanyo mṟinga tupu-pfo kyaindi nyo mpfinyo kyitutu, kyipfa kya ndewu yapfo, na ndoṟe-tso tsekyekutuura orio kyiyeri.

²⁴ Ngyuunyamaṟi tsa wandu wengyi tsiwonio na pata, na tsiwasongoya iyenda kyianduyonyi, kyaindi ngyuunyamaṟi tsa wandu wengyi tsechiwono kyiyeri kyilya kyeanduya kyilashika-pfo.

²⁵ Na wuṙo mawuto mecha gawonio na pata; maa kokooya galawonio nyi wandu chi kyindo kyeiṙima ikuṟiika-pfo.