1 Petiro 5 - Kivunjo New Testament 1999

Poo lya Ruwa

¹ Ngyiterewa wameeku wa siṟi wakyeri konyu, inyi ngyikyeri meeku oṙiawo, na mṟingyishi o wukyiwa Kristo alelyiso, na ienengo kyiṟumi kyechiloṟo ipfo-ndu luiyenda;

² lyisenyi poo lya Mndumii lyikyeri konyu, na ilyigoṟokyia. Chi kui iitiko-pfo, indi kulawoṙe iitiko, chandu Ruwa akundi, chi kui ikunda iwona heleri tsa sonu-pfo, indi kui ikuwuta nakamwi.

³ Maa chi cha wandu waikugaluo wandumii shikaṟonyi shawo-pfo, indi kui iloṟa mkaṟo mcha ko poo-lyo.

⁴ Na kyiyeri Mlyisi ang'anyi echiloṟo, mochiambilyia iṟikoso lya kyiṟumi, lyilya lyilekyenyamaṟika.

⁵ Na wuṙo nyoe wanakye, indienyi wameeku. Yee, nyoe moose waṙenyi wupfereri, muiṙime iṟundiana; cha kyipfa Ruwa nekyekapa walya wekyekuira, kyaindi nekyeenenga wapfereri isaṟia.

⁶ Kyasia pfererienyi wuchilyinyi wo Ruwa wuwoṙe pfinya, kundu namuṙose kui kyiyeri kyakye;

⁷ kunu mochimṙambika fowa tsanyu tsoose, cha kyipfa oe nekyekuwinisha mnu na shindo shanyu.

⁸ Muwaṙe meena na ilaa kyiṙombo; cha kyipfa mokyituwa onyu Mokyiriinzi, cha simba isepfuo, nekyetenga-tenga, echipfula mndu nammeṟe.

⁹ Na nyoe mmbingyenyi, mulailoloma iiṙikyienyi, muichi kye wukyiwa wulya wulya wukyeri ko wana wa wamanyu wakyeri wuyanenyi.

¹⁰ Na Ruwa o isaṟia lyoose, alemulaga nyoe iiṙa na kyiṟuminyi kyakye kya mlungana kyiiṙi kya Kristo, mukomlyiso wukyiwa kyiyeri kyitutu, oe amonyi nechimmbutia-se orio kyindo muwaṟi iwutio, na imuenenga pfinya.

¹¹ Wuchilyi wo Ruwa wukae ho mlungana na mlungana. Amen.

Shiiṟikyiṟo Shefurumia

¹² Silyiwano, mono-wama ekyeafutsia shilya ateṟia, naṟeia paruo-i handu hako. Ngamuṟeia shindo shaangu, iikyimbia na iṟingyishia kye ilyi nyilyo isaṟia lya loi lya Ruwa. Goṟokyenyi isaṟienyi lya Ruwa kulawoṙe iloloma.

¹³ Oṙianyu msambuṟe iha Babelyi namuiṟikyiṟa, na Mariko, mono-ko.

¹⁴ Iṟikyiṟanenyi chandu walya waiṙikyie Yesu wekyeiṟikyiṟana. Ufoṟo lukae konyu nyoe moose, muwalungye na Kristo. Amen.