1 Petiro 3 - Kivunjo New Testament 1999

Chandu Waka na Wamii Wechiwutiana

¹ Nyoe waka, indienyi wamii wanyu; kundu kokooya kuwoṙe walaiṙikyie Ṙeṙo, waiṙime ilyiiṙikyia kui mkaṟo ya waka wawo kulawoṙe igamba kyindo;

² wechiambuya mkaṟo onyu mcha, na o wuowu.

³ Ikuchopa lyanyu, lyilawe ikuchopa lya kyanja, cha ioka njui, iṟaa sahapu na iṟaa nguwo.

⁴ Indi lyiwe wucha wo mrimenyi wulekyewono; shindonyi shekuchopa shilekyenyamaṟika; wucha wo mrima o wuhoo na wuramiri, wuwoṙe woguru wung'anyi ushangyunyi lo Ruwa.

⁵ Kyipfa kuṙo nyi wuṙo walekuchopa waka waele wa kacha, walekusuria Ruwa, na iindia wamii wawo.

⁶ Chandu Sara aleindia Abrahamu, kamlaga Mndumii; na nyoe nyi wana wakye, kyiyeri mowuta shindo shicha, maa muleowesho nyi wuowu woose-pfo.

⁷ Nyoe wasoṟo, kaenyi na waka wanyu kui wuṟango, muichi kye mka nyi kyiiya kyifafa; na muwe cha weoṟa hamwi na isaṟia lya moo, kundu iterewa lyanyu lyilashingyio nyi kyindo.

Ilya Wukyiwa kyipfa kya Iwuta Mecha

⁸ Ulogo lo furumia nyi ilu, muwaṙe makusaṟo gamwi, mukyeri wandu wekyewoniana wukyiwa, wakundanyi cha wana wa mka, mochiwihiyo kyipfa kya wukyiwa wo mndu ungyi, wapfereri.

⁹ Wandu mulekyetaa kyiṟaache ang'u ilahia ulya amulahia indi wandu wekyewikyia mboṟa; cha kyipfa isho nyisho mulelagio kundu muoṟe mboṟa.

¹⁰ Cha kyipfa, “Ulya akundi ikaa na sia, na iwaṙa mfiri ngyicha, naringye ulumi lokye lulaṙeṙe shindo shiwicho, na mshimbo yakye ilaṙeṙe ngyeṟo.

¹¹ Na naṙe mawicho, nawute shicha, napfule ufoṟo mnu.

¹² Kyipfa meso ga Mndumii gekyeambuya wasumganyi, na maṙwi gakye gekyeaṙanyia shiterewo shawo. Indi Ruwa akundi wekyewuta mawicho-pfo.”

¹³ Na nyi wui echimmbutia kyindo kyiwicho, kokooya mopfuṟukana iwuta shindo shicha?

¹⁴ Kyaindi kokooya molyiso wukyiwa kyipfa kya iwa wasumganyi muwoṙe sia ing'anyi. Maa mulaowuo iowesha lyawo, maa mulaiṟewe mrimenyi; indi ilyishenyi Kristo Mndumii mrimenyi konyu.

¹⁵ Mukuṟeyeṟe orio mfiri igaluo orio mndu ammbesa mbonyi tsa ikusuria lyikyeri mrimenyi konyu; kyaindi kui wuhoo na wuowu.

¹⁶ Na nyoe muwaṙe makusaṟo mecha mrimenyi, kundu orio kyindo mochiirio, warigo nyi sonu walya wekyegamba kye mkaṟo onyu ummbicho maa chandu mulandewute kyindo kyoose kyiwicho.

¹⁷ Kyipfa nyi nanga ilyiso wukyiwa kyipfa kya iwuta shindo shicha, kokooya isho nyisho Ruwa akundi, kuta ilyiso wukyiwa kyipfa kya iwuta shindo shiwicho.

¹⁸ Cha kyipfa Kristo na oe nalelyiso wukyiwa lyimwi tupu kyipfa kya wunyamaṟi woṙu, amsumganyi kyipfa kya walya walawasumganyi, kundu naluende na ko Ruwa; mmbiu okye ukowoogo, indi mrima okye ukoenengo moo.

¹⁹ Na kui mrima-cho kayenda ko mrima iwekyeri kyipfungonyi kawaongoya Ṙeṙo lya Ruwa;

²⁰ wandu walawewoṙe wuindi kyiyeri kya ipfo numa, kyiyeri Ruwa alewaweṙelyia kulawoṙe iwina lyilya Noe aleachikyia safina; safina ileenenga wandu nyanya ikyia iwoogo nyi mṟinga.

²¹ Mfano o shindo-sho nyi wupatiso, wokyemukyiṟa nyoe taa mfiri ya wulalu; (chi kui iwikyia kuleshi ukoe o mmbiu-pfo, indi kyaasa kyilya lokyewikyia Ruwa kya iafutsia shilya loteṟia, lukyeri wandu wekyeosha Yesu), kui iṟuka lya Yesu Kristo.

²² Na oe nakyeri kuwoko ko kulyoe ko Ruwa, nayenda ruwewu, echichilyia malaika na shindo shingyi shoose shiwoṙe pfinya kulya ruwewu.