Wongeela Maatewos 7 - Kitaaba Woyyuu

Namatti Murteessuun Hin Barbaachisu

¹ Yesuus ammallee akkana jedhe, «Rabbi akka isinitti hin murteessine, isin namatti hin murteessinaa'a.

² Murtima isin namatti murteessitaniin isinittillee murteeffama. Safartuma isin namaaf safartaniin isiniifillee safarama.

³ Huuba ija obboleessa keetii keessa jiru maaf laalta! utubaa ija tee keessa jiru maaf arguu dadhabde?

⁴ Uduu utubaan ija tee keessa jiru attamitti obboleessa keetiin, ‹Huuba ija tee keessaa sii baasa› jettaan?

⁵ Ati nama fakkeessitu! duraan dursii utubaa ija tee keessa jiru baasi. Achiin maayessa huuba ija obboleessa keetii keessa jiru baasu'uuf midhaassitee arguu dandeettaa.

⁶ «Waan woyyoome sariinii hin kenninaa'a; isinitti gara galanii isin ciniinanii. Meeshaa keessan ka gatii mi'a'aa booyyota afoo hin buusinaa'a!»

Kadhadhaa'a, Barbaadaa'a, Dhadhayaa'a

⁷ «Rabbiin kadhadhaa'a isinii kennamaa; barbaadaa'a hin argattanii; balbala dhadhayaa'a isin jalaa banamaa.

⁸ Ka kadhatu maruu hin fudhata; ka barbaadu hin argata; ka balbala dhadhayuufillee hin banama.

⁹ Isin keessaa ilmi isaa yoo xoroshoo kadhate ka dhagaa kennuuf eennu?

¹⁰ Yookaan yoo qurxummii kadhate bofa kennaafii?

¹¹ Eegasuu isin hammeeyyii taatanii yoo ijoollee teessanii kennaa mishaa kennuu beettan, Abbaan keessan ka samii jiru worra Isa kadhataniif attamitti waan mishaa caalchisee hin kennine ree?

¹² Eeganaa «Waan namoonni akka isinii godhan barbaaddan, isinillee akkasuma isaaniif godhaa'a; seerrinii fi raattonnillee kanuma barsiisan.»

Waan Karra Dhipho'oo

¹³ «Karra dhipho'oon seenaa'a! Karaan gara badi'ii fidu badha'a; karrillee badhoo waan taateef; worri karra saniin seenu heddu.

¹⁴ Karaan gara jireennaa fidu qadho'o; karri dhiphoo waan taateef; worri karaa jiru'uu san argatu hago'o.»

Mukaa Fi Daraaraa

¹⁵ Yesuus ammallee akkana jedhe, «Raattota sobaa worra hoolaa fakkaachu'uuf gogaa hoola'aa uffatanii isinitti dhufan; ka keessi isaanii ammo akka Yayyii waa butuu ta'an irraa uf eegaa'a.

¹⁶ Isaan daraaraa hujii ufiitiin beekkaman; qoree irraa woyinii, qummuudduu irraa hurbuu hin guuranii?

¹⁷ Akkasuma munni mishaan maruu daraaraa mishaa daraara; munni badaan daraaraa badaa daraara.

¹⁸ Munni mishaan daraaraa badaa daraaruu, yookaan munni badaan daraaraa mishaa daraaruu hin danda'u.

¹⁹ Munni daraaraa mishaa hin daraarre maruu muramee ibiddatti gatama.

²⁰ Kanaaf daraaraa isaaniitiin isaan beettan.»

Ani Sirimaa Isin Hin Beeku

²¹ Yesuus, «Nama fedhii Abbaa kiyya ka samii jiruu raawwatutu jeennata sami'ii gala malee ka, ‹Gooftaa! Gooftaa!› jedhee na waamu marti hin galu.

²² Guyyaa san namoonni hedduu, ‹Gooftaa! Gooftaa! maqaa keetiin raaga hin dubbannee? Maqaa keetiin jinnii hin baafnee? Maqaa keetiin baasa hedduu hin hunyee?› naan jedhan.

²³ Ani ammo, ‹Isin dhartoota sirimaa isin hin beeku; na irraa fagaadhaa'a› jedhee isinitti rageessa.»

Jara Lamaan Mana Ijaartu

²⁴ Yesuus ammallee akkana jedhe, «Namni dubbii kiyya kana dhagayee hujii irra oolchu maruu namicha qaroo mana ufii dhagaa irratti ijaarate fakkaata.

²⁵ Roobni roobee, lolaan lola'ee, bubbeen bubbisee, mana san dhiibe; manni ammo lafa qarsaa irratti waan ijaarameeruuf hin jinne.

²⁶ «Namni dubbii kiyya kana dhagayee hujii irra hin oolchine ammo, namicha gowwaa mana ufii shasharee irratti ijaarate fakkaata.

²⁷ Roobni roobee, lolaan lola'ee, bubbeen bubbisee mana san dhiibe; manni sun jigee akka malee butute.»

Baallii Yesuusii

²⁸ Yesuus hennaa dubbii kana dubbatee fixe, gumiin barumsa isaa hin baaseffatan.

²⁹ Inni akka barsiisota seera Muuse'eetitti uduu hin ta'in, akka nama baallii qabuutitti waan isaan barsiiseef.