Raajii Yoonaasii 1 - Kitaaba Woyyuu

Yoonaas Ajajamuu Dide

¹ Dubbiin raagaa ka Rabbi Yoonaasii ilma Amitaayiititti mudhise kana;

² «Ka'iitii gara Nanawwee qachatti guddo'oo deemi; ani hammeenna banii isi'ii argeeraa laagaa kee ol qabadhuu dheekkamsaan isi'itti lallabi.»

³ Yoonaas ammo Rabbiin afo'oo dheessuu yaadee gara Tarsesii deemu'uuf ka'e; gara Iyyoophe'ee gad bu'ee markaba gara Tarsesii deemtu argatee haga gatii deemsaaf isa barbaachisu kennee maayessa markabattii keessa seene; yaanni isaa Rabbiin afo'oo dheessu'uuf ture.

⁴ Rabbi ammo galaana irratti dambalii jabaa kaase; dambaliin galaana irratti ka'e waan jabaa ta'eef markabattiin cabuu geette.

⁵ Worri markaba yaabbatan waan guddisanii sodaataniif maruu gara Waaqa ufii iyyan; waan markabatti'itti ulfaate dhidhisuu yaadanii meeshaa isii keessa jiru baasa'aa galaanatti gatan; Yoonaas ammo kutaa markaba keessaa gara cinaa gad aanuutiin ciisee hirribni guddaa isa fudhatee ture.

⁶ Ajajaan worra markaba oofuu gara isaa dhiyaatee «Attamitti rafta? yabo'oo ka'ii Waaqa kee waamadhu; maal laataa inni garaa nuu laafee lubbuu teenna hambisuu danda'a ta'aa» jedheen.

⁷ Worri markaba keessa jiran maruu akkana woliin jedhan, «Akka nu waan hamaa kana irratti kufnu eennu akka sababaa waan kanaa ta'e beeku'uuf koottaa'a hixaa wolii buufnaa.» Hixaa wolii buusanii hixaan sun Yoonaasii baye.

⁸ Kanaafuu isaan Yoonaasiin «Wonti hamaan kun maruu ka nu irra gaye sababaa eennuu sitti fakkaata? hujiin kee maali'i? eessaa dhufte? biyyi kee eessa? ati gosa kami? mee nutti himi!» jedhaniin.

⁹ Yoonaasillee isaaniin «Ani nama gosa Ibrootaati; Rabbii Waaqa sami'ii ka ardi'ii fi galaana uume waaqeffadha» jedhee isaanii deebise.

¹⁰ Akkaataa inni dura isaanitti himeen Yoonaas akka Rabbiin jalaa dheesse beekan; kanaafuu isaan guddisanii sodaatanii «Ati maaf waan kana goote?» jedhaniin.

¹¹ Dambaliin galaanaa waan isaanitti jabaata'aa deemeef worri markaba yaabbatan Yoonaasiin «Akka dambaliin kun cadhisu attam si godhuu woyya?» jedhanii gaafatan.

¹² Yoonaasillee isaaniin «Wonti dambaliin kun isinitti ka'eef akka sababaa yakka kiyyaaf ta'e ani hin beeka; kanaafuu fuudha'aa galaanatti na gataa'a; yoo san dambaliin isin irraa cadhisaa» jedhe.

¹³ Worri markaba yaabbatan garuu hunna qaban maraan markabatti oofa'aa gara qaccee galaanaa geessu'uuf badadan; dambaliin ammo waan guddisee jabaa ta'eef kana godhani'iifillee gara qacce'ee geessuu hin dandeenne.

¹⁴ Kanaafuu worri markaba yaabbatan, «Rabbi Gooftaa keenna! yoo nu'u akka lubbuun nama kanaa badu goone nu hin balleessin; ati waan ufii feete waan gooteef akka waan nu'u dhiiga nama qulqullu'uu jissinee gootee nutti hin laakkayin!» jedhanii Rabbitti iyyatan.

¹⁵ Kanaan maayessa Yoonaasiin fuudhanii galaanatti gannaan dambaliin galaanaa cadhise.

¹⁶ Sababaa kanaaf worri markaba yaabbatan waan Rabbiin guddisanii sodaataniif ciincaa dhiyeessanii woreegallee qabaniif.

¹⁷ Rabbi qurxummii guddaa akka Yoonaasiin liqimsu ajaje; kanaafuu Yoonaas garaa qurxummi'ii keessa halkan sadihii fi guyyaa sadihii ture.