Ergaa Yaaqoob 2 - Kitaaba Woyyuu

Nama Wol Caalchisuu Irraa Uf Eegi

¹ Obboleeyyan tiyya! Waan amantii kabajjamaa Gooftaa keenna Yesuus Kiristoosii qabattaniif, fuula namaa laala'aa wol hin caalchisinaa'a.

² Namni uffata bareedaa uffatee, qubee worqi'ii godhatee, wol gayii keessan yoo seenee fi hiyyeessi uffata xurii uffate ammo yoo seene,

³ Ka uffata bareedaa uffate laaltanii, «Ati hulee mishaa kana taa'i» yoo jettaniin; hiyyeessa uffata xuri'ii saniin ammo, «Ati achi dhaabadhu yookaan luka kiyya jala taa'i» yoo jettaniin,

⁴ Ufii wol qooda'aartanii mii? Abboota seeraa ka yaada hamaa qaban ta'uu keessanii mii?

⁵ Obboleeyyan jaalatamtoota dhagayaa'a! Rabbi akka amanti'iin dureeyyii ta'anii fi akka isaan jeennata inni worra isa jaalataniif waadaa gale san galaniif hiyyeeyyii adunyaa tanaa filateeraa mii?

⁶ Isin ammo hiyyeeyyii salphiftan; Dureeyyiin worra isin dhiphisuu mii? Worri gara mana murti'ii isin harkisan isaanii mii?

⁷ Worri maqaa mishaa ittiin waamamtan arabsan isaanii mii?

⁸ Akkuma kitaabni woyyuun, «Hiriyyaa kee akka uf jaalattutti jaaladhu» jedhu seera mooti'iillee yoo raawwattan waan mishaa gootan.

⁹ Afoo namaatitti ammo yoo ka nama wol caalchiftanii, cubbuu hojjata'aartan. Seerrillee akka nama yakkamaa tokkootitti isinitti murteessa.

¹⁰ Namni seera maraa eegee tokko yoo cabse eennullee yoo jiraate maraanuu yakkamaa ta'a.

¹¹ Ka «hin seebarin» jedhe akkasuma «hin ajjeessin» jedheera. Uduu hin seebarrellee deebiftee yoo nama ajjeefte seera irra darbiteerta.

¹² Akka worra seera wolabummaa kennu afo'otti dhiyaattanii murtii argattanitti dubbadhaa'a; hojjadhalle'e.

¹³ Ka namaan hin araaramne, murtii araara hin qabnetu isa eeggata. Araarri murtii injifata.

Amanti'ii Fi Hujii

¹⁴ Obboleeyyan tiyya! «Amantii qaba» jedhee garuu namni huji'iin hin mudhifne yoo jiraate bu'aa maal isaa qabaa? Amantiin isa fayyisuu danda'aa?

¹⁵ Namni tokko isin keessaa obboleessaa fi obboleettii waan nyaatanii fi waan uffatan dhabaniin,

¹⁶ «nagayaan deemaa'a; quufaa ibidda oo'ifadhaa'a! quufaa'a!» uduu isaaniin jettanii waan nafa isaaniitiif barbaachisu yoo hin kennineef bu'aa maal isaanii qaba?

¹⁷ Eegasuu amantiin huji'iin hin mudhanne yoo jiraatte amantiin sun ta duute.

Ka Dhageette Hujii Irra Oolchi

¹⁸ Haa ta'uu ammo namni tokko, «Ati amantii qabda; anillee hujii qaba» yoo jedhe, «Amantii kee huji'iin adda baasii natti mudhis; ani amantii kiyya huji'iin si mudhisa» jedha.

¹⁹ Rabbi akka tokko ta'e ati hin amanta. Waan mishaa garuu jinniinillee akkasuma hin amana; hin sodaata.

²⁰ Ati nama gowwaa'a! amantii huji'iin addaan baye ka du'e akka ta'e beekuu feetaa?

²¹ Abbaan keenna Abrahaam ilma ufii Yisaaqiin hennaa ciinca'aaf dhiyeesse huji'iin qajeelaa hin taanee?

²² Amantiin hujii woliin akka wol gargaara'aa ture, amanti'iin hujiin akka raawwatame argitaa?

²³ Kitaabni, «Abrahaamillee Rabbitti amanee qajeellummaa ta'ee laakkayameef» ka jedhe raawwatamee jaalallo Rabbii jedhame.

²⁴ Namni amantii calla'aan uduu hin taane huji'iin akka qajeelaa ta'e argitaniirtan.

²⁵ Akkasuma seebartuun Ra'aab ammo ergamtoota simattee karaa biraatiin hennaa ergite, huji'iin qajeeltuu hin taanee?

²⁶ Akkuma foon lubbuu irraa baye ka du'e ta'e, akkasuma ammo amantiin huji'iin adda fooyame ka du'e.