Kitaaba Saamu'eelii ka 2ffaa 24 - Kitaaba Woyyuu

Daawiti Banii Laakkaye

¹ Rabbi hennaa lammeesso'ootiif worra Israa'eliitiin lolee Daawitiin, «Deemiitii worra Israa'eliitii fi worra Yihuuda'aa laakkayi!» jedhee isaan irratti muude.

² Kanaaf mootichi Iyyoo'aabiin, «Worra si woliin jiran ka loltoota ajajan, laakkobsa bani'ii beeku'uuf Daanii jalqaba'aatii haga Beersaabeehii banii keessa deema'aatii laakkayaa'a» isaaniin jedhe.

³ Iyyoo'aab mootichaan, «Ijji mootii kiyyaa uduu argu, Rabbi Waandhi kee banii amma jiru irratti dachaa dhibbaa haa eda'u garuu mootichi gooftaan kiyya maaf waan kana jaalata?» jedheen.

⁴ Waan mootichi jedhe Iyyoo'aabii fi worri loltoota ajaju fudhatanii worra Israa'elii laakkayu'uuf mooticha biraa deeman.

⁵ Laga Yoordaanosii ceeyanii ladda qachaa Iyyaazeerii ta dhooqa Gaadii jirtu gara kaabaatiin Ero'eeritti quphatan.

⁶ Achiillee gara Gala'aadii biyya Tabaasoonii Adaasaayii dhaqanii gara Daaniyaaniillee gayan; gara Siidoona'aallee hin naannayan.

⁷ Gara kushee worra Xiroosii worra Eewwotaatii fi gara qachaa worra Kana'aanii maraa dhaqanii Yihuudaa gara kibbaatiin Beersaabeehiin keessa lufan.

⁸ Biyya maraa keessa naannayanii ji'a sagalii fi guyyaa diddamaan maayessa gara Yerusaalemii deebi'an.

⁹ Iyyoo'aab laakkobsa bani'ii laakkayee mootichatti kenne; Israa'eliin keessatti worri guraade'een lolan namoonni jajjabaan namoota haga kuma dhibba saddeetii turan; namoonni Yihuuda'aa ammo haga namoota kuma dhibba shanii turan.

¹⁰ Garuu Daawiti haga banii laakkayeen maayessa nayee, «Rabbii kiyya! Ani waan godhe marattuu si yakkeera, yabo'oo Waaqa kiyya! dogoggora guddaa waan hojjadheeruuf cubbuu garbicha keetii akka dhiiftu si kadhadha» jedheen.

¹¹ Daawiti hennaa ganamaan ka'u, dubbiin Rabbii gara Gaadii raatticha Daawitii ka akkana jedhu dhufe.

¹² «Deemii Daawitiin, ‹Rabbi akkana jedha waa sadihii si afoo kaaya, waan si afoo kaawu sanniin keessaa kamiin akka si irratti raawwadhu tokko keessaa filadhu› jedhii itti himi» jedheen.

¹³ Gaad gara Daawitii dhaqee, «Biyya keetitti beelli haga woggaa sadihii haa dhufuu? mo'o, diintonni tee haga ji'a sadihii si haa ari'anii; mo'o, balaan biyya kee irratti guyyaa sadihiif haa ta'uu? ka na ergetti maal akka deebisu yaadii qoradhuu natti himi» jedheen.

¹⁴ Daawiti Gaadiin, «Ani waan guddisee rakkata'aaruuf, araarri isaa waan guddaa ta'eef ka harka namaa irratti kufee mannaa ka harka Rabbii irratti kufe naa woyya» jedheen.

¹⁵ Kanaaf Daawiti balaa filate, hennaa qamadiin haamamu balaan banii jiddu'utti ka'ee nama kuma torbaatamaa ajjeese.

¹⁶ Maleekkaan Rabbii Yerusaalemiin balleessu'uuf hennaa harka ufii hiixate, Rabbi waan hamaa saniif gaddee maleekkaa banii fixa'aaruun, «Amma hin gayaa harka kee deeffadhu» jedheen; hennaa san Maleekkaan Rabbii Oorii nama gosa Iyyaabuusiitii fi Oobdii bira ture.

¹⁷ Daawiti hennaa maleekkaa banii dhaya'aaru arge Rabbiin, «Ani hin yakke; hujii dabaa hojjadhe; garuu baniin kun maal balleesse? balaan kun anaa fi mana abbaa kiyyaa irra akka ta'u si kadhadha» jedhee dubbate.

Daawiti Hulee Ciinca'aa Ijaare

¹⁸ Gaafa san Gaad Daawitiin bira dhaqee, «Ka'ii oobdii Oorna'aa nama gosa Iyyaabusiititti hulee ciinca'aa Rabbii ijaari» jedheen.

¹⁹ Daawiti akkuma Gaad isatti himetti dubbii Rabbiitiif ajajamee baye.

²⁰ Oornaan ol jedhee yoo laalu mootichinii fi bulchoonni ka gara isaa dhufa'aaran argee, mooticha afo'otti gad jedhee nagaya gaafate.

²¹ Oornaan, «Mootii kiyya! maaf garana as dhufte? jedhee gaafate; Daawiti, «Rabbi akka balaa banii irraa kaasu, Oobdii kee si irraa bitee hulee ciinca'aa Rabbiif hojjachu'uuf dhufe» jedheen.

²² Oornaan Daawitiin, «Akkuma mootichi gooftaan kiyya fedhe hulee ciinca'aa Rabbiif haa ijaaruu; waan hulee ciinca'aa irratti ciinca'aaf dhiyaatan sangoonni kunniin hin jiran, wonti qoraan ta'u, qambarri isaan itti xamadamanii fi munni midhaaniin dhayan maruu kunooti» jedheen.

²³ Oornaan, «Mootii kiyya! Oornaan waan kana maraa mootichaa kenna» jedheen; Oornaan mootichaan, «Rabbi Waandhi si irraa haa jaalatu» jedheen.

²⁴ Mootichi Oorna'aan, «Gati'iin si irraa bita malee akkanaan si irraa hin fudhadhu, ciincaa Rabbii Waaqa kiyyaaf dhiyeessu gatii malee hin dhiyeessu» jedheen; achiin maayessa Daawiti Oobdi'ii fi sangoota saqilii shantamaan bite.

²⁵ Achitti Daawiti hulee ciinca'aa Rabbiif hojjatee ciincaa ciincawuu fi ciincaa fayyinnaa dhiyeesse; Rabbillee waan inni biyyaaf kadhate dhagayee balaa worra Israa'elii irraa dhoogge.