Kitaaba Saamu'eelii ka 2ffaa 1 - Kitaaba Woyyuu

Daawiti Du'a Saamu'eelii Dhagaye

¹ Saa'ol haga du'een maayii Daawiti worra Amaaleqii ajjeesee deebi'ee guyyaa lamaa Tsiqilaagiin taa'e.

² Guyyaa sadeesso'ootitti namni tokko qe'ee Saa'oliitii uffata ufii tarsaasee daaraa mataa ufiititti firfirsee ture; gara Daawitii dhufee kallachaan gad kufee simateen.

³ Daawiti, «Eessaa dhufte?» jedhee gaafateen. Innillee, «Qachaa Israa'eliitii dheessee dhufe» jedheen.

⁴ Daawiti, «Mee waan ta'e natti himi» jedheen. Innillee, «Loltoonni teenna hulee lolaatii hin dheessan; namoota keenna keessaa nama heddutu du'e; Saa'olii fi ilmi isaa Yoonaataanillee du'aniiran» jedheen.

⁵ Daawitillee gurbicha oduu fideen, «Saa'olii fi ilmi isaa Yoonaataan akka du'e attamitti beette?» jedheen.

⁶ Gurbichi oduu fide «Ani akkuma tasaa gara gaara Gilbo'a'aa dhufe; Saa'ol eboo ufii irkifatee dhaabatee ture; worri konkolaataa fardaatiin deemanii fi abboonni farado'oo worri diintota isaanii isaan qabu'uuf hennaa itti dhiyaatan arge;

⁷ Uf duuba midhatee na argee na waame, anillee yaa jedhe.

⁸ Inni ati eennu? naan jedhe; anillee Amaaleqicha jedhee deebiseef.

⁹ Inni, ‹Ani du'uuf gaggabeeraa; lubbuun tiyya haga ammaa na keessa jirti, na irra dhaabadhuutii na ajjeesi!› naan jedhe.

¹⁰ Anillee haga kufeen maayii akka hin hafne argee irra dhaabadhee ajjeese; gonfoo mataa isaa irraa; bitoo harka isaa irra jiru fuudhee garana gara gooftaa kiyyaa fideera.»

¹¹ Daawitii fi worri isa woliin jiran maruu gaddanii uffata ufii bibbiinxan;

¹² Isaan guraade'een waan du'aniif Saa'ol, ilma isaa Yoonaataa, banii Rabbiitii fi worra Israa'elii maraafuu guddisanii gaddanii booya'aa haga galgalaa sooman.

¹³ Daawitillee gurbicha oduu fideen, «Ati nama biyyamiiti?» jedhe. Innillee, «Ani ilma nama worra Amaaleqiititti galee jiraatu tokkooti» jedhee deebiseef.

¹⁴ Daawitillee, «Nama Rabbi dibe ajjeesu'uuf harka kee hennaa hiixattu maaf sodaachuu dhabde?» jedheen.

¹⁵ Kanaan maayessa Daawiti worra isa woliin jiru keessaa tokko waamee, «Ajjeesi» jedhee ajajeen; inni hin dhayeen namichillee hin du'e.

¹⁶ Daawiti, «Nama Rabbi dibe ajjeeseera jettee afaan keetiin waan ufitti raddeef, ufitti murteessiteerta» jedheen.

Daawiti Waan Du'a Saa'oliitii Fi Waan Du'a Yoonaata'aatiif Faarsee Booye

¹⁷ Daawiti waan Saa'olii, waan ilma Saa'olii waan Yoonaata'aa faaruu gaddaa kana faarse.

¹⁸ Ijoollee Yihuuda'aallee akka barsiisan ajaje; faaruun kun kitaaba yaashaarii keessatti barreeffameera.

¹⁹ «Yaa Israa'el! janni kee gaarran gubba'atti woraannamee du'e! jajjaboonni attamitti kufan!

²⁰ Dubartoonni Filisxeemii akka hin gammanne, dubartoonni worra Yihuudii hin taanee akka hin ililfanne, oduu kana Geetiin keessatti hin odeessinaa'a; raasaa Asqaloona'aatitti hin labsinaa'a.

²¹ «Isin gaarran Gilbo'a'aa! rooba ta'ee'e fixeensi isin irratti hin bu'in! qonni keessan womaa hin biqilchin! gaachenni jajjabootaa achitti waan kufeef; wonteen Saa'olii saayiti'iin waan hin dibamneef

²² Eboon Yoonaata'aa hin ajjeesa, guraadeen Saa'olii ka diina kukkutu jajjaboota dhayee ka caccabsuu fi ka diina ajjeesu ture.

²³ «Saa'olii fi Yoonaataan wonti wol ta'aniif waan wol jaalataniif; jireennaa fi du'a isaaniitiin adda hin fooyamne, bajjaan caalaa ariifatan; leenca caalaa jajjaboota turan.

²⁴ «Dubartoota babbareeddan Israa'elii! shinshinii dhiilgee gatii gudda'aa ka isinitti uwwisa'aa tureef Saa'olii uffata keessan worqi'iin bareechisee boyaa'a!

²⁵ «Lola san jiddu'utti jajjaboonni attamitti kufan? Yoonaataan tulluuwwan kee irratti ajjeefamee kufeera.

²⁶ «Obboleessa kiyya Yoonaataa! ani waan keetiif guddisee gadde; ati anaaf jaalalloo turte jaalala guddaa naa qabda ture; jaalalli kee jaalala dubarti'ii caalaa gudda'a.

²⁷ «Jajjaboonni attamitti kufan? meeshaan lolaallee attamitti bade?»