Mike 1 - Kisin Kiraan Kitabuna

¹ Alatala falan naxanye ti Mike Moreseti kaan xa Manga Yotami nun Manga Axasi nun Manga Xesekiya waxatine yi, Yuda yamanan mangane. A fe tooni ito nan ti alo xiyena lan Samari taan nun Yerusalɛn taane fe ma.

² Ɛ tuli mati, ɛ tan siyane birin! I tan bɔxɔna, i tuli mati, e nun muxun naxanye birin a yi. Marigina Alatala sereyaan bama nɛn ɛ xili ma. Marigin nan a falama keli a Batu Banxi sariɲanxini.

Ala Samari taan nun Yerusalɛn taan makitima nɛn

³ A mato, Alatala minima a dɔxɔdeni. A godoma, a sigan tima bɔxɔn yire matexine fari.

⁴ Geyane xulunma ayi a sanna bun ma, lanbanne yibɔma e tagi alo kumin dɛngbɛn tɛɛn ma, alo ige bɔxɔnxin tintinna ra.

⁵ Na birin Yaxuba yamaan murutɛna fe ra, Isirayila yamaan yulubine fe ra. Nde Yaxuba yamaan namurutɛxi? E manga taa Samari kaane xa mi a ra ba? Nde tixi Yuda yɛɛ ra suxure batuni? E manga taa Yerusalɛn kaane xa mi a ra ba?

⁶ Ala naxa, “N Samari taan findima nɛn taa xɔnna ra burunna ra, manpa bili nakɔ yirena. N na a banxi gɛmɛne ragodoma nɛn lanbanne yi, n yi a banxine sandɔxɔne ramini kɛnɛnni.

⁷ A suxurene birin yibɔma nɛn dungi dungin na. Tɛɛn nan e kide se ralixine ganma. N na a batu seene birin kalama nɛn, e naxanye malanxi yalundene sarene xɔn, e mɔn sa findima nɛn yalundene saren na.”

⁸ Nanara, n wugama nɛn, n gbelegbele, n san yigenla nun n nagenla yi sigan ti. N gbelegbelema nɛn alo kankona. N kutun alo xutunxunbane.

⁹ Amasɔtɔ Samari kaane furen mi yalanma. A bata Yuda yamanan li. A bata n ma yamaan taan so dɛɛn li han Yerusalɛn taana.

¹⁰ Ɛ nama a fala Gati taani. Ɛ nama a wuga! Ɛ makutukutu burunburunni Beti-Leyafira taani.

¹¹ Safiri kaane, ɛ yagixin nagenla xa dangu! Saanan kaane, ɛ nama susu minɛ. Beti-Hayeseli taan sununi, e mi ɛ maliyɛ.

¹² Maroti kaane xaminxi e hɛrina fe ra, bayo Alatala bata gbalon nagodo, han Yerusalɛn taan so dɛna.

¹³ Ɛ tan Lakisi kaane, ɛ soone nun wontorone yitɔn! Ɛ tan nan Siyon kaane tixi yulubin ma bayo Isirayila kaane yulubin naxanye ligama e ne toxi ɛ konna nan singe yi.

¹⁴ Nanara, Yuda kaane, ɛ masigama nɛn Moreseti-Gati taan na. Akisibu taan findima luti ratixin nan na Isirayila mangane yɛɛ ra.

¹⁵ Ala naxa, “Ɛ tan Maresa kaane, n mɔn ɛ yɛngɛfaan nafama nɛn ɛ xili ma. Isirayila manga binyena a gima nɛn a sa a luxun Adulan faranna ra.

¹⁶ Ɛ xunna bi ɛ rafan dii xɛmɛne wuga feen na! Ɛ xunna gbanan alo dugan xun xɔnna, amasɔtɔ e sigama nɛn ɛ diine ra pon!”