Yuda 1 - Kishambala New Testament 2005

Tulo.

¹ Yuda, mtuṅwa ywa Yesu Kilisito, nduγuye ja Yakobo, nagondela weyangu baluwa waitangwawo, niwokundisha kwa viya, wavyoanga na Mulungu Tate, kangi wavyokiγoja kwa mbuli ya Yesu Kilisito.

² Mγenyezeziγwe mbazi na utondolo na lukundisho!

Tishetongele waazaγanyi.

³ Wambuyangu, nizakihimisha, nimigondele mbuli za uhonya wetitala toshe, kwa ivyoho shuli nimigondele na kumihimila, mwomane nkondo kwa mbuli ya mtozesho, waṅazi wainkiγwewo haho.

⁴ Hambu kuna wantu kuṅwe waingilewo kinjamanjama, wagondelwawo kale mlaho wawe, kuti wamweza Mulungu, wakitenda uhambanyi waγamba: Mulungu ywetu ana mbazi, hata tikitenda mijiile mibada; kangi yuja Zumbe ike, Zumbe ywetu Yesu Kilisito, wamwikila nkani.

⁵ Hata mkitaila ivi vyoshe, nakunda kumikumbusha iyo mbuli kuti: Zumbe akilavya mbali yakwe mwe shi ya Egiputa azabinda waja, ndiwo wakishetozesha vituhu.

⁶ Hata walau wabanilewo wenye ufuṅwa wawe, wakilawa kwawe kaya, azawashunga he lwiza na mazolo yekalama, kangwe nezewalahwe masa, uja mushi mkulu wa masa ukizabula.

⁷ Sodoma na Gomola na mizi yawe ye nkandai iγosholeyo kilanga sa viyaho, ikitenda luzisho na mili miγeni, haho iilahiγwe, itionyeshe, mlaho wa moto wa ukalami ulivyo.

⁸ Ivyoho hata waja wekaloshiγwa wakandanya mili yawe, wabela ufuṅwa, wakanka utanangwa.

⁹ Mlau mkulu Mikayeli akiomana na Satani wakikananilana kimba cha Mose nkakundile kumlaha haṅwe na kumkanka, miya azalonga du kuti: Zumbe neakuifye!

¹⁰ Miya awa wabela vyoshe, washivyotaila, miya viya, wavyotaila vya mili yawe sa nyama zishinazo lutwi, wabanika navyo.

¹¹ Wana mlaho, kwa kuti watongela sila ya Kaini, waazaγanyiγwa wakiufiγwa ni upokezi wa Bileyamu, wabanika kwa mbuli ya nkani sa ziya za Kola.

¹² Awa ne weja haṅwe na inywi nkande za mbazi na kusheogoha, miya ni wapepe, wakilisha wenye, ni mazunde yashinayo fula, yeasiγwa ni mpeho du, ni miti ishinayo mahungo, ishivovyaia, ifileyo kaili, ibindileyo kuṅofuka.

¹³ Ni maimbi ya bahali ye nkani, yetefuka ubada wawe wenye; ni ntondwe zishizotoγa, waikilwe mlaho wa lwiza lwa ukalami.

¹⁴ Hata awa kuna ateγanyeye mbuli yawe, ni Henoki, muntu ywa mfungate, ukianda kutala kwa Adamu, aγamba: Zumbe aiza na makulija ya waṅazi wakwe kwa longa

¹⁵ masa na kwa laha woshe na kwa ifya woshe wamwezizewo Mulungu kwa mbuli za lwezo lwawe, wamwezizelo nalo, na kwa mbuli zoshe za ntoγo, wahuza wawiwi wamlongilezo.

¹⁶ Awa ni wenoṅoneza, weihilwa ni mbuli zoshe, wetongela kihelehele chawe du, welonga na vyanwa vyawe mbuli za mahiku, watogola wantu, wenye wai haho, kangwe wainkwe.

¹⁷ Miya inywi wambuyangu, fukilai ziya mbuli zelongwa kale ni ziya ntuṅwa za Zumbe ywetu Yesu Kilisito!

¹⁸ Awa wazamiti: Mishi ya bindilizo kutazaoneka wefyulila mbulingwa, wetongela kihelehele choshe cha uhambanyi wawe.

¹⁹ Awa ne weγenyeza nkumbizi, ni wa kiinushi, nkawana mpehongwa.

²⁰ Miya inywi wanduγu, γesanyai na mtozesho wenyu mṅazi! Vikai kwa nguvu ya mpeho ṅazi!

²¹ Kiolelei, mwange na lukundisho lwa Mulungu! Afizai mbazi ya Zumbe ywetu Yesu Kilisito yeminka nkalamo!

²² Tendai mbazi na waja wevivilwa!

²³ Wahonyei mkiwalavya mwe moto! Watuhu tendai mbazi nawo kiwoγawoγa! Mshekunde hata shuke ikandanyiγweyo ni uhambanyi wa ṅwili!

²⁴ Yuja mwedaha kumiγolokela, kangwe mshebane, mwedaha kumiika he utana wakwe, mwi kishimasa na nyemi,

²⁵ Mulungu ike atiγalukileye mvunizi mwe Zumbe ywetu Yesu Kilisito, atogolwe, agimbikwe! Nguvu na ufuṅwa ni wakwe aho kale hoshe na ivi lushe na mishi yetongela yoshe! Amini.