Yohana 7 - Kishambala New Testament 2005

Yesu ahita kwe mviko Yelusalemu.

¹ Vikibinda Yesu azaanga kuja Galileya, hambu nkakundile kuanga uko Yudeya, kwa kuti Wayuda wazalonda, ndivyo wamkome.

² Miya uja mviko wa Wayuda weikailwa mwe makumbi ne ui hehi.

³ Wanduγuze wazamuti: Uka kunu, uhite Yudeya, wahina wako waone ndima, uzoγoshola.

⁴ Hambu nkakuna mweγoshola mbuli na kuzifisha akikunda kutailikana. Ati viya waviγoshola, lawila inu shi ṅwenye!

⁵ Hambu wanduγuze ne washizati wamtozeshe.

⁶ Yesu azawati: Mishi yangu nkainati, miya mishi yenyu i haho mishi yoshe.

⁷ Inywi inu shi nkaidaha kumishuka, miya imi yanishuka, kwa kuti nailonga uwona, kuti miγoshwele yakwe ni mibada. Inywi hitai kwe uwo mviko!

⁸ Imi seninekwela kwe unu mviko, hambu mishi yangu nkainati itimize.

⁹ Akibinda kuwalonga ivyoho azananyamala Galileya.

¹⁰ Wanduγuze wakibinda kukwela kwe uja mviko, yohena azakwela, miya nkalawile cha sale, atekifishafisha.

¹¹ Wayuda wazamlonda mishi ya uja mviko, wazaγamba: Yuja a kuhi?

¹² Hambu kwa wantu kuna nkanani nyingi kwa mbuli yakwe, kuṅwe wazaγamba: Ni muntu mtana, kuṅwe wazaγamba: Sivyo, aazaγanya wantu.

¹³ Miya nkakuna alongileye mbuli yakwe cha sale kwa kuogoha Wayuda.

Yesu afuza mifuzize ye nguvu.

¹⁴ Mishi ya uja mviko ikibula gati, Yesu azakwela mwe vikilongwa, azafuza.

¹⁵ Wayuda wazamaka angwe: Uyu ataila zeze ugondengwa, kangi nkaufuziγwe?

¹⁶ Yesu azawahitula, azawati: Mifuzize yangu so yangu, ni ya yuja anitumileye.

¹⁷ Ati muntu akunda kuγoshola, yuja avyokunda, atataila mifuzize yangu, ati ianduka kwa Mulungu, ati nilonga yangu ṅwenye.

¹⁸ Mwelonga vyakwe ṅwenye alonda, agimbikwe ṅwenye; miya mwelonda, yuja amtumileye agimbikwe, uyu ni mkweli, kangi ubada nkana nawo.

¹⁹ So Mose aminkileye vitigo? Kangi inywi nkakuna mweγoshola vitigo. Mulondelai kunikoma?

²⁰ Wantu wazamlandula, wazamuti: Una mzimu! Mwelonda kukukoma ni ndai?

²¹ Yesu azawalandula angwe: Ndimaṅwenga nizaiγoshola, mzaimaka nyoshe.

²² Mose akimilaγiliza kushenga wana, so kwa kuti ni mbuli ya yuja Mose, ni ya wakale; kangi inywi mushi wa sabato mwashenga muntu.

²³ Ati ṅwana ashengwa mushi wa sabato, kangwe kitigo cha Mose chishebaniγwe, lushe ni zeze, mkikwelwa ni maya na imi, kuti nizahonya muntu mgima mushi wa sabato?

²⁴ Mshehakilahila kwa viya, muvyoona! Miya lahai masa yeagiza!

Yesu aanduka kwa Mulungu.

²⁵ Wayelusalemu kuṅwe wazaγamba: Uyu so yuja, wayelonda kumkoma?

²⁶ Kangi shivyo: Alonga cha sale, kangi nkawamlandula. Wafuṅwa watetaila kweli kuti: Uyu ni Kilisito?

²⁷ Miya uyu tamtaila, akoanduka nako, miya Kilisito ahozaizila, nkakuna mwetaila, akoanduka nako.

²⁸ Yesu azabilikila mwe vikilongwa na kufuza angwe: Kweli imi mwanitaila, mwataila, nikoanduka nako! Siizile kwa mbuli yangu, kuna mkweli anitumileye, mushimtailaye.

²⁹ Imi namtaila, hambu nianduka kwakwe, yuja ne anitumileye.

³⁰ Wazalonda ndivyo wamgwile, miya nkakuna amtozizeye na mkono, kwa kuti haja hakwe nkahazati habule.

Wantu wavyokunda kumgwila Yesu.

³¹ Miya wantu wangi wazamtozesha angwe: Kilisito ahozaizila neaγoshole ntangilo zekula kuzinka ziya, uyu azoγoshola?

³² Mafaliseyo wazaiva, kuti wantu wanoṅonezanya mbuli yakwe ivyoho, ne wavikizi wakulu na Mafaliseyo wahotuma waluγojo, kangwe wamgwile.

³³ Yesu azalonga: Mishi miγeke nike kwenyu, vikibinda nahita kwa yuja anitumileye.

³⁴ Nemunilonde, miya nkemunione; hambu ndiko niikale, inywi nkamdaha kukubula.

³⁵ Wayuda wazalonga mwe myoyo yawe angwe: Uyu aunga kuhita nahi, ndiko ishwi tishemwone? Akunda kuhita kwa weshu waasakanewo kwa Wagiliki, afuze Wagiliki wohe? Inu mbuli alongileyo, ina bontokelo ani?

³⁶ Kuti: Nemunilonde, miya nkemunione, kangi: Ndiko niikale, nkamdaha kukubula?

Yesu akoma nkilu.

³⁷ Mushi wa bindiliziza uja mviko ni mkulu kuzinka weyae; sho Yesu azaγoloka akibilikila angwe: Mwena nkilu aize kwangu, anywe!

³⁸ Mwenitozesha, sa ugondengwa uvyolonga, mwe ṅwili wakwe mtalawa mito migima ya mazi ye moyo.

³⁹ Ivyoho alongile kwa mbuli ya mpehongwa, ndiyo wakiunga kuinkwa waja wemtozesha. Hambu mpehongwa ne ishizati ioneke, kwa kuti Yesu nkazati agimbikwe.

Mkanano kwa mbuli ya Yesu.

⁴⁰ Wantu kuṅwe wakiiva izi mbuli wazaγamba: Uyu ni mteγanyingwa kweli.

⁴¹ Watuhu wazaγamba: Uyu ndiye Kilisito; watuhu wazaγamba: Kumbe Kilisito aanduka Galileya?

⁴² Ugondengwa nkauγamba kuti: Mwe mbeleko ya Dawidi na mwe muzi wa Betelehemu ne Kilisito amoanduka namo? Ivyoho wantu wazapangana kwa

⁴³ mbuli yakwe.

⁴⁴ Waja kuṅwe wazakunda kumgwila. Miya nkakuna amtozizeye na mikono.

⁴⁵ Waja waluγojo wazauya kwa wavikizi wakulu na kwa Mafaliseyo; waja wazawati: Nini mkishemleta?

⁴⁶ Angwe ni waluγojo: Kale hoshe nkakuna muntu alongileye ivyoho, sa uyu muntu avyolonga.

⁴⁷ Mafaliseyo wazawalandula: Kumbe hata inywi mzaazaγanyiγwa?

⁴⁸ Wafuṅwa ao Mafaliseyo kuna mwemtozesha?

⁴⁹ Ni waja wakiwa du washitailawo mulomongwa, wailaniγwe.

⁵⁰ Nikodemo, yuja shitileye kwakwe aho kale, ni ṅwiyae ywawe, awati:

⁵¹ Kumbe milomo yetu yamlaha muntu, aishiuziγwe bosi, aishibunkuke aγosholevyo?

⁵² Wazamlandula angwe: Kumbe iwe nawe u Mgalileya? Dosa baluwangwa, neuone kuti: Galileya nkakulawa mteγanyingwa!

⁵³ Ne wahohita kila muntu na kwakwe kaya.