Yohana 6 - Kishambala New Testament 2005

Yesu aiγusha wantu 5000. 1-15.

¹ Mishi ikizinka, Yesu azaomboka bahali ya Galileya yeitangwa ya Tibeliya.

² Wantu wangi wazamtongela, kwa kuti wazaona ntangilo, aγosholezo na kuhonya watamu.

³ Yesu azakwela mwe mulima, kuja azaikala na wahina wakwe.

⁴ Uja mviko mkulu wa Wayuda wa Pasa ne ui hehi.

⁵ Yesu akiinula mesho yakwe, akiona, kuti wantu wangi waiza kwakwe, azamγamba Filipo: Tikaγule hi nkande, awa waje?

⁶ Azalonga ivyoho na kumγeza; hambu ṅwenye aitaile, ndivyo aγoshole.

⁷ Filipo azamlandula angwe: Nkande za shilingi magana maili nkazibesha, kila muntu akiγuwa vidashi du.

⁸ Mhina ywakwe muṅwe, ni Andeleya, nduγuye ja Simoni Petelo, amuti:

⁹ Kuna kabwanga kunu kena migate mishano ya ngano na vikapala vili, miya ivi ni mbwai kwa wantu weinga aha?

¹⁰ Angwe ni Yesu: Lekai, wantu waikale ndala ndala! Haja hantu hana lwanda lukulu. Wazaikala ndala ndala, waγoshi du wazaγelemuka makulija mashano.

¹¹ Yesu azaγuwa ija migate, azalavya ntogolo, azaiinkila kwa waja waikalewo, vivyoho hata viya vikapala, sa wavyokuna.

¹² Wakiiγuta, azawaγamba wahina wakwe: Dodolai mpuγutishi zishiγalezo, kangwe kusheoneke vyebanika!

¹³ Wazadodola, wazamemeza ngahu kumi na mbili na mpuγutishi za ija migate mishano ya ngano; ne zishiγalezo, waja wakija.

¹⁴ Wantu wakiona lwitangilo, aγosholeio, wazaγamba: Kweli uyu ni mteγanyingwa mweunga kuiza mwe inu shi.

¹⁵ Yesu akitaila, kuti waunga kuiza, wamwinule, wamγalushe zumbe, azahita vituhu kwe uja mulima ṅwenye ike.

Yesu aγenda mwe bahali ulanga. 16-21.

¹⁶ Kukishwa wahina wakwe wazasheela na kwe bahali,

¹⁷ wazaingila mwe chombo, waomboke baliali na sheja na kuja Kapelinaumu. Lwiza lwigwele. Miya Yesu nkazati abule kwawe.

¹⁸ Bahali izainulwa maimbi, mpeho ikiisa kukunta,

¹⁹ wakibinda kuiγala chombo chawe luγendo lwa hindi ja saa ao kuzinka hadodo, wazamwona, avyoγenda mwe bahali ulanga; akibula hehi na chombo, wazaogoha.

²⁰ Yuja azawati: Ni miyo, msheogohe!

²¹ Wazakunda kumhokela mwe chombo, viya du lushe chombo chiibuzile mwe ija shi, wabashizeyo.

²² Keloi jakwe wantu wazaγoloka sheja he bahali, wazaona chombo kiṅwe du, nkawaene chombo kituhu kuja, kangi waiene, kuti Yesu nkaingile haṅwe na wahina wakwe mwe chombo, wazaona, kuti waja wazahita wenye du.

²³ Kuzaiza vyombo vya Tibeliya hehi na haja hantu, wajileho nkande, Zumbe akilavya ntogolo.

²⁴ Wantu wakiona, kuti Yesu nkaho, hata wahina wakwe nkawaho, wenye wazaingila mwe viya vyombo, wazahita Kapelinaumu kwa mlonda Yesu.

²⁵ Wakimwona sheja ja bahali, wazamuti: Mkulu, uizile zeze na kunu?

Nkande ya kweli.

²⁶ Yesu azawahitula angwe: Kweli namiti: Mkinilonda, so kwa kuti mzaona lwitangilo, ni kwa kuti mzaja nkande, mzaiγuta.

²⁷ Tendai nkande! Miya ija yebanika siyo, ni ija yeikala mpaka kwe nkalamo ya kale na kale, ṅwanangwa ywa muntu ayominka, ija ndiyo. Hambu uyu Mulungu Tate azamshungula ivyoho.

²⁸ Wazamuti: Titende zeze, kangwe tiγoshole ndima za Mulungu?

²⁹ Yesu azawahitula angwe: Inu ni ndimaya Mulungu, mkimtozesha yuja, amtumileye.

³⁰ Wazamuti: Uγoshole lwitangilo ani, tiluone, tikutozeshe? Una ndima ani?

³¹ Watate zeshu wazaja mana mwe nyika, sa vigondiγwevyo: Azawainka nkande ilawileyo mwe lwingu, waje.

³² Yesu azawati: Kweli namiti: Mose siye aminkileye ija nkande ilawileyo mwe lwingu, ni Tate mweminka nkande ya kweli ilawileyo mwe lwingu.

³³ Hambu nkande ya Mulungu ni yuja asheeleye mwe lwingu, ne mweinka inu shi nkalamo.

³⁴ Wazamuti: Zumbe, tinke mishi yoshe iyo nkande!

Nkande ya nkalamo.

³⁵ Yesu azawati: Imi ni nkande ya nkalamo; mweiza kwangu nkezeaone sala, mwenitozesha nkezeaone nkilu.

³⁶ Miya nizamiti: Mzaniona, kangi nkamunitozeshe.

³⁷ Vyoshe, Tate avyoninka, vyaiza kwangu, kangi mweiza kwangu, senimubente na se.

³⁸ Hambu nizasheela mwe lwingu, so kuγamba: Niγoshole nivyokunda imi, miya yuja anitumileye avyokunda.

³⁹ Ivi ne yuja anitumileye avyokunda: Vyoshe, avyoninka, nishevimwazize, miya nivifufule mushi wa bindilizo.

⁴⁰ Hambu ivi ne Tate avyokunda: Kila mwemwona ṅwanangwa akimtozesha ainkwe nkalamo ya kale na kale, kangi imi nitamfufula mushi wa bindilizo.

⁴¹ Wayuda wazaṅuna, kwa kuti azalonga: Imi ni nkande ilawileyo mwe lwingu,

⁴² wazaγamba: Uyu siye Yesu, ṅwana Yosefu? Ishwi nkatimtaila ishe na nine? Lushe alonga ywai kuti: Nizasheela mwe lwingu?

⁴³ Yesu azawalandula angwe: Msheṅunane!

⁴⁴ Nkakuna mwedaha kuiza kwangu, ati Tate anitumileye ashemhuna, nami nikimfukila mushi wa bindilizo.

⁴⁵ Kwa wateγanyingwa kuigondiγwe: Woshe nezewaikale waihinyiγwe ni Mulungu. Kila mweiva mbuli zelawa kwa Tate na kuzihina aiza kwangu.

⁴⁶ Muntu nkamwene Tate, amweneye ni yuja, ndiye akiikala kwa Mulungu; uyu ne amweneye Tate.

⁴⁷ Kweli namiti: Mwetozesha ana nkalamo ya kale na kale.

^48-49 Imi ni nkande ya nkalamo. Waishe zenyu wazaja mana uko nyika, wazafa.

⁵⁰ Shinu nkande ilawileyo mwe lwingu, kangwe ndiye aije, ashefe.

Nwili na mpome ya Yesu.

⁵¹ Imi ni nkande ya moyo ilawileyo mwe lwingu; ati muntu aja inu nkande, atatenda nkalamo ya kale na kale. Nkande, ndiyo niminke, ni ṅwili wangu weinkilwa, kangwe inu shi itende nkalamo.

⁵² Wayuda wazakanana lushe kuγamba: Uyu adaha zeze kutinka ṅwili wakwe, tiuje?

⁵³ Yesu azawati: Kweli namiti: Ati nkemuje ṅwili wa ṅwanangwa ywa muntu, ati nkemunywe mpome yakwe, nkamna nkalamo kwenyu.

⁵⁴ Mweja ṅwili wangu, mwenywa mpome yangu, ana nkalamo ya kale na kale, nami nitamfufula mushi wa bindilizo.

⁵⁵ Ṅwili wangu ni uje we kweli, mpomeyangu ni unywewe kweli.

⁵⁶ Mweja ṅwili wangu, mwenywa mpome yangu ana imi, nami nina naye.

⁵⁷ Sa Tate mwe moyo anitumilevyo, sa nivyona nkalamo kwa mbuli ya Tate, vivyoho yuja, ndiye anije, atatenda nkalamo kwa mbuli ya imi.

⁵⁸ Inu ni nkande ilawileyo mwe lwingu, so sa viyaho vya waishe zenyu wajilevyo, kangi wazafa. Ndiye aje inu nkande, atatenda nkalamo ya kale na kale.

⁵⁹ Ivi azavilonga akifuza vikiloi kuja Kapelinaumu.

Wahina waṅuna.

⁶⁰ Wahina wakwe wangi wakiviiva wazaγamba: Mbuli inu ni ndala, mwedaha kuiiva ni ndai?

⁶¹ Yesu akitaila ṅwenye, kuti wahina wakwe wamṅuna, azawati: Ivi vyamiihila?

⁶² He ati mwamwona ṅwanangwa ywa muntu, akikwela na kuja, ndiko akiikala?

⁶³ Mpehongwa ne yeinka wantu nkalamo, ṅwili siwo, nkauna bontokelo. Mbuli ziya, nimiγambilezo, ni za kimpeho, ni za nkalamo.

⁶⁴ Miya kuna wenyu washitozeshawo. Hambu Yesu aho kivoko aitaile waja, ndiwo washetozeshe, aimtaile yuja, ndiye nezeamwinkile.

⁶⁵ Azalonga: Kwa ivyoho nitamiγamba kuti: Nkakuna mwedaha kuiza kwangu, ati nkashungulwe ni Tate.

⁶⁶ Haja wahina wakwe wangi wazauya na nyuma, wazaleka kuanga naye.

Petelo alaviliza kuti Yesu ni Kilisito.

⁶⁷ Ne Yesu ahowati waja kumi na waili: Kumbe hata inywi mwakunda kuhita?

⁶⁸ Simoni Petelo azamlandula angwe: Zumbe, tihite na kwa ndai? Hambu mbuli uzolonga ni za nkalamo ya kale na kale.

⁶⁹ Kangi ishwi tiitozeshe, tiitaile kuti: Iwe u mṅazi ywa Mulungu.

⁷⁰ Yesu azawahitula angwe: Imi simishaγule kumi na waili? Kangi ṅwenyu muṅwe ni ṅwenye leba.

⁷¹ Miya azamlonga Yuda, ṅwana Simoni, yuja Isikaliyota. Hambu yuja ne amwinkileye uko nyuma, waja kumi na waili ni ṅwiyae ywawe.