Yohana 5 - Kishambala New Testament 2005

Yesu ahonya mtamu he ziwa ja Betesida.

¹ Mishi ikizinka kuna mviko wa Wayuda, Yesu yohe azahita Yelusalemu.

² Kuja Yelusalemu he nkili yeitangwa ya ngoto hana ziwa, Kiebuleyo jiitangwa Betesida, jina makumbi mashano.

³ Muja mwilele watamu wangi, washiwoona, washidahawo kuγenda, waholozewo mili, wazaafiza, mazi yakivuviγwa;

⁴ hambu mlau ywa Zumbe aakasheela na muja mwe ziwa, avuvye yaja mazi; lushe mazi yakibinda kuvuviγwa, mwelongola kuingila atahona, hata ni utamu ani umtozizewo.

⁵ Kuna muntu kuja, atoziγweye ni utamu wakwe mavuli milongo mitatu na mnane.

⁶ Yesu akimwona uyu, avyolala, azataila, kuti azabinda mishi mingi, azamuti: Wakunda kuhona?

⁷ Yuja mtamu azamlandula: Zumbe, sina muntu, ndiye anigele mwe iji ziwa, mazi yakivuviγwa; nikidema ṅwenye, mtuhu aingila, nishizati nibule.

⁸ Yesu azamuti: Inuka, uinule lusazi lwako, uhite! Viya du lushe yuja muntu azahona,

⁹ azainula lusazi lwakwe, azahita. Miya mushi uja ni sabato.

¹⁰ Wayuda wazamγamba yuja ahonyiγweye: Ni sabato, vina ṅwiko, ukiinula lusazi.

¹¹ Angwe ndiye: Yuja anihonyizeye azaniti: Inula lusazi lwako, uhite!

¹² Wazamwuza: Uyo akuγambileye kuti: Inula lusazi lwako, uhite!, ni ndai?

¹³ Yuja ahonyiγweye nkataile, ati ni ndai; hambu Yesu azahauka, kwa kuti haja hantu hana wantu wangi.

¹⁴ Vikibinda Yesu azamwona mwe vikilongwa, azamuti: Olela! Uzahona. Ushezabana vituhu, kangwe usheone vyeiha kuzinka viya!

¹⁵ Yuja muntu azahita, azawalonga waja Wayuda, kuti ahonyiγwe ni Yesu.

¹⁶ Ne vilekilevyo, Wayuda wakimlonda Yesu, kuti azaviγoshola mushi wa sabato.

Mlaho wa ufufuki.

¹⁷ Yesu azawalandula angwe: Tate aγoshola ndima mpaka ivi lushe, nami naγoshola ndima.

¹⁸ Kwa ivyoho Wayuda wazaisiiza kulonda ndivyo wamkome, kwa kuti nkabanile kitigo cha Sabato du, miya kwa kuti azamwitanga Mulungu, kuti ni ishe ṅwenye, kwa kuti azakiliγanyanya na Mulungu.

¹⁹ Yesu azawalandula angwe: Kweli namiti: Nkakuna mbuli, ṅwanangwa ayodaha kuγoshola ṅwenye du, ati nkamwene ishe, akiiγoshola; hambu yuja ndivyo aγoshole, ṅwanangwa yohe ataviγoshola vivyoho.

²⁰ Hambu ishe amkundisha ṅwanae, amwonyesha ndima, ṅwenye azoγoshola, hata zekula kuzinka izi neazimwonyeshe, kangwe mshemake.

²¹ Hambu Tate avyoinula wafilewo na kuwauza moyo, vivyoho ṅwanangwa yohe auza moyo, awokunda.

²² Hambu Tate nkana ayelaha, miya milahile yoshe azaiinkila kwa ṅwanae,

²³ kangwe woshe wamgimbikaye ṅwanangwa, sa wavyomgimbika Tate. Ashimgimbikaye ṅwanangwa, Tate yohena amtumileye nkamgimbika.

²⁴ Kweli namiti: Mweiva mbuli yangu na kumtozesha anitumileye, ana nkalamo ya kale na kale, nkaingila mwe masa, miya kwe kifa azakulawa, azabula kwe nkalamo.

²⁵ Kweli namiti: Nehabule, kangi ivi lushe haibuzile, ndiho wafilewo waive kanwa cha ṅwana Mulungu, kangi ndiwo waive watatenda nkalamo.

²⁶ Hambu sa Tate avyona nkalamo ṅwenye, vivyoho azaimunka ṅwanae, yohe lushe ana nkaiamo ṅwenye.

²⁷ Kangi azamunka ufuṅwa wa kulaha masa, kwa kuti ni ṅwanangwa ywa muntu.

²⁸ Mshemake iyo mbuli kuti: Nehabule, ndiho woshe we mwe mbila waive kanwa chabwe,

²⁹ walawe waja waγosholawo vitana kwe ulufubi wa nkalamo, waγosholawo vihada kwe ufufuki wa mlaho.

³⁰ Nkakuna nichodaha kuγoshola ṅwenye. Nivyoiva ne nivyolaha, kangi milahile yangu ni ya utanda, kwa kuti silonda, nivyokunda ṅwenye, nilonda, anitumileye avyokunda.

Uwona wa Yohana.

³¹ Ati nakilongela uwona ṅwenye, uwona wangu so wa kweli.

³² Ni mtuhu mwenilongela nwona, nataila kuti: Uwona, awonilongela, ni wa kweli.

³³ Inywi ne mkituma kwa Yohana; vye kweli azavilongela uwona.

³⁴ Imi silongelwa uwona ni muntu, nilonga ivyoho, kangwe mhonyiγwe.

³⁵ Yuja ne ai taa yeaka na kugwisha langaila; inywi mzakunda kuja nyemi hadodo ani he langaila jakwe.

³⁶ Miya imi nilongelwa nwona wekula kuzinka uja wa Yohana; hambu ziya ndima, Tate aninkilezo, nizibontole, zanilongela uwona, kuti Tate azanituma.

Uwona wa Tate.

³⁷ Tate anilumileye yuja azanilongela uwona.

³⁸ Kanwa chakwe nkamwachiivile, alivyo nkamwaviene; mbuli yakwe nkamna nayo, ikiikala kwenyu, kwa kuti yuja, amtumileye, inywi nkamumtozesha.

³⁹ Londezai mwe vitabungwa! Hambu inywi wenye mwafanyanya, kuti nkalamo muna nayo muja, kangi viya ne vyenilongela uwona.

⁴⁰ Nkamkunda kuiza kwangu, kangwe mwone nkalamo.

⁴¹ Sigimbikwa ni wantu; miya nizamitaila kuti:

⁴² Lukundisho lwa Mulungu nkamna nalo kwenyu.

⁴³ Imi niizile mwe zina ja Tate, miya nkamunihokela; ati mtuhu azaiza mwe zina jakwe ṅwenye, yuja nemumhokeie.

⁴⁴ Inywi mdahe zeze kutozesha mkigimbikana? Kangi ija migimbikilwe yeanduka kwa Mulungu ike nkamwilonda.

⁴⁵ Mshefanyanye, kuti nenimifyalime kwa Tate! Kuna mwemifyalima, ni Mose, muyemwalila.

⁴⁶ Hambu ati mwamtozesha Mose, mwanganitozesha nami, hambu azagonda mbuli yangu.

⁴⁷ Miya mkishetozesha, yuja agondilevyo, nemtozeshe zeze, nivyomilonga?