Yohana 4 - Kishambala New Testament 2005

Yesu na mvyele ywa Kisamaliya.

¹ Zumbe azaukwilwa, kuti Mafaliseyo wazaiva kuti: Yesu aγenyeza wahina, kuti: Abatiza kumzinka Yohana;

² kangi Yesu ṅwenye ne ashibatiza, ni wahina wakwe.

³ Azalawa Yudeya, azahita viluhu Galileya.

⁴ Haja shuti adwishe Samaliya.

⁵ Azabula he muzi wa Samaliya weitangwa Sikali, ni hehi na jiya γisa, Yakobo amunkilejo ṅwanae Yosefu; kuja kuna kishima cha Yakobo.

⁶ Yesu aitibuke kwa kuγenda, ne ahoikala he chiya kishima; ni saa mtandatu.

⁷ Kuzaiza mvyele ywa Kisamaliya kwa teka mazi. Yesu amuti: Ninka mazi, ninywe!

⁸ Hambu wahina wakwe ne waihitile na muja kaya kwa γula nkande.

⁹ Yuja mvyele ywa Kisamaliya amuti: Iwe u Muyuda, imi ni mvyele ywa Kisamaliya, unilombeza zeze, nikunke vya nywa? Hambu Wayuda wana ṅwiko na viya vya Wasamaliya.

¹⁰ Yesu azamhitula, azamuti: Ati wataila, Mulungu avyowainka wantu, ati wataila, kuti ni ndai uyu mwekuti: Ninka vya nywa!, wangamlombeza iwe, akakunka mazi ye moyo.

¹¹ Amuti: Zumbe, nkuna vya tekela, kangi kishima chaleha, yaja mazi ye moyo uyalavya na hi?

¹² U mkutu kumzinka tate yweshu Yakobo atinkileye ichi kishima? Kangi ṅwenye azanywa mumo na wanae na ṅombe zakwe.

¹³ Yesu azalandula, azamuti: Kila mwenywa aya mazi ataona nkilu vituhu.

¹⁴ Ndiye anywe mazi, niyomunka imi, nkezeaone nkilu kale na kale, miya yaja mazi, niyomunka, yataγaluka mwe ṅwili wakwe shoko ya mazi yehita kwa bula kwe nkaiamo ya kale na kale.

¹⁵ Yuja mvyele amuti: Zumbe, ninka ayo mazi, kangwe nishezaona nkilu, nikiiza na kunu kwa teka!

¹⁶ Azamuti: Hita, umwitange mulumewo, uize naye na kunu!

¹⁷ Yuja mvyele azalandula angwe: Sina mγoshi. Yesu amuti: Uzalonga vitana, ukiγamba: Sina mγoshi.

¹⁸ Hambu ne uina waγoshi washano, kangi yuja uyena naye ivi lushe, so mulumewo; aho uzalonga kweli.

¹⁹ Angwe ni yuja mvyele: Zumbe, naona, kuti u mteγanyingwa.

²⁰ Watate zeshu wazavika mwe unu mulima, kangi inywi mwaγamba: Hantu ha kuvikila heagiza ni kuja Yelusalemu.

²¹ Yesu azamuti: Mlala, tozesha, nikiγamba kuti: Hazabula, ndiho mshemvike Tate mwe unu mulima ao uko Yelusalemu!

²² Inywi muvika mushivyotaila, ishwi tivika tivyotaila, kwa kuti uvunizi uanduka kwa Wayuda.

²³ Miya nehabule, kangi ivi lushe ha haha, ndiho waja wevika kweli wamvike Tate kimpeho na kikweli; hambu Tate yohe alonda wemvika ivyoho.

²⁴ Mulungu ni mpeho; kwa ivyoho waja wemvika shuti wamvike kimpeho na kikweli!

²⁵ Angwe ni yuja mvyele: Nataila, kuti Mesiya aiza mweitangwa Kilisito; ndiho yuja aize, atatibilikila vyosheni.

²⁶ Yesu azamuti: Ni miyo nelonga na iwe.

²⁷ Vikibula aho, wahina wakwe wazaiza, wazamaka, kuti alonga na mvyele; miya nkakuna alongileye kuti: Ulondai ao ulongai naye?

²⁸ Yuja mvyele azaasha iγa jakwe, azahita na kaya, azawati waja wantu:

²⁹ Izai, mwolele muntu aniγambileye vyoshe, naγosholavyo, ati siye Kilisito!

³⁰ Wazalawa muja kaya, wazamubasha.

³¹ Wahina wakwe wazamhimila angwe: Mfuzi, ja!

³² Azawati: Imi nina vya kuja, inywi mshivyotaila.

³³ Wahina wazaγambilana: Kuna amleteleye vya kuja?

³⁴ Yesu azawati: Nkande yangu ni kuγoshola, yuja anitumileye avyokunda, nibontole ndima yakwe.

³⁵ Inywi nkamlonga: Kukeshiγale myezi mine, uluki ukibula? Namiti: Inulai mesho yenyu, mwolele mbuwa, kuti ziikalaγale, zizabuza uluki lushe!

³⁶ Muluki ainkwa kitumulo chakwe, ni nkalamo ya kale na kale, aiumbikila kuwo, kangwe mwehanda na mweluka waone nyemi kiṅwe.

³⁷ Hambu iyo mbuli ni ya kweli kuγamba: Kuna mwehanda, kuna mweluka.

³⁸ Imi nizamituma, muluke, mshiγosholeho ndima; watuhu wazaγoshola ndima, inywi mzaingila mwe ndima yawe.

³⁹ Wasamaliya wangi wa uja muzi wazamtozesha kwa mbuli ya yuja mvyele, akiwalonga uwona kuti: Azaniγambila vyoshe naγosholavyo.

⁴⁰ Wasamaliya wakiiza kwakwe wazamhembeleza, aikale kwawe, azaikala kuja mishi mili.

⁴¹ Waja watozeshewo kwa mbuli yakwe ṅwenye wazaisiiza kuγenela,

⁴² wazamuti yuja mvyele: Lushe nkatitozesha kwa viya, ulongilevyo; hambu wenye tizaiva, tizataila kuti: kweli uyu ni mvunizi ywa inu shi.

Mfuṅwa ywa Kapelinaumu.

⁴³ Mishi mili ikizinka, azakulawa kuja, azahita Galileya.

⁴⁴ Kangi Yesu ṅwenye azavilongela uwona kuti: Mteγanyi nkagimbikwa kaya kwakwe ṅwenye.

⁴⁵ Akibula Galileya, Wagalileya wazamhokela, hambu wazaona vyoshe, aγosholevyo Yelusalemu mishi ya uja mviko; hambu wohe waihitile kwe uja mviko.

⁴⁶ Azaingila vituhu Kana ya Galileya, aγalamushizemo mazi mvinyo. Kuna mfuṅwa ywa zumbe, ṅwanae ni mtamu uko Kapelinaumu.

⁴⁷ Yuja akiiva, kuti Yesu azalawa Yudeya, azabula Galileya, azamubasha, azamhembeleza, asheele, amhonye ṅwanae, hambu azaunga kufa.

⁴⁸ Yesu azamuti: Mkisheona ntangilo na vimaka nkemtozeshe.

⁴⁹ Angwe ni yuja mfuṅwa ywa zumbe: Zumbe, sheela, ṅwanangu ashizati afe!

⁵⁰ Yesu munti: Hita! Ṅwanawo a moyo. Yuja muntu azatozesha inu mbuli, Yesu amlongileyo, azahita.

⁵¹ Akesheela azakintana na wapuna wakwe, wazamuti: Ṅwanawo a moyo.

⁵² Azawauza, ati ni lini, aeneho lubaluba; wazamuti: Γulo saa mfungate kiluke chizamleka.

⁵³ Ishe azataila, kuti ni haja, Yesu amlongileho: Ṅwanawo a moyo. Ne ahotozesha na chengo chakwe kigima.

⁵⁴ Ulu lushe ni lwitangilo lwa mbili, Yesu aγosholelo akilawa Yudeya, akihila Galileya.