Yohana 16 - Kishambala New Testament 2005

Wahina inga wakoṅwe.

¹ Ivyoho nizamiγambila, kangwe mshezaaγilwa.

² Newamilemeze miviko, kangi nehabule, kila mwemikoma ahofanyanya, kuti atamγoshwela Mulungu ndima.

³ Ivyoho newaγoshole, hambu nkawamtaila Tate, hata imi.

⁴ Ivi nizamiγambila ivyoho, kangwe aho vihozabula, mkumbuke, kuti nizavimiγambila. Aho bosi similongile ivyoho, hambu ne nii haṅwe na inywi.

Mulongezi.

⁵ Miya lushe nahita kwa yuja anitumileye, kangi inywi nkakuna mweniuza kuti: Uhita nahi?

⁶ Miya kwa kuti nizamilonga ivyoho, ukiwauzagisa myoyo yenyu.

⁷ Nivyomilonga ni kweli, kuti: Ni vitana vyenyu, nikihita. Hambu ati sihita, anga yuja mulongezi nkaiza kwenyu; miya nikihita nitamtuma kwenyu.

⁸ Yuja akiiza atabunkula inu shi kwa mbuli ya uhuza na kwa mbuli ya utanda na kwa mbuli ya mlaho;

⁹ kwa mbuli ya uhuza, kwa kuti nkawanitozeshe;

¹⁰ kwa mbuli ya utanda, kwa kuti nahita kwa Tate, nkezemkeniona;

¹¹ kwa mbuli ya mlaho, kwa kuti zumbe ywa inu shi ailahiγwe.

¹² Nina mbuli nyingi za kumiγambila, miya nkemdahe kuzibuza ivi lushe.

¹³ Miya yuja akizaiza, ija mpeho ye kweli, neyamiiγale kwe vyoshe vye kweli; hambu nkealonge viya vyakwe ṅwenye, miya vyoshe, avyoiva, atavilonga, kangi viya vyeunga kulawila atavimiukwila.

¹⁴ Yuja atanigimbika, hambu ataγuwa viya vyangu, avimiukwile.

¹⁵ Vyoshe, Tate avyona navyo, ni vyangu; kwa ivyoho nizamiγambila kuti: Aγuwa viya vyangu, avimiukwile.

Kumwona Yesu vituhu.

¹⁶ Mishi miγeke ikizinka, nkemunione; vituhu hakizinka mishi miγeke, nemunione.

¹⁷ Wahina kuṅwe wazaγambilana: Inu mbuli i zeze, akitiγamba: Mishi miγeke ikizinka, nkemunione; vituhu hakizinka mishi miγeke, nemunione? Kangi akiγamba: Nahita kwa Tate?

¹⁸ Wazaγamba: Ni zeze, akiγamba: Mishi miγeke ikizinka? Nkatitaila, avyolonga.

¹⁹ Yesu akitaila, kuti wazakunda kumwuza, azawati: Mwuzanya kwa inu mbuli, kuti nizalonga: Mishi miγeke ikizinka, nkemunione; vituhu hakizinka mishi miγeke, nemunione?

Nyemi.

²⁰ Kweli namiti: Inywi nemulile na kukemesha, miya inu shineitamilwe; inywi nemwone ukiwa, miya ukiwa wenyu neuhituke nyemi!

²¹ Mvyele akivyala ana ukiwa, kwa kuti haja hakwe hazabula; miya akibinda kuvyala ṅwana, lushe nkafukila uja ukiwa kwa mbuli ya nyemi, kuti muntu azavyalwa, aikale kunu shi.

²² Hata inywi muna ukiwa ivi lushe; miya nenimione vituhu, ne ndiho myoyo yenyu itamilwe, kangi iyo nyemi nkakuna ndiye aimihoke.

²³ Mushi uja nkemuniuze mbuli; kweli namiti: Ndivyo mumlombeze Tate, ataviminka kwa mbuli ya zina jangu.

²⁴ Mpaka lelo nkamna mulombezevyo mwe zina jangu; miya lombezai, nemwinkwe, kangwe nyemi yenyu iisiize!

²⁵ Izi mbuli nizazimiγambila kilushimo; miya nehabule, ndiho nishelonge na inywi kilushimo, ndiho nimibilikile mbuli za Jate na kuzilaviliza.

Kulombeza mwe zina ja Yesu.

²⁶ Mushi uja nemulombeze mwe zina jangu, kangi similonga kuti: Imi nenimihembelezeze kwa Tate.

²⁷ Hambu Tate ṅwenye amikundisha, kwa kuti inywi mzanikundisha, mzatozesha, kuti imi nilawile kwa Tate.

²⁸ Nizalawa kwa Tate, nizaiza mwe inu shi; vituhu naasha inu shi, nahita kwa Tate.

²⁹ Angwe ni wahina wakwe: Olela! Lushe walonga na kulaviliza, nkulonga Iushimo.

³⁰ Lushe tataila, kuti iwe wataila mbuli zoshe, muntu nkashindakuuza; kwa inu mbuli tatozesha, kuti uzalawa kwa Mulungu.

³¹ Yesu azawalandula angwe: Ivi lushe mwatozesha;

³² miya nehabule, kangi haibuzile, mwasakanyiγwe kila na hantu hakwe, muniashe ike; kangi si ike, hambu Tate nina naye.

³³ Izi mbuli nizazimiγambila, kangwe mwonele mwangu mpolele. Mwe inu shi munaukiwa, miyatoγwai nimyoyo! Hambu nizaivota inu shi.