Yohana 15 - Kishambala New Testament 2005

Yesu mzabibu.

¹ Imi ni mzabibu wa kweli, Tate ni mulimi.

² Kila tambi jangu jishijovyala ajiusha, kangi kila tambi jevyala ajishengela, jiisiize kuvyala.

³ Inywi mwishengelwe kwa ija mbuli, nimiγambileyo.

⁴ Ikalai kwangu, nami niikale kwenyu! Sa tambi jishivyodaha kuvyala kwa nguvu yakwe ṅwenye, ati jasheikala mwe nkolo, vivyoho hata inywi, ati mwasheikala na imi.

⁵ Imi ni mzabibu, inywi mu matambi; mweikala kwangu, nami nikiikala kwakwe, yuja aleta kuwo jingi, kwa kuti mwishina imi, nkakuna muvyodaha kuγoshola.

⁶ Ati muntu asheikala kwangu, aashiγwa, sa tambi jivyoashiγwa jikikalaγala, vikibinda wantu wayaumbika haṅwe, wayaasha mwe moto, yahye.

⁷ Mkiikala kwangu, hata mbuli zangu zikiikala kwenyu, lushe ndivyo mkunde kulombeza, vitamibontokela.

⁸ Na inu mbuli Tate agimbikwa, mkilavya kuwo jingi, mkiniγalukila wahina.

Lukundisho.

⁹ Sa Tate anikundishevyo, ne nivyomikundisha nami; ikalai na kunikundisha!

¹⁰ Ati mwaγolokela milaγilizo yangu, mtaikala na kunikundisha, sa imi niγolokelevyo milaγilizo ya Tate, nikiikala na kumkundisha.

¹¹ Izi mbuli nizazimiγambila, kangwe nyemi yangu iikale kwenyu, nyemi yenyu iisiize kuγenela.

¹² Unu ni mlaγilizo wangu, mkundishane, sa imi nimikundishevyo.

¹³ Nkakuna mwekundisha kuzinka aho, akikiinkila kwa mbuli ya wambuyae.

¹⁴ Inywi mu wambuyangu mkiγoshola, nivyomilaγiliza.

¹⁵ Senikemiitanga wapuna, hambu mupuna nkataila, baba yakwe avyoγoshola; miya inywi nizamiitanga wambuyangu, hambu vyoshe, niivilevyo kwa Tate, nizavimiγambila.

¹⁶ Si nywiyo munishaγulewo, ni miyo nimishaγulewo, nizamiika, muhite, mulavye kuwo jingi, kuwo jenyu jiikale, kangwe ndivyo mumlombeze Tate mwe zina jangu, aviminke.

¹⁷ Inu mbuli naimilaγiliza, mkundishane.

Lushukizo lwa inu shi.

¹⁸ Ati inu shi yamishuka, tailai kuti: Imi izaandiila kunishuka, inywi mshizati mshukwe ndiyo.

¹⁹ Ati mwanduka mwe inu shi, anga inu shi izakundisha weyae; kwa kuti nkamwanduka mwe inu shi, kangi nizamishaγula na kumilavya mwe inu shi, kwa ivyoho inu shi yamishuka.

²⁰ Fukilai ija mbuli, nimiγambileyo kuti: Mupuna so mkulu kumzinka baba yakwe! Ati imi wazaniγulusha, hata inywi newamiγuiushe! Ati wazatoza mbuli yangu, hata yenyu newaitoze!

²¹ Miya ivi vyoshe newavimiγoshwele kwa mbuli ya zina jangu, hambu nkawamtaila anitumileye.

²² Ati siizile nikiwaγambila, anga nkawana uhuza, miya ivi lushe nkawana lukanile kwa mbuli ya uhuza wawe.

²³ Mwenishuka imi amshuka hata Tate.

²⁴ Ati siγoshole kwawe ziya ndima, mtuhu ashiγosholezo, anga nkawana uhuza; miya lushe wazaziona, kangi wanishuka imi, hata Tate;

²⁵ ni kangwe ija mbuli ibontoke igondiγweyo mwe milomo yawe kuγamba: Wanishuka bule.

²⁶ Ndiho aizile yuja irulongezi, ndiye nimtume nii kwa Tate, ni mpehoye ukweliyelawa kwa Tate, yuja neanilongele uwona.

²⁷ Hatamywi mwalonga uwona, hambu mzaanga na imi, vivyo niandiilevyo kulawila.